ଖୋର୍ଦ୍ଧା ଜିଲା ବେଗୁନିଆ ବ୍ଲକ ଅଧୀନ ମାଧପୁର ଆଦିବାସୀ ଅଧ୍ୟୁଷିତ ଗଁାର ପିଲାଙ୍କ ଏହି ଚିତ୍ର ଶିକ୍ଷା ବ୍ୟବସ୍ଥା ପ୍ରତି ଅଙ୍ଗୁଳି ଉଠାଇଛି।
ମାଧପୁର ଗ୍ରାମରେ ଥିବା ପ୍ରାଥମିକ ବିଦ୍ୟାଳୟରେ କରୋନା ପୂର୍ୱରୁ ମାତ୍ର ୨୨ଜଣ ପିଲା ପଢ଼ୁଥିଲେ। ତେଣୁ ଆବଶ୍ୟକ ଛାତ୍ରୀଛାତ୍ର ନ ଥିବା ଦର୍ଶାଇ ଉକ୍ତ ବିଦ୍ୟାଳୟକୁ ବନ୍ଦ କରି ୩ କିମି ଦୂର କୁଶପଲା ପ୍ରାଥମିକ ବିଦ୍ୟାଳୟରେ ମିଶ୍ରଣ କରାଯାଇଥିଲା। ହେଲେ କୁଶପଲା ବିଦ୍ୟାଳୟକୁ ରାସ୍ତାପାର ହୋଇ ଯିବାକୁ ପଡ଼ୁଥିବାରୁ ଛାତ୍ରୀଛାତ୍ର ଏବଂ ସେମାନଙ୍କ ଅଭିଭାବକମାନେ ଇଚ୍ଛା ପ୍ରକାଶ କରି ନ ଥିଲେ। ପୂର୍ୱରୁ ମାଧପୁର ଗ୍ରାମର ଅଧିକାଂଶ ଛାତ୍ରୀଛାତ୍ର ନିକଟସ୍ଥ ବଡ଼ବେରଣା ପ୍ରାଥମିକ ବିଦ୍ୟାଳୟ ଓ ଉଚ୍ଚ ବିଦ୍ୟାଳୟରେ ପଢ଼ୁଥିଲେ। ତେଣୁ ମାଧପୁର ପ୍ରାଥମିକ ବିଦ୍ୟାଳୟ ବନ୍ଦ ହୋଇଯିବାପରେ ଅଭିଭାବକମାନେ ବଡ଼ବେରଣା ପ୍ରାଥମିକ ବିଦ୍ୟାଳୟରେ ପିଲାମାନଙ୍କ ନାମ ଲେଖାଇଥିଲେ। ଏବେ ୨୫ରୁ ଊର୍ଦ୍ଧ୍ୱ ଛାତ୍ରୀଛାତ୍ର ବଡ଼ବେରଣା ବିଦ୍ୟାଳୟକୁ ପଢ଼ିବାକୁ ଯାଉଛନ୍ତି। ପକ୍କା ରାସ୍ତାରେ ଗଲେ ଦୂରତା ୩ କିଲୋମିଟରରୁ ଅଧିକ ହେଉଥିବାରୁ ଦୂରତା କମାଇବା ପାଇଁ ପିଲାମାନେ ବିଲ ହିଡ଼କୁ ଶର୍ଟକଟ୍‌ ରାସ୍ତା ଭାବେ ବାଛିଛନ୍ତି। ପ୍ରଥମ ଶ୍ରେଣୀଠାରୁ ଦଶମ ଶ୍ରେଣୀ ପର୍ଯ୍ୟନ୍ତ ସମସ୍ତ ଛାତ୍ରୀଛାତ୍ର ଏହି ବିପଦପୂର୍ଣ୍ଣ ବାଟରେ ଯାତାୟାତ କରୁଛନ୍ତି। ପିଲାଙ୍କ ପାଠପଢ଼ା ସହ ସେମାନଙ୍କ ସୁରକ୍ଷା ଅଭିଭାବକଙ୍କ ପାଇଁ ଚିନ୍ତାର କାରଣ ପାଲଟିଛି। ଦୂରରେ ଥିବା ବିଦ୍ୟାଳୟକୁ ଯାତାୟାତ ପାଇଁ ଖର୍ଚ୍ଚ ଦେବାର ବ୍ୟବସ୍ଥା ଥିବା କୁହାଯାଉଥିଲେ ମଧ୍ୟ ଏନେଇ ଅନେକ ଅଭିଭାବକ ଅବଗତ ନ ଥିବା ଜଣାପଡ଼ିଛି। ଗ୍ରାମରେ ଥିବା ବିଦ୍ୟାଳୟ ବନ୍ଦ ହେବା ପରେ ଏହାକୁ ପୁନଃ ଖୋଲିବା ପାଇଁ ବାରମ୍ୱାର ପ୍ରଶାସନକୁ ଜଣାଇଥିଲେ ମଧ୍ୟ କୌଣସି ସୁଫଳ ମିଳିନାହିଁ। ପିଲାମାନେ ଯେଉଁ ପରିସ୍ଥିତିରେ ପାଠ ପଢ଼ିବାକୁ ଯାଉଛନ୍ତି, ସେଥିରେ ସେମାନଙ୍କ ଜୀବନ ପ୍ରତି ବିପଦ ରହିଛି। କୌଣସି ଅଘଟଣ ଘଟିଲେ ଦାୟୀ କିଏ ରହିବ ବୋଲି ଗ୍ରାମବାସୀ ପ୍ରଶ୍ନ କରିଛନ୍ତି। ଏନେଇ ଅଭିଭାବକ ବାବୁ ସ୍ୱାଇଁ କହିଛନ୍ତି, ତାଙ୍କର ୨ ପିଲା ମଧ୍ୟ ଏହି ବାଟ ଦେଇ ସ୍କୁଲ ଯାଉଛନ୍ତି। ମୁଖ୍ୟରାସ୍ତାରେ ଗଲେ ଅଧିକ ଦୂର ହେଉଥିବାରୁ ପିଲାମାନେ ବିଲ ହିଡ଼ ଦେଇ ଯାତାୟାତ କରୁଛନ୍ତି। ଏଥିପାଇଁ ସବୁବେଳେ ଭୟ ଲାଗୁଥିଲେ ମଧ୍ୟ ଭଗବାନଙ୍କ ଭରସାରେ ପିଲାଙ୍କୁ ସ୍କୁଲ ପଠାଇବାକୁ ପଡ଼ୁଛି। ତେଣୁ ଗ୍ରାମର ବିଦ୍ୟାଳୟକୁ ପୁନଃ ଖୋଲିବା ପାଇଁ ସେ ଦାବି କରିଛନ୍ତି। ବେଗୁନିଆ ଜନ ଅଧିକାର ମଞ୍ଚ ସଭାପତି ଅକ୍ଷୟ ରାଉତରାୟ ଏହାକୁ ଚିନ୍ତାଜନକ ବିଷୟ ବୋଲି କହିବା ସହ ଜନପ୍ରତିନିଧି ଓ ଜିଲା ପ୍ରଶାସନ ତୁରନ୍ତ ହସ୍ତକ୍ଷେପ କରି ସମସ୍ୟାର ସମାଧାନ କରିବାକୁ ଦାବି କରିଛନ୍ତି। ସେହିପରି ବେଗୁନିଆ ବାସିନ୍ଦା ଶିବ ମୁନି କହିଛନ୍ତି, ଉପସ୍ଥାନ କମ୍‌ ଦର୍ଶାଇ ବିଦ୍ୟାଳୟକୁ ବନ୍ଦ କରିଦିଆଯାଇଛି। ଏବେ ପିଲାମାନେ ଦୂରତା କମାଇବା ପାଇଁ ବିପଦପୂର୍ଣ୍ଣ ବାଟ ବାଛୁଛନ୍ତି। ସରକାର ତୁରନ୍ତ ସେମାନଙ୍କ ପାଇଁ ସୁରକ୍ଷିତ ଯାତାୟାତ ବ୍ୟବସ୍ଥା କରିବାକୁ ସେ ଦାବି କରିଛନ୍ତି। ଅନ୍ୟପକ୍ଷରେ ବେଗୁନିଆ ବ୍ଲକ ଶିକ୍ଷା ଅଧିକାରୀ ଅର୍ଣ୍ଣବ ବେଉରା କହିଛନ୍ତି, ସେ ନିକଟରେ ଦାୟିତ୍ୱ ଗ୍ରହଣ କରିଥିବାରୁ ଘଟଣା ସମ୍ପର୍କରେ ଅବଗତ ନାହାନ୍ତି। ବିଦ୍ୟାଳୟ ବନ୍ଦ ହେବା ପରେ ଦୂରକୁ ପାଠ ପଢ଼ିବାକୁ ଯାଉଥିବା ପିଲାଙ୍କ ଯାତାୟାତ ଖର୍ଚ୍ଚ ବାବଦରେ ବ୍ୟବସ୍ଥା ଥିଲେ ମଧ୍ୟ ସରକାରୀ ମାର୍ଗଦର୍ଶିକା ସ୍ପଷ୍ଟ ନ ଥିବାରୁ ସମସ୍ୟା ଉପୁଜୁଛି। ଗ୍ରାମବାସୀ ଲିଖିତ ଭାବେ ଜଣାଇଲେ ଉପରିସ୍ଥ ଅଧିକାରୀଙ୍କୁ ଅବଗତ କରାଯିବ ବୋଲି ବେଉରା ପ୍ରକାଶ କରିଛନ୍ତି। ଜିଲାପାଳ ଅମ୍ରିତ୍‌ ଋତୁରାଜ କହିଛନ୍ତି, ଘଟଣା ସମ୍ପର୍କରେ ଏବେ ଜାଣିବାକୁ ପାଇଛି, ଖୁବ୍‌ଶୀଘ୍ର ଆବଶ୍ୟକ ପଦକ୍ଷେପ ନିଆଯିବ।