ଦାରିଙ୍ଗବାଡି, ୩୦।୫ (ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ଅଞ୍ଚଳରେ ଶନିବାର ଠାରୁ ଭୋଟ ପରିଚୟ ପତ୍ରର ସ୍ୱତନ୍ତ୍ର ସଂଶୋଧନ କାର୍ଯ୍ୟକ୍ରମ ଆନୁଷ୍ଠାନିକ ଭାବେ ଆରମ୍ଭ ହୋଇଯାଇଛି। ଭାରତୀୟ ନିର୍ବାଚନ ଆୟୋଗଙ୍କ ନିର୍ଦ୍ଦେଶ କ୍ରମେ ସାରା ଦେଶରେ ଏହି ସଂଶୋଧନ ପ୍ରକ୍ରିୟା ଚାଲିଥିବା ବେଳେ ଦାରିଙ୍ଗବାଡି ବ୍ଲକରେ ମଧ୍ୟ ଏହାକୁ ବ୍ୟାପକ କରାଯାଇଛି।

ଏହି କାର୍ଯ୍ୟକ୍ରମ ଅଧୀନରେ ବୁଥ ସ୍ତରୀୟ ଅଧିକାରୀମାନେ ପ୍ରତ୍ୟେକ ଗ୍ରାମର ଘର ଘର ବୁଲି ମତଦାତା ସୂଚୀର ସଂଶୋଧନ କାର୍ଯ୍ୟକୁ ତନତନ କରି ଯାଞ୍ଚ କରୁଛନ୍ତି। ବ୍ଲକର ସମସ୍ତ କାର୍ଯ୍ୟକୁ ସୂଚାରୁରୂପେ ପରିଚାଳନା କରିବା ପାଇଁ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି। ମୋଟ ୧୦୭ବୁଥ ରେ ୧୦୭ ଜଣ ବୁଥ ଲେବୁଲ ଅଫିସର(BLO) ଏବଂ ୧୩ ଜଣ ସୁପରଭାଇଜର ଏହି କାର୍ଯ୍ୟରେ ନିୟୋଜିତ ହୋଇଛନ୍ତି |

ଦାରିଙ୍ଗବାଡି ବିଡ଼ିଓ ତଥା ସହ-ନିର୍ବାଚନ ଅଧିକାରୀ ପ୍ରୀତିରଞ୍ଜନ ରଥ ନିଜେ ବିଭିନ୍ନ ବୁଥ୍ ଅଞ୍ଚଳ ଗସ୍ତ କରି ଏହି କାର୍ଯ୍ୟର ପ୍ରତ୍ୟକ୍ଷ ତଦାରଖ କରିଛନ୍ତି। ସେ ବୁଥ୍ ଲେବୁଲ ଅଧିକାରୀ ଓ ସୁପରଭାଇଜରମାନଙ୍କ ସହ ସ୍ଥିତିର ସମୀକ୍ଷା କରିବା ସହିତ କାର୍ଯ୍ୟକୁ ସଠିକ୍ ଓ ସମୟସୀମା ମଧ୍ୟରେ ଶେଷ କରିବାକୁ ନିର୍ଦ୍ଦେଶ ଦେଇଛନ୍ତି। ଏଥି ସହିତ ସାଧାରଣ ଜନସାଧାରଣଙ୍କୁ ଏହି ଗୁରୁତ୍ୱପୂର୍ଣ୍ଣ କାର୍ଯ୍ୟରେ ବୁଥ୍ ଲେବୁଲ ଅଫିସରମାନଙ୍କୁ ସମ୍ପୂର୍ଣ୍ଣ ସହଯୋଗ କରିବାକୁ ସେ ପରାମର୍ଶ ଦେଇଛନ୍ତି।

ବିଡ଼ିଓଙ୍କ ଏହି ପରିଦର୍ଶନ ଓ ସମୀକ୍ଷା ସମୟରେ ମଙ୍ଗଳ ସମ୍ପ୍ରସାରଣ ଅଧିକାରୀ ବିଶ୍ୱଜିତ ଜାଲି ଏବଂ ଗ୍ରାମପଞ୍ଚାୟତ ଉନ୍ନୟନ ଅଧିକାରୀ ସୁରେଶ ପଣ୍ଡା ପ୍ରମୁଖ ଉପସ୍ଥିତ ରହି ସହଯୋଗ କରିଥିଲେ।

ସୂଚନାଯୋଗ୍ୟ ଯେ, ଏହିପରି ଏକ 'ସ୍ପେସିଆଲ ଇଣ୍ଟେନସିଭ ରିଭ୍ୟୁ (SIR)' ବା ସ୍ୱତନ୍ତ୍ର ସଂଶୋଧନ ଏବଂ ମେପିଂ କାର୍ଯ୍ୟ ପୂର୍ବରୁ ଗତ ୨୦୦୨ ମସିହାରେ ହୋଇଥିଲା। ଦୀର୍ଘ ବର୍ଷ ପରେ ଚଳିତ ବର୍ଷ ପୁଣି ଥରେ ଏହାକୁ ନୂତନ ଭାବେ ସଂଶୋଧନ କରାଯାଉଥିବାରୁ ଏହା ମତଦାତା ସୂଚୀକୁ ଅଧିକ ସ୍ୱଚ୍ଛ ଓ ସତେଜ କରିବାରେ ସହାୟକ ହେବ।