ଦେବଗଡ଼, ୬।୫(ଶଶାଙ୍କ ଶେଖର ଝାଙ୍କର)ପୂର୍ବ ଶତ୍ରୁତାକୁ କେନ୍ଦ୍ରକରି ଜଘନ୍ୟ ହତ୍ୟାକାଣ୍ଡ। ଦେବଗଡ଼ ଥାନା ତିଳେଇବଣି ଫାଣ୍ଡି ଅନ୍ତର୍ଗତ ଚଟିବରଘାଟ ଗ୍ରାମ ନିକଟସ୍ଥ ୪୯ ନମ୍ବର ଜାତୀୟ ରାଜପଥ ଉପରେ ହାଇୱାରେ ଧକ୍କା ଦେଇ ସ୍କୁଟି ଆରୋହୀକୁ ହତ୍ୟା କରାଯାଇଥିବା ଦେବଗଡ଼ ଥାନାରେ ଲିଖିତ ଅଭିଯୋଗ ହୋଇଛି । ଅଭିଯୋଗ ଆଧାରରେ ଦେବଗଡ଼ ଥାନା ପୋଲିସ ଏକ ହତ୍ୟା ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି ।

ସୂଚନା ଅନୁଯାୟୀ ରିଆମାଳ ଥାନା ମହେନ୍ଦ୍ରପୁର ଗ୍ରାମର କାର୍ତ୍ତିକ ଓରାମ ଆଜି ନିଜ ସ୍ତ୍ରୀ ଗୀତା ମିଞ୍ଜଙ୍କ ସହ ତିଳେଇବଣି ବଜାରକୁ ଆସିଥିଲେ । ସେହି ସମୟରେ ଅଭିଯୁକ୍ତ ହାଇୱା ଚାଳକ ଅସନଲତା ଗ୍ରାମର ସୁଶୀଲ କିଷାନଙ୍କ ସହ କାର୍ତ୍ତିକଙ୍କ କୌଣସି କାରଣକୁ ନେଇ ଯୁକ୍ତିତର୍କ ହୋଇଥିଲା । ତେବେ ବଜାର ସାରି ଉଭୟ କାର୍ତ୍ତିକ ଓ ତାଙ୍କ ସ୍ତ୍ରୀ ନିଜ ସ୍କୁଟି ଯୋଗେ ମଧ୍ୟାହ୍ନରେ ନିଜ ଗ୍ରାମ ମହେନ୍ଦ୍ରପୁରକୁ ଫେରୁଥିବା ସମୟରେ ଚଟିବରଘାଟ ଗ୍ରାମ ନିକଟରେ ସେମାନଙ୍କ ସ୍କୁଟି ଟାୟାର ପଂକଚର ହୋଇଯିବାରୁ ସାମୀ ସ୍ତ୍ରୀ ରାସ୍ତା କଡରେ ସ୍କୁଟି ସହ ଛିଡା ହୋଇଥିଲେ। ହାଇୱା ଚାଳକ ସୁଶୀଲ ସେମାନଙ୍କୁ ପିଛା କରି ସେଠାରେ ପହଞ୍ଚି କିଛି ମନ୍ତବ୍ୟ ଦେବାରୁ କାର୍ତ୍ତିକ ସହ ପୁଣି ଥରେ ଯୁକ୍ତି ତର୍କ ହେବା ସହ ଉଭୟ ସୁଶୀଲ ଓ କାର୍ତ୍ତିକ ପରସ୍ପରକୁ ଦେଖିନେବାର ଧମକ ଦେଇଥିଲେ । ତେବେ କାର୍ତ୍ତିକଙ୍କ ସ୍ତ୍ରୀ ଗୀତା ନିଜ ସ୍ବାମୀକୁ ବୁଝାସୁଝା କରି ନିଜ ସ୍କୁଟି ପାଖକୁ ଚାଲି ଆସି ଛିଡା ହୋଇଥିବା ବେଳେ ଅଭିଯୁକ୍ତ ସୁଶୀଲ ହାଇୱାକୁ ଚଳାଇ ସ୍କୁଟି ନିକଟରେ ଥିବା କାର୍ତ୍ତିକ ଉପରେ ଚଢ଼ାଇ ଦେଇ ଫେରାର ହୋଇଯାଇଥିଲେ। ଏହା ଦେଖି କାର୍ତ୍ତିକଙ୍କ ସ୍ତ୍ରୀ ଗୀତା ନିଜ ସମ୍ପର୍କୀୟଙ୍କୁ ଫୋନ ଯୋଗେ ଘଟଣା ସମ୍ପର୍କରେ ସୂଚନା ଦେବାସହ ସେଠାରେ ପଡ଼ିଥିବା ଗୁରୁତର କାର୍ତ୍ତିକକୁ ୧୦୮ ଆମ୍ବୁଲାନ୍ସ ସହାୟତାରେ ଚିକିତ୍ସା ପାଇଁ ଜିଲା ମୁଖ୍ୟ ଚିକିତ୍ସାଳୟକୁ ଆଣିଥିଲେ। ମାତ୍ର ଡାକ୍ତର ସେଠାରେ କାର୍ତ୍ତିକକୁ ମୃତ ଘୋଷଣା କରିଥିଲେ । ସୂଚନା ପାଇ ଦେବଗଡ଼ ଥାନା ପୋଲିସ ଫେରାର ହୋଇଯାଉଥିବା ହାଇୱା ସହ ଅଭିଯୁକ୍ତ ସୁଶୀଲକୁ ଜମନକିରା ଥାନା ପୋଲିସ ସହାୟତାରେ ଅଟକ ରଖି ପଚରାଉଚୁରା ଆରମ୍ଭ କରିଛି । ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯିବାକୁ ଥିବାବେଳେ ବୁଧବାର ସାଇଣ୍ଟିଫିକ ଟିମ ସହାୟତାରେ ଘଟଣାର ଅଧିକ ତଦନ୍ତ କରାଯିବ ବୋଲି ପୋଲିସ ସୂତ୍ରରୁ ସୂଚନା ମିଳିଛି ।

Odisha's No.1 Odia Daily