ୱିକେଟକିପର ବ୍ୟାଟ୍ସମ୍ୟାନ ସ୍କଟ୍ ଏଡୱାର୍ଡସ ନେଦରଲ୍ୟାଣ୍ଡସ୍ କ୍ରିକେଟ୍ ଦଳର ଅଧିନାୟକ ପଦରୁ ଇସ୍ତଫା ଦେଇଛନ୍ତି । ଯେତେବେଳେ ଦଳ ICC କ୍ରିକେଟ୍ ବିଶ୍ୱକପ୍ ଲିଗ୍ ୨ ରେ ଏକ ଦୃଢ଼ ପ୍ରଦର୍ଶନର ମଜା ନେଉଛି ଏବଂ ୨୦୨୭ ODI ବିଶ୍ୱକପ୍ ଯୋଗ୍ୟତା ପାଇଁ ସ୍ଥାନ ସୁରକ୍ଷିତ କରିବାର ନିକଟତର ହେଉଛି ଠିକ୍ ସେହି ସମୟରେ ତାଙ୍କ ଏହି ନିଷ୍ପତ୍ତି ସାମ୍ନାକୁ ଆସିଛି ।
ରୟାଲ୍ ଡଚ୍ କ୍ରିକେଟ୍ ଆସୋସିଏସନ୍ ଇନଷ୍ଟାଗ୍ରାମର ଏକ ଭିଡିଓ ମାଧ୍ୟମରେ ଏହି ନିଷ୍ପତ୍ତି ଘୋଷଣା କରିଛି । ଏହି ଭିଡିଓରେ ୨୯ ବର୍ଷୀୟ ସ୍କଟ୍ ଏଡୱାର୍ଡସ୍ ତାଙ୍କ ସାଥୀ ଖେଳାଳିମାନଙ୍କୁ ଭାବପ୍ରବଣ ହୋଇ କହିଥିଲେ ଯେ, ଏବେ ଅଧିନାୟକ ପଦକୁ ଛାଡ଼ି ଖେଳ ଉପରେ ଧ୍ୟାନ ଦେବାର ସମୟ ଆସିଛି ।
ଏହି ସମୟରେ ସ୍କଟ୍ ଏଡୱାର୍ଡସ କହିଛନ୍ତି ଯେ, ମୁଁ ଅଧିନାୟକ ପଦ ଛାଡ଼ି ଦେଉଛି । ମୁଁ ଏ ବିଷୟରେ ପ୍ରଶିକ୍ଷକ ରିଆନ୍ କୁକ୍ ଏବଂ ଅନ୍ୟ କିଛି ବ୍ୟକ୍ତିଙ୍କ ସହ ବିସ୍ତୃତ ଆଲୋଚନା କରିଛି । ମୁଁ ଭାବୁଛି ଏହା ଠିକ୍ ସମୟ। ଜଣେ ଖେଳାଳି ଭାବରେ, ମୁଁ ଦଳକୁ ଅଧିକ ଦେଇପାରିବି ଏବଂ ଏହା ଆଗକୁ ମୋର ଲକ୍ଷ୍ୟ ରହିବ । ଏହି ଦଳ ବହୁତ ଖାସ୍ ଏବଂ ମୁଁ ନିଶ୍ଚିତ ଯେ ଆମର ଏକ ଉଜ୍ଜ୍ବଳ ଭବିଷ୍ୟତ ରହିଛି । ତାଙ୍କର ନିଷ୍ପତ୍ତି କୌଣସି ବିବାଦ କିମ୍ବା ଚାପର ଫଳାଫଳ ନୁହେଁ, ବରଂ ଦଳର ଭବିଷ୍ୟତ ଏବଂ ତାଙ୍କ ନିଜସ୍ୱ ପ୍ରଦର୍ଶନକୁ ଦୃଷ୍ଟିରେ ରଖି ନିଆଯାଇଛି ବୋଲି ଏଡୱାର୍ଡସ୍ ସ୍ପଷ୍ଟ କରିଛନ୍ତି ।
ସ୍କଟ୍ ଏଡୱାର୍ଡସ୍ଙ୍କ ଇସ୍ତଫା ପରେ, ଅଲରାଉଣ୍ଡର ବାସ ଡି ଲିଡେଙ୍କୁ ବିଶ୍ୱକପ୍ ଲିଗ୍ ୨ର ଅବଶିଷ୍ଟ ମ୍ୟାଚ୍ ପାଇଁ ଅଧିନାୟକ ନିଯୁକ୍ତ କରାଯାଇଛି । ନେଦରଲ୍ୟାଣ୍ଡ୍ସ ଏବେ ଓମାନ ଏବଂ ୟୁଏଇ ବିପକ୍ଷରେ ଗୁରୁତ୍ୱପୂର୍ଣ୍ଣ ମ୍ୟାଚ୍ ଖେଳିବ । ଆମେ ନିଜ ଉପରେ ବିଶ୍ୱାସ ନ ରଖିଥିଲେ ମଧ୍ୟ ତୁମେ ଆମ ଉପରେ ବିଶ୍ୱାସ କରିଥିଲ । ତୁମେ କେବଳ ଜଣେ ଅଧିନାୟକ ଭାବରେ ନୁହେଁ, ବରଂ ପ୍ରତ୍ୟେକ ଖେଳାଳିଙ୍କ ଆତ୍ମବିଶ୍ୱାସ ବୃଦ୍ଧି କରିଥିବା ନେତା ଭାବରେ ଆମକୁ ନେତୃତ୍ୱ ଦେଇଥିଲ ।
ଜୁନ୍ ୨୦୨୨ରେ ଅଧିନାୟକ ହେବା ପରେ, ସ୍କଟ୍ ଏଡୱାର୍ଡସ୍ ନେଦରଲ୍ୟାଣ୍ଡସ୍ କ୍ରିକେଟକୁ ଏକ ନୂତନ ପରିଚୟ ଦେଇଥିଲେ । ତାଙ୍କ ଅଧିନାୟକତ୍ୱରେ, ଦଳ ଅନେକ ବିଜୟ ହାସଲ କରିଥିଲା । ୨୦୨୨ ଟି-୨୦ ବିଶ୍ୱକପରେ, ସେମାନେ ଦକ୍ଷିଣ ଆଫ୍ରିକାକୁ ପରାସ୍ତ କରି ଟୁର୍ଣ୍ଣାମେଣ୍ଟରୁ ବାହାର କରିଦେଇଥିଲେ। ସେହି ଟୁର୍ଣ୍ଣାମେଣ୍ଟରେ ସେମାନେ ଜିମ୍ବାୱେକୁ ମଧ୍ୟ ପରାସ୍ତ କରିଥିଲେ । ୨୦୨୩ ଏକଦିବସୀୟ ବିଶ୍ୱକପରେ, ସେମାନେ ଦକ୍ଷିଣ ଆଫ୍ରିକା ଏବଂ ବାଂଲାଦେଶ ଭଳି ଶକ୍ତିଶାଳୀ ଦଳକୁ ପରାସ୍ତ କରି ବିଶ୍ୱକୁ ଆଶ୍ଚର୍ଯ୍ୟ କରିଦେଇଥିଲେ ।
ସ୍କଟ୍ ଏଡୱାର୍ଡସ୍ ନେଦରଲ୍ୟାଣ୍ଡସ୍ ପାଇଁ ୫୬ଟି ଦିନିକିଆ ଏବଂ ୫୦ଟି ଟି-୨୦ ଆନ୍ତର୍ଜାତୀୟ ମ୍ୟାଚ୍ ଖେଳି ଅଧିନାୟକତ୍ୱ କରିଥିଲେ। ତାଙ୍କ ଅଧିନାୟକତ୍ୱରେ ନେଦରଲ୍ୟାଣ୍ଡସ୍ ୨୪ଟି ଦିନିକିଆ ଜିତିଥିଲା । ଟି-୨୦ ଆନ୍ତର୍ଜାତୀୟ ମ୍ୟାଚ୍ ଖେଳି ଏଡୱାର୍ଡସ୍ ନେଦରଲ୍ୟାଣ୍ଡସ୍କୁ ୨୩ଟି ବିଜୟୀ କରାଇଥିଲେ। ଜଣେ ୱିକେଟକିପର-ବ୍ୟାଟ୍ସମ୍ୟାନ୍ ଭାବରେ, ସେ ଅନେକ ଗୁରୁତ୍ୱପୂର୍ଣ୍ଣ ଇନିଂସ ଖେଳି ଦଳକୁ କଷ୍ଟକର ପରିସ୍ଥିତିରୁ ବାହାର କରିବାରେ ସାହାଯ୍ୟ କରିଥିଲେ ।
ଅନ୍ୟପଟେ ନେଦରଲ୍ୟାଣ୍ଡସ୍ ବର୍ତ୍ତମାନ ICC କ୍ରିକେଟ୍ ବିଶ୍ୱକପ୍ ଲିଗ୍ ୨ ମାନ୍ୟତାରେ ଦ୍ୱିତୀୟ ସ୍ଥାନରେ ରହିଛି । ଶୀର୍ଷ ଚାରିଟି ଦଳ ୨୦୨୭ ODI ବିଶ୍ୱକପ୍ ଯୋଗ୍ୟତା ପାଇଁ ଉନ୍ନୀତ ହେବେ । ଅଧିନାୟକ ଭାବରେ, ବାସ ଡି ଲିଡେ ଏବେ ପରବର୍ତ୍ତୀ ପର୍ଯ୍ୟାୟକୁ ଦଳକୁ ନେତୃତ୍ୱ ଦେବା ପାଇଁ ଦାୟୀ ରହିବେ । ନେତୃତ୍ୱ ପରିବର୍ତ୍ତନ ସତ୍ତ୍ୱେ ନେଦରଲ୍ୟାଣ୍ଡସ୍ ସେମାନଙ୍କର ବିଜୟ ଧାରା ବଜାୟ ରଖିବାକୁ ଆଶା କରିବ ।