ପୁରୀ : ପୁଣି ମହାପ୍ରଭୁଙ୍କ ଚନ୍ଦନ ଯାତ୍ରାରେ ଅଭାବନୀୟ ଦୃଶ୍ୟ । ଆଜି ସନ୍ଧ୍ୟାରେ ଦିନ ଚାପ ଅନୁଷ୍ଠିତ ହେଉଥିବାବେଳେ ହଠାତ୍ କାଳବୈଶାଖୀ ପ୍ରଭାବରେ ପ୍ରବଳ ବର୍ଷା ,ପବନ ହୋଇଥିଲା । ନନ୍ଦା ଓ ଭଦ୍ରା ଚାପରେ ବିରାଜିତ ମହାପ୍ରଭୁ ଜଳକ୍ରୀଡା ସାରି ଫେରୁଥିବାବେଳେ କାଳବୈଶାଖୀ ପ୍ରଭାବରେ ପ୍ରବଳ ବର୍ଷା ,ପବନ ଯୋଗୁଁ ନରେନ୍ଦ୍ର ପୁଷ୍କରିଣୀର ଗୋଟିଏ ପାର୍ଶ୍ୱରେ ଚାପ ଅଟକି ଯାଇଥିଲା ।
ତୁରନ୍ତ ଆଉ ଗୋଟିଏ ଡଙ୍ଗା ,ଲାଇଫ ଗାର୍ଡ ଓ ରଶି ଦ୍ବାରା ଚାପ ଡଙ୍ଗାକୁ କୂଳକୁ ଅଣାଯାଇଥିଲା । ଏହି ସମୟରେ ବିଦ୍ୟୁତ୍ କାଟ୍ ମଧ୍ୟ ହୋଇଥିଲା । ସନ୍ଧ୍ୟା ପ୍ରାୟ ୭-୧୫ ରୁ ୭.୩୦ ପର୍ଯ୍ୟନ୍ତ ଏଭଳି ଦୃଶ୍ୟ ଦେଖିବାକୁ ମିଳିଥିଲା ନରେନ୍ଦ୍ର ପୁଷ୍କରିଣୀରେ । ଗତ ୨୮ ତାରିଖ ଦିନ ଚନ୍ଦନ ଯାତ୍ରା ନୀତିରେ ହୋଇଥିଲା ବଡ ବିଭ୍ରାଟ । ସେବାୟତ ବିବାଦ ଯୋଗୁଁ ଚାପ ନ ଖେଳି ବାହୁଡ଼ିଥିଲେ ମହାପ୍ରଭୁଙ୍କ ଚଳନ୍ତି ପ୍ରତିମା ମଦନ ମୋହନ,ଭୂଦେବୀ ଶ୍ରୀଦେବୀଙ୍କ ସମେତ ରାମ କୃଷ୍ଣ ଓ ଶ୍ରୀକ୍ଷେତ୍ରର ପଞ୍ଚ ମହାଦେବ ।