ଭୁବନେଶ୍ବର: ପୂର୍ବତଟ ରେଳପଥରୁ ଅଲଗା ହେଲା ପଲ୍ଲାସା-ଇଚ୍ଛାପୁରମ ଡିଭିଜନ । ରେଳୱେ ବୋର୍ଡର ନିଷ୍ପତ୍ତି ପରେ ରାଜ୍ୟରେ ତୀବ୍ର ପ୍ରତିକ୍ରିୟା । ରେଳୱେକୁ ନେଇ ତେଜିଲା ରାଜନୀତି । ପ୍ରେସମିଟରେ ଡବଲ ଇଞ୍ଜିନ ସରକାରକୁ ଟାର୍ଗେଟ କରିଛି ବିଜେଡି । ରାଜ୍ୟରେ ଏବେ ଡବଲ ଇଞ୍ଜିନ ସରକାର । କିନ୍ତୁ ଆନ୍ଧ୍ରପ୍ରଦେଶକୁ ପୂର୍ବତଟ ରେଳପଥର ଗୋଟିଏ ପରେ ଗୋଟିଏ ଅଞ୍ଚଳ କାହିଁକି ଚାଲିଯାଉଛି ବୋଲି ପ୍ରଶ୍ନ କରିଛନ୍ତି ବିଜେଡି ନେତା ଅତନୁ ସବ୍ୟସାଚୀ ନାୟକ ।
ରାଜ୍ୟରୁ ୨୦ ଜଣ ସାଂସଦ ବିଜେପିରୁ ଲୋକସଭାକୁ ନିର୍ବାଚିତ ହୋଇଛନ୍ତି ।
ଏହି ପ୍ରସଙ୍ଗରେ ସେମାନେ ନିରବ କାହିଁକି? ଓଡ଼ିଶାର ସ୍ୱାଭିମାନକୁ ଆନ୍ଧ୍ର ପାଖରେ ବନ୍ଧା ପକାଇଛନ୍ତି କି? ରେଲୱେ ବୋର୍ଡର ଏହି ନିଷ୍ପତ୍ତିକୁ ସମ୍ପୂର୍ଣ୍ଣ ପ୍ରତ୍ୟାହାର କରିବା ପାଇଁ ଦାବି କରିଛି ବିଜେଡି । ନହେଲେ ଓଡ଼ିଶାର ସ୍ୱାର୍ଥ ପାଇଁ ବିଜେଡି ଜୋରଦାର ଆନ୍ଦୋଳନ କରିବ ବୋଲି କହିଛନ୍ତି ଅତନୁ ସବ୍ୟସାଚୀ ।
ରେଳବାଇ କ୍ଷେତ୍ରରେ କେନ୍ଦ୍ର ସରକାରଙ୍କ ଏ ନିଷ୍ପତ୍ତି ପ୍ରତ୍ୟେକ ଓଡ଼ିଆଙ୍କ ପାଇଁ ଦୁର୍ଭାଗ୍ୟଜନକ। ଅଧିକ ରାଜସ୍ବ ଦେଉଥିବା ପୂର୍ବତଟ ରେଳପଥକୁ ପଙ୍ଗୁ କରିବାକୁ କିଛି ବର୍ଷ ହେଲା ଉଦ୍ୟମ ଚାଲିଛି। ବିଜେଡି ଏହାର ପ୍ରତିବାଦରେ ଆନ୍ଦୋଳନକୁ ଓହ୍ଲାଇବାକୁ ସେ ଚେତାବନୀ ଦେଇଛନ୍ତି।
କଂଗ୍ରେସ ବି ରାଜ୍ୟ ସରକାରଙ୍କ ଉପରେ ବର୍ଷିଛି। ରାଜ୍ୟ ସରକାର କେତେବେଳେ ଓଡିଶାକୁ ଆନ୍ଧ୍ରରେ ମିଶାଇ ଦେବେ ତାହା କହି ହେବନାହିଁ ବୋଲି କଟାକ୍ଷ କରିଛନ୍ତି ପୂର୍ବତନ ପିସିସି ସଭାପତି ଜୟଦେବ ଜେନା। ଓଡିଶା ଠାରୁ ଅଲଗା ହୋଇ ପଲାସା ବିଶାଖାପାଟଣା ଜୋନକୁ ଚାଲିଯାଉଛି। କିନ୍ତୁ ରାଜ୍ୟ ସରକାର ନିରୁପାୟ। ଯଦି ଇଷ୍ଟ କୋଷ୍ଟ ରେଲୱେ ଅଞ୍ଚଳ ଅନ୍ୟ ଡିଭିଜନକୁ ଯିବ ତେବେ ତେବେ ଅନ୍ୟ ରେଲୱେର ଡିଭିଜନ ଅଂଶ କାହିଁକି ଇଷ୍ଟ କୋଷ୍ଟ ରେଲୱେ ଅଧୀନକୁ ଆସିବ ନାହିଁ ବୋଲି ସେ ପ୍ରଶ୍ନ କରିଛନ୍ତି।
ଏହି ନିଷ୍ପତ୍ତି ପ୍ରତ୍ୟାହାର ନକଲେ କଂଗ୍ରେସ ଆନ୍ଦୋଳନକୁ ଓହ୍ଲାଇବ ବୋଲି ଚେତାବନୀ ଦେଇଛି କଂଗ୍ରେସ। ବିଜେପି କହିଛି, ପଲ୍ଲାସା- ଇଚ୍ଛାପୁରମ ଡିଭିଜନ ଅନ୍ୟତ୍ର ଯାଉଥିବା ଗଣମାଧ୍ୟମରୁ ଜାଣିଲୁ। ଏଭଳି ହେଲେ ଓଡିଶା ରାଜସ୍ବ ହରେଇବ। ଏହା କିପରି ନ ଯିବ ଆମ ସରକାର ପ୍ରଚେଷ୍ଟା କରିବେ ବୋଲି କହିଛନ୍ତି ବିଜେପି ବିଧାୟକ ପୂର୍ଣ୍ଣଚନ୍ଦ୍ର ସେଠୀ। ଏନେଇ କେନ୍ଦ୍ରମନ୍ତ୍ରୀଙ୍କୁ ଜଣାଇ ଆମ ସ୍ୱାର୍ଥ ପାଇଁ କହିବୁ ବୋଲି ସେ କହିଛନ୍ତି।