ସୂଚନା ଅନୁଯାୟୀ, ବିଏସ୍‌ଏଫ୍‌ ଜଣେ ବାଂଲାଦେଶୀ ନାଗରିକଙ୍କୁ ଅଟକ ରଖି ସୀମା ଆରପାରିକୁ ପଠାଇବାକୁ ଚେଷ୍ଟା କରୁଥିବା ସମୟରେ ଉତ୍ତେଜନା ସୃଷ୍ଟି ହୋଇଥିଲା। ସୀମାରେ ବିଜିବି ସମ୍ପୃକ୍ତ ବ୍ୟକ୍ତିଙ୍କୁ ଗ୍ରହଣ କରିବାକୁ ମନା କରିଦେଇଥିଲା। ଅନ୍ତର୍ଜାତୀୟ ସୀମାର ଉଭୟ ପାର୍ଶ୍ୱରେ ବହୁ ସଂଖ୍ୟକ ସ୍ଥାନୀୟ ବାସିନ୍ଦା ଏକାଠି ହେବା ପରେ ପରିସ୍ଥିତି ଆହୁରି ଖରାପ ହୋଇଥିଲା। ଭିଡ଼ ଉତ୍ତେଜିତ ହେବା ସହିତ ଉଭୟ ପାର୍ଶ୍ୱରୁ ପଥରମାଡ଼ ହୋଇଥିଲା।

ପରିସ୍ଥିତି ନିୟନ୍ତ୍ରଣକୁ ଆଣିବା ପାଇଁ ଅଞ୍ଚଳରେ ନିୟୋଜିତ ସୁରକ୍ଷା କର୍ମୀମାନେ ଅତିରିକ୍ତ ସତର୍କତା ଅବଲମ୍ବନ କରିଥିଲେ। କୌଣସି ବଡ଼ କ୍ଷତି ରିପୋର୍ଟ ହୋଇନାହିଁ। ବିଏସ୍‌ଏଫ୍‌ ଓ ବିଜିବି ମଧ୍ୟରେ ଗତ ୮ ତାରିଖରୁ ୧୧ ତାରିଖ ପର୍ଯ୍ୟନ୍ତ ନୂଆଦିଲ୍ଲୀର ବିଏସ୍‌ଏଫ୍‌ ମୁଖ୍ୟାଳୟଠାରେ ୫୭ତମ ମହାନିର୍ଦେଶକ ସ୍ତରୀୟ ସୀମା ସମନ୍ୱୟ ସମ୍ମିଳନୀ ଶେଷ ହୋଇଛି। ଭାରତୀୟ ପ୍ରତିନିଧିମଣ୍ଡଳର ନେତୃତ୍ୱ ବିଏସଏଫ ମହାନିର୍ଦେଶକ ପ୍ରବୀଣ କୁମାର ନେଇଥିବା ବେଳେ ବାଂଲାଦେଶ ପ୍ରତିନିଧିମଣ୍ଡଳର ନେତୃତ୍ୱ ବିଜିବି ମହାନିର୍ଦେଶକ ମେଜର ଜେନେରାଲ ମହମ୍ମଦ ଆଶରଫଉଜାମାନ ସିଦ୍ଦିକି ନେଇଥିଲେ।

ଅନୁପ୍ରବେଶ, ଚୋରାଚାଲାଣ ଓ ଅନ୍ୟାନ୍ୟ ଅବୈଧ ସୀମାପାର କାର୍ଯ୍ୟକଳାପ ସମ୍ପର୍କରେ ବୈଠକରେ ଆଲୋଚନା ହୋଇଥିଲା। ସମ୍ମିଳନୀରେ ଉଭୟ ପକ୍ଷ ସାମ୍ପ୍ରତିକ ସୀମା ପରିସ୍ଥିତି ସମୀକ୍ଷା କରିଥିଲେ ଓ ସୁରକ୍ଷା ସମ୍ବନ୍ଧୀୟ ବିଭିନ୍ନ ପ୍ରସଙ୍ଗ ଉପରେ ଆଲୋଚନା କରିଥିଲେ। ନିଶାଦ୍ରବ୍ୟ ଚାଲାଣ, ଅସ୍ତ୍ରଶସ୍ତ୍ର ଚୋରାଚାଲାଣ, ନକଲି ଭାରତୀୟ ମୁଦ୍ରା ନୋଟ୍ ପ୍ରସାରଣ, ସୁନା ଚୋରାଚାଲାଣ, ନିଷିଦ୍ଧ ସାମଗ୍ରୀର ଅବୈଧ ପରିବହନ, ମାନବ ଚାଲାଣ ଓ ଅନ୍ୟାନ୍ୟ ଅବୈଧ ସୀମାପାର କାର୍ଯ୍ୟକଳାପ ନେଇ ଆଲୋଚନା ହୋଇଥିଲା। ଏହି ସବୁ ପ୍ରସଙ୍ଗର ମୁକାବିଲା କରିବା ପାଇଁ ଦୃଢ଼ ଓ ମିଳିତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାର ଆବଶ୍ୟକତା ଥିବା ଉଭୟ ଦେଶର ଅଧିକାରୀମାନେ ସ୍ୱୀକାର କରିଥିଲେ। ସୀମାପାର ଅପରାଧ ବିରୋଧରେ 'ଶୂନ୍ୟ ସହନଶୀଳତା' ନୀତି କାର୍ଯ୍ୟକାରୀ କରିବା, ଅନୁପ୍ରବେଶ, ଚୋରା ଚାଲାଣ, ଉଗ୍ରବାଦୀ କାର୍ଯ୍ୟକଳାପ ଓ ସୀମା ସୁରକ୍ଷା ପ୍ରତି ଅନ୍ୟ ଯେକୌଣସି ବିପଦ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବିଏସ୍‌ଏଫ୍‌ ଓ ବିଜିବି ସେମାନଙ୍କର ପ୍ରତିବଦ୍ଧତାକୁ ଦୋହରାଇଲେ। ଉଭୟ ପକ୍ଷ ମିଳିତ ପାଟ୍ରୋଲିଂକୁ ସୁଦୃଢ଼ କରିବା, ସୀମାରେ ନଜର ରଖିବା ବୃଦ୍ଧି କରିବା, ଗୁପ୍ତ ସୂଚନା ଆଦାନପ୍ରଦାନ କରିବା ଓ ଅନ୍ତର୍ଜାତୀୟ ଅପରାଧୀ ସିଣ୍ଡିକେଟ୍ ବିରୋଧରେ ସମନ୍ୱିତ ଅପରେସନ୍ କରିବା ପାଇଁ ମଧ୍ୟ ସହମତ ହୋଇଛନ୍ତି। ପରବର୍ତ୍ତୀ ନିର୍ଦେଶକସ୍ତରୀୟ ବୈଠକ ନଭେମ୍ବରରେ ଢାକାରେ ଅନୁଷ୍ଠିତ ହେବାର ପ୍ରସ୍ତାବ ରହିଛି।