ହିତାଧିକାରୀଙ୍କୁ ଘର ହସ୍ତାନ୍ତର ପୂର୍ବରୁ ଘରକାନ୍ଥ ଫାଟି ଆଁ କରିଛି । ଫଳରେ ଏହି କଲୋନୀରେ ରହିବାକୁ ରାଜି ହେଉନାହାନ୍ତି ମାଙ୍କିଡ଼ିଆ ଲୋକ ।

କାଳିଆପାଣି ଖଣି ଅଞ୍ଚଳର ମହ୍ଲାରସାହି । ଏହି ଅଞ୍ଚଳରେ କାହିଁ କେଉଁ କାଳରୁ ବସବାସ କରୁଛନ୍ତି ମାଙ୍କିଡିଆ ଆଦିବାସୀ । ଆର୍ଥିକ ଅବସ୍ଥା ସ୍ବଚ୍ଛଳ ନଥିବାରୁ ସେମାନେ ଅତି ଦୟନୀୟ ଅବସ୍ଥାରେ ଭଙ୍ଗା କୁଡିଆରେ ରହୁଛନ୍ତି । ତେଣୁ ପୂର୍ବ ସରକାର ସୁକିନ୍ଦା ବ୍ଲକ ରାଁସୋଳ ପଞ୍ଚାୟତର କୁସୁମୁଣ୍ଡିଆରେ ଏକ କଲୋନୀ ନିର୍ମାଣ ଆରମ୍ଭ କରିଥିଲେ । ଏନେଇ ପ୍ରଥମ ପର୍ଯ୍ୟାୟ ଟେଣ୍ଡରରେ ୩ କୋଟି ୨୫ ଲକ୍ଷ ଟଙ୍କାର କାର୍ଯ୍ୟାଦେଶ ହୋଇଥିଲା । ପ୍ରକଳ୍ପ ଅବଧି ୨୦୧୯ ମସିହା ଫେବୃଆରି ୨୨ ତାରିଖରୁ ୨୦୨୦ ମସିହା ଫେବୃଆରି ୨୧ ପର୍ଯ୍ୟନ୍ତ ଥିଲା । ହେଲେ ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହେବା ପୂର୍ବରୁ ନିମ୍ନମାନର କାର୍ଯ୍ୟ ଦେଖିବାକୁ ମିଳିଥିଲା । ଏନେଇ ସମ୍ପୃକ୍ତ ଠିକାଦାରଙ୍କୁ କଳା ତାଲିକାଭୁକ୍ତ କରି କାର୍ଯ୍ୟାଦେଶ ବାତିଲ କରାଯାଇଥିଲା । ଏହାପରେ ଦ୍ଵିତୀୟ ପର୍ଯ୍ୟାୟରେ ଆଉ ୨ କୋଟି ୫୦ ଲକ୍ଷ ଟଙ୍କା ବ୍ୟୟ ଅଟକଳ ହୋଇଥିଲା । ଏବେ କଲୋନୀର ୭୫ଟି ଅସଂପୂର୍ଣ୍ଣ ଘରକୁ ସଂପୂର୍ଣ୍ଣ କରାଯିବା ସହ ଆଉ ୧୧ଟି ଘର ନୂଆ ତିଆରି ହୋଇଛି । ଏହା ସହ ଶୌଚାଳୟ ଓ ଗୋଷ୍ଠୀକେନ୍ଦ୍ର ନିର୍ମାଣ ଜାରି ରହିଛି ।

ତେବେ ସଦ୍ୟ ମରାମତି ଓ ରଙ୍ଗବୋଳା ଘର ଗୁଡ଼ିକର କାନ୍ଥରେ ଫାଟ ସୃଷ୍ଟି ହୋଇଥିବାରୁ କଲୋନୀର ସ୍ଥାୟିତ୍ୱ ନେଇ ପ୍ରଶ୍ନ ଉଠିଛି । ବଡ଼ ପରିବାର ପାଇଁ ଏହି ଛୋଟ ଘର ପର୍ଯ୍ୟାପ୍ତ ନୁହେଁ ଏବଂ ଅନ୍ୟାନ୍ୟ ସମସ୍ୟା ସବୁ ରହିଛି । ଘର ଗୁଡିକର ଏପରି ଅବସ୍ଥା ଦେଖି ମାଙ୍କିଡ଼ିଆ ଲୋକମାନେ ଏଠାରେ ରହିବାକୁ ରାଜି ହେଉନାହାନ୍ତି । ତେଣୁ ସରକାର ଯଦି ଘର ଦେବାକୁ ଚାହୁଁଛନ୍ତି, ତେବେ ବର୍ଷ ବର୍ଷ ଧରି ସେମାନେ ରହୁଥିବା ମହ୍ଲାରସାହିରେ ହିଁ ଥଇଥାନ କରନ୍ତୁ ବୋଲି ମାଙ୍କିଡିଆ ଲୋକେ ଦାବି କରିଛନ୍ତି । ଏହାର ତଦନ୍ତ କରାଯାଇ ସମାଧାନ କରାଯିବା ସହ ମାଙ୍କିଡିଆ ଆଦିବାସୀଙ୍କ ପାଇଁ ରହିବା ବ୍ୟବସ୍ଥା କରାଯିବ ବୋଲି ସମବାୟ ମନ୍ତ୍ରୀ ପ୍ରଦୀପ ବଳ ସାମନ୍ତ କହିଛନ୍ତି । ସରକାର ତୁରନ୍ତ ମାଙ୍କିଡିଆ ଆଦିବାସୀଙ୍କ ଦାବିକୁ ବିଚାର କରି ସେମାନଙ୍କ ଥଇଥାନ ବ୍ୟବସ୍ଥା କରାଯିବା ଜରୁରୀ ହୋଇପଡ଼ିଛି ।