ନନ୍ଦିଘୋଷ ବ୍ୟୁରୋ: ସ୍ମାର୍ଟ ଫୋନ ଠାରୁ ଆରମ୍ଭ କରି ସ୍ମାର୍ଟ କାର୍ ପର୍ଯ୍ୟନ୍ତ-ଆଜିର ଆଧୁନିକ ଜୀବନଶୈଳୀ ସମ୍ପୂର୍ଣ୍ଣ ଭାବେ ଏକ କ୍ଷୁଦ୍ର ଚିପ୍ ବା ସେମିକଣ୍ଡକ୍ଟର ଉପରେ ନିର୍ଭରଶୀଳ। ଏହି କ୍ଷେତ୍ରରେ ବିଶ୍ୱ ବଜାରକୁ ନିୟନ୍ତ୍ରଣ କରିବା ପାଇଁ ନୀତି ଆୟୋଗ ଏକ ଦୂରଦୃଷ୍ଟିସମ୍ପନ୍ନ ମାଷ୍ଟରପ୍ଲାନ୍ "ଭାରତର ସେମିକଣ୍ଡକ୍ଟର ଶିଳ୍ପର ଭବିଷ୍ୟତ" ଉନ୍ମୋଚନ କରିଛି।

ଏହାର ମୂଳ ଲକ୍ଷ୍ୟ ହେଉଛି ୨୦୩୫ ସୁଦ୍ଧା ଚିପ୍ ଆମଦାନୀ ଉପରେ ବିଦେଶୀ ନିର୍ଭରଶୀଳତାକୁ ସମ୍ପୂର୍ଣ୍ଣ ଶେଷ କରି ଭାରତକୁ ଏକ ଗ୍ଲୋବାଲ୍ ଲିଡର୍ ଭାବେ ଗଢ଼ି ତୋଳିବା।

ନୀତି ଆୟୋଗର ରିପୋର୍ଟ ଅନୁଯାୟୀ, ଭାରତ କେବଳ ଏକ ସାଧାରଣ ଚିପ୍ ବଜାର ହୋଇ ରହିବ ନାହିଁ, ବରଂ ଅନ୍ୟ ଦେଶର ଅନୁକରଣ ନକରି ନିଜର ରଣନୈତିକ ଶକ୍ତି ବଳରେ ବିଶ୍ୱ ଯୋଗାଣ ଶୃଙ୍ଖଳା (Supply Chain) ର କେନ୍ଦ୍ରବିନ୍ଦୁ ସାଜିବ।

ଲକ୍ଷ୍ୟ: ୨୦୩୫ ସୁଦ୍ଧା ଦେଶ ମଧ୍ୟରେ $୧୨୦ ରୁ $୧୫୦ ବିଲିୟନ ମୂଲ୍ୟର ଏକ ବିଶାଳ ସେମିକଣ୍ଡକ୍ଟର ମୂଲ୍ୟ ଶୃଙ୍ଖଳା (Value Chain) ପ୍ରସ୍ତୁତ କରିବା।

ବର୍ତ୍ତମାନ ଭାରତର ଘରୋଇ ସେମିକଣ୍ଡକ୍ଟର ଆବଶ୍ୟକତାର ପ୍ରାୟ ୯୦ ରୁ ୯୫ ପ୍ରତିଶତ ଆମଦାନୀ କରାଯାଉଛି। ରିପୋର୍ଟ ଅନୁଯାୟୀ, ୨୦୩୫ ସୁଦ୍ଧା କେବଳ ଭାରତରେ ଚିପ୍ ଚାହିଦା $୨୦୦ ବିଲିୟନ ଅତିକ୍ରମ କରିବ।

ଆହ୍ୱାନ: ଯଦି ଏହି ବିଶାଳ ଚାହିଦା ପାଇଁ ଆମେ ବିଦେଶ ଉପରେ ନିର୍ଭର କରିବା, ତେବେ ଦେଶର ବହୁମୂଲ୍ୟ ବୈଦେଶିକ ମୁଦ୍ରା ଶେଷ ହେବା ସହ ଗ୍ଲୋବାଲ୍ ସପ୍ଲାଇ ଚେନ୍‌ରେ ସମସ୍ୟା ଦେଖାଦେଲେ ଭାରତର ପ୍ରତିରକ୍ଷା ଓ ଟେକ୍ନୋଲୋଜି କ୍ଷେତ୍ର ସ୍ଥଗିତ ହୋଇଯିବାର ଆଶଙ୍କା ରହିଛି।

ସମାଧାନ: ଏହି ସଙ୍କଟରୁ ବର୍ତ୍ତିବା ପାଇଁ ଘରୋଇ ଉତ୍ପାଦନ ବୃଦ୍ଧି କରିବା ହିଁ ଏକମାତ୍ର ବିକଳ୍ପ।

ଭାରତରେ ଚିପ୍ ଡିଜାଇନ୍, ପ୍ରଡକ୍ସନ୍ ଏବଂ ଆଡଭାନ୍ସଡ୍ ପ୍ୟାକେଜିଂ ଭିତ୍ତିଭୂମି ପ୍ରସ୍ତୁତ କରିବା ପାଇଁ ଆଗାମୀ ଦଶ ବର୍ଷ ମଧ୍ୟରେ ପ୍ରାୟ $୧୩୫ ରୁ $୧୮୦ ବିଲିୟନର ପୁଞ୍ଜି ଆବଶ୍ୟକ।

ନୀତି ଆୟୋଗର ଗୁରୁତ୍ୱପୂର୍ଣ୍ଣ ସୁପାରିଶ: ଘରୋଇ ଓ ବିଦେଶୀ ନିବେଶକଙ୍କ ମଧ୍ୟରେ ଆତ୍ମବିଶ୍ୱାସ ବଢ଼ାଇବା ଏବଂ ପ୍ରକଳ୍ପ ଜନିତ ବିପଦକୁ ହ୍ରାସ କରିବା ପାଇଁ ଭାରତ ସରକାର ଏହି ମୋଟ ଖର୍ଚ୍ଚର ଅତିକମରେ ଏକ-ତୃତୀୟାଂଶ (1/3rd) ପାଣ୍ଠି ନିଜେ ବହନ କରନ୍ତୁ। ଏହାଦ୍ୱାରା ବଡ଼ ବଡ଼ କମ୍ପାନୀଗୁଡ଼ିକ ଭାରତରେ ଦୀର୍ଘକାଳୀନ ନିବେଶ କରିବାକୁ ଆଗ୍ରହୀ ହେବେ।