ସସ୍ମିତ ପାତ୍ର, ଦେବାଶିଷ ସାମନ୍ତରାୟ, ମାନସ ମଙ୍ଗରାଜ, ସୁଲତା ଦେଓ, ଶୁଭାଶିଷ ଖୁଣ୍ଟିଆ ଓ ସଂତୃପ୍ତ ମିଶ୍ର। ୨୦୨୨ ମସିହାରୁ ସସ୍ମିତ ବିଜେଡିର ସଂସଦୀୟ ଦଳ ନେତା ରହିଛନ୍ତି। ସଂତୃପ୍ତ ରାଜ୍ୟସଭାରେ ଶପଥ ଗ୍ରହଣ କରିବା ଦିନ ହିଁ ସାଂସଦମାନେ ସସ୍ମିତଙ୍କୁ ହଟାଇବାକୁ ସଭାପତିଙ୍କୁ ପତ୍ର ଲେଖିବା ଘଟଣା ବେଶ୍ ଚର୍ଚ୍ଚାର ବିଷୟ ହୋଇଛି। ହଠାତ୍‌ କେଉଁ ପରିସ୍ଥିତିରେ ସାଂସଦମାନେ ସସ୍ମିତଙ୍କ ବିରୋଧରେ ମେଳି କଲେ ତାହା ରହସ୍ୟଜନକ ହୋଇପଡ଼ିଛି। କିନ୍ତୁ ସସ୍ମିତ କିମ୍ବା ଅନ୍ୟ ସାଂସଦମାନେ ଏ ସମ୍ପର୍କରେ କିଛି ପ୍ରତିକ୍ରିୟା ଦେଉ ନାହାନ୍ତି।

ଗତବର୍ଷ ୱକଫ୍‌ ବିଲ୍‌ ପ୍ରସଙ୍ଗରେ ବିଲ୍‌ ବିରୋଧରେ ବିଜେଡି ଭୋଟ୍‌ ଦେବ ବୋଲି ପୂର୍ବରୁ କୁହାଯାଇଥିଲେ ବି ଶେଷ ମୁହୂର୍ତ୍ତରେ ସାଂସଦମାନଙ୍କ ବିବେକ ଉପରେ ନିଷ୍ପତ୍ତି ଛାଡ଼ି ଦିଆଯାଇଥିଲା। କେନ୍ଦ୍ର ସରକାରଙ୍କୁ ସୁହାଇଲା ପରି ଭୋଟ ଦେବାକୁ ଭିକେ ପାଣ୍ଡିଆନଙ୍କ ନିର୍ଦ୍ଦେଶରେ ସସ୍ମିତ ପାତ୍ର ଏପରି ନିଷ୍ପତ୍ତି ନେଇଥିବା ଅଭିଯୋଗ ହୋଇଥିଲା। ଦେବାଶିଷ ସାମନ୍ତରାୟ ଏହାକୁ ତୀବ୍ର ବିରୋଧ କରିବା ସହ ଉଭୟ ସସ୍ମିତ ଓ ପାଣ୍ଡିଆନଙ୍କ ଉପରେ ବର୍ଷିଥିଲେ।‌ ସେ ନିଜେ ମଧ୍ୟ ଭୋଟ ଦାନରୁ ବିରତ ରହିଥିଲେ। କେବଳ ମୁନା ଖାନ୍ ବିଲ୍‌ ବିରୋଧରେ ଭୋଟ ଦେଇଥିଲା ବେଳେ ଅନ୍ୟମାନେ ବିଲ୍‌ ସପକ୍ଷରେ ଯାଇଥିଲେ। ଏହି ପ୍ରସଙ୍ଗରେ ସସ୍ମିତ ସମାଲୋଚିତ ହୋଇଥିଲେ ବି ବାସ୍ତବରେ ନବୀନ ନିବାସରେ ହୋଇଥିବା ନିଷ୍ପତ୍ତିକୁ ହିଁ ସେ କାର୍ଯ୍ୟକାରୀ କରାଇଥିଲେ। କିନ୍ତୁ ବର୍ଷକ ପରେ ହଠାତ ତାଙ୍କ ବିରୋଧରେ ଏପରି ମେଳି ବିଜେଡିର ଆଭ୍ୟନ୍ତରୀଣ ରାଜନୀତିକୁ ସରଗରମ କରିଛି।