ଆଲେକ୍ସ ଏବଂ ଆମେଲିଆ ନାମକ ଏହି ଦମ୍ପତି, ଯେଉଁମାନେ ଇନଷ୍ଟାଗ୍ରାମରେ ନିଜ ଭ୍ରମଣ କାହାଣୀ ସେୟାର କରନ୍ତି, ସେମାନେ ନିକଟରେ ଭାରତରେ ୩୦ ଦିନ ରହିବା ପାଇଁ ହୋଇଥିବା ଖର୍ଚ୍ଚର ଏକ ବିସ୍ତୃତ ହିସାବ ପ୍ରଦାନ କରିଛନ୍ତି । ଯାତ୍ରା ଶେଷ ବେଳକୁ ସେମାନଙ୍କ ମୋଟ ଖର୍ଚ୍ଚ ୧୦,୬୦୫ ଡଲାର, ଅର୍ଥାତ୍ ପ୍ରାୟ ୧୦ ଲକ୍ଷ ଟଙ୍କା ହୋଇଥିଲା। ଏପରିକି ଏତେ ଅଧିକ ଟଙ୍କା ଖର୍ଚ୍ଚ ହୋଇଥିବା ଦେଖି ସେମାନେ ନିଜେ ମଧ୍ୟ ଆଶ୍ଚର୍ଯ୍ୟ ହୋଇଯାଇଥିଲେ।

ଇନଷ୍ଟାଗ୍ରାମରେ ଏହି ହିସାବ ସେୟାର କରି ଦମ୍ପତି କହିଛନ୍ତି ଯେ, ସେମାନେ ଭାରତରେ ୩୦ ଦିନ ରହିବା ପାଇଁ ମୋଟ ୧୦,୬୦୫ ଡଲାର (୧୦ ଲକ୍ଷ ଟଙ୍କା) ଖର୍ଚ୍ଚ କରିଛନ୍ତି। ସେମାନେ ଲେଖିଛନ୍ତି, “ଭାରତରେ ଆମର ୩୦ ଦିନିଆ ଯାତ୍ରା ପାଇଁ ଆମେ ମୋଟ ୧୦,୬୦୫ ଡଲାର (୧୦ ଲକ୍ଷ ଟଙ୍କା) ଖର୍ଚ୍ଚ କରିଛୁ। ଏହାର ଅର୍ଥ ଦୈନିକ ପ୍ରାୟ ୩୫୪ ଡଲାର (୩୩,୬୨୭ ଟଙ୍କା) ଖର୍ଚ୍ଚ ହୋଇଛି।” ଏହି ଦମ୍ପତିଙ୍କ କହିବା ଅନୁସାରେ, ସାରା ଯାତ୍ରା ସମୟରେ ଯିବା ଆସିବା ବାବଦରେ ସବୁଠାରୁ ଅଧିକ ଖର୍ଚ୍ଚ ହୋଇଥିଲା।

“ଆମେ ମାତ୍ର ୩୦ ଦିନରେ ୧୩ଟି ସହର ବୁଲିଥିଲୁ। ଏଥିପାଇଁ ଆମକୁ ଯାତ୍ରା ପଛରେ ବହୁତ ସମୟ ଦେବାକୁ ପଡ଼ିଥିଲା ଏବଂ ଶେଷରେ ଏହା ଆମର ସବୁଠାରୁ ବଡ଼ ଖର୍ଚ୍ଚର କାରଣ ପାଲଟିଥିଲା।” ଏଣେତେଣେ ବୁଲିବା ପାଇଁ ସେମାନେ ୬ଟି ବିମାନ, ୬ଟି ପ୍ରାଇଭେଟ୍ କାର୍ ଏବଂ ୨ଟି ଟ୍ରେନ୍ ଯାତ୍ରା କରିଥିଲେ। ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ବାରମ୍ବାର ଯାତ୍ରା କରିବା ଯୋଗୁଁ ସେମାନଙ୍କ ମୋଟ ଖର୍ଚ୍ଚ ବହୁତ ବଢ଼ିଯାଇଥିଲା।

ରହିବା ବ୍ୟବସ୍ଥା ମଧ୍ୟ ସେମାନଙ୍କ ଖର୍ଚ୍ଚକୁ ବଢ଼ାଇବାରେ ବଡ଼ ଭୂମିକା ଗ୍ରହଣ କରିଥିଲା। ଦମ୍ପତି କହିଛନ୍ତି ଯେ, ସେମାନେ ଶସ୍ତା ହୋଟେଲ ପରିବର୍ତ୍ତେ ଦାମୀ ହୋଟେଲ ବାଛିଥିଲେ। ସେଥିପାଇଁ ସେମାନଙ୍କୁ ପ୍ରତି ରାତି ପାଇଁ ପ୍ରାୟ ୧୨୭ ଡଲାର (୧୨,୦୬୪ ଟଙ୍କା) ଖର୍ଚ୍ଚ କରିବାକୁ ପଡ଼ିଥିଲା।

ସେମାନେ କହିଛନ୍ତି, “ଯଦି ଆପଣ କେବଳ ଶସ୍ତା ବିକଳ୍ପ ଖୋଜୁ ନାହାଁନ୍ତି, ତେବେ ଅନ୍ୟ ଭ୍ରମଣକାରୀମାନେ କହିବା ପରି ରହିବା ଖର୍ଚ୍ଚ ଏତେ କମ୍ ନୁହେଁ।” ଖାଦ୍ୟପେୟ ବାବଦରେ ମଧ୍ୟ ବହୁତ ଟଙ୍କା ଖର୍ଚ୍ଚ ହୋଇଥିଲା। ଦମ୍ପତି କହିଛନ୍ତି ଯେ, ସେମାନେ ପ୍ରତିଦିନ ସକାଳ, ଦ୍ୱିପହର ଏବଂ ରାତିରେ ବାହାରେ ଖାଉଥିବାରୁ ମାସ ଶେଷକୁ ଖର୍ଚ୍ଚ ଆହୁରି ବଢ଼ିଯାଇଥିଲା।

ଯାତ୍ରାକୁ ମନେ ପକାଇ ସେମାନେ ସ୍ୱୀକାର କରିଛନ୍ତି ଯେ, ଶେଷ ମୋଟ ଖର୍ଚ୍ଚ ସେମାନଙ୍କ ଆଶାଠାରୁ ଅଧିକ ଥିଲା। “ଆମେ ଯଦି କହିବୁ ଯେ ଖର୍ଚ୍ଚର ହିସାବ ଦେଖି ଆମେ ଆଶ୍ଚର୍ଯ୍ୟ ହୋଇନଥିଲୁ, ତେବେ ତାହା ମିଛ ହେବ। ଭାରତରେ ଏକ ମାସ ରହିବା ଭିତରେ ଆମେ କେତେ ଟଙ୍କା ଖର୍ଚ୍ଚ କରିଛୁ, ତାହା ଦେଖି ଆମେ ନିଜେ ବି ଆଶ୍ଚର୍ଯ୍ୟ ହୋଇଥିଲୁ।”

ଏହି ପୋଷ୍ଟଟି ସୋସିଆଲ ମିଡିଆରେ ଶୀଘ୍ର ଚର୍ଚ୍ଚାର ବିଷୟ ହୋଇଥିଲା। ଲୋକମାନେ ଏହାକୁ ଦେଖି ଆଶ୍ଚର୍ଯ୍ୟ ହେବା ସହ ମଜାଳିଆ ମନ୍ତବ୍ୟ ମଧ୍ୟ ଦେଇଥିଲେ।କିଛି ଲୋକ ଭାବିଥିଲେ ଯେ, ଭାରତ ଭ୍ରମଣ ପାଇଁ ଏହି ଟଙ୍କା ବହୁତ ଅଧିକ। ଜଣେ ୟୁଜର୍ କମେଣ୍ଟ କରିଛନ୍ତି, “ବାଃ, ଆପଣ ନିଶ୍ଚିତ ଭାବେ ରାଜାମହାରାଜାଙ୍କ ଭଳି ଜୀବନ କଟାଇଛନ୍ତି, ଯଦି ମାତ୍ର ଗୋଟିଏ ମାସରେ ଏତେ ଟଙ୍କା ଖର୍ଚ୍ଚ କରିପାରିଛନ୍ତି।” ଅନ୍ୟପଟେ କିଛି ଲୋକ କହିଛନ୍ତି ଯେ, ଦମ୍ପତି କେବେବି କମ୍ ଖର୍ଚ୍ଚରେ ବୁଲିବା କଥା କହିନଥିଲେ।

“ଯେଉଁମାନେ ଏତେ ଉତ୍ତେଜିତ ହେଉଛନ୍ତି, ସେମାନେ ନିଶ୍ଚୟ ଆପଣଙ୍କ ପ୍ରୋଫାଇଲର ପ୍ରଥମ ପିନ୍ ହୋଇଥିବା ପୋଷ୍ଟଟି ପଢ଼ି ନଥିବେ। ସେଥିରେ ସ୍ପଷ୍ଟ ଭାବେ ଲେଖା ଅଛି ଯେ ଆପଣମାନେ ବର୍ଷେ ଧରି ବୁଲିବା ପାଇଁ ଯାତ୍ରା ଆରମ୍ଭ କରିବା ପୂର୍ବରୁ ୧ ଲକ୍ଷ ଡଲାର ସଞ୍ଚୟ କରିଥିଲେ। ଆପଣମାନେ କଷ୍ଟରେ ବଞ୍ଚିବା କିମ୍ବା ଟଙ୍କା ବଞ୍ଚାଇବାକୁ ଚେଷ୍ଟା କରୁନାହାଁନ୍ତି!”

ଅନେକ ଲୋକ ମତ ଦେଇଛନ୍ତି ଯେ, ଯଦି ପର୍ଯ୍ୟଟକମାନେ କମ୍ ଖର୍ଚ୍ଚ କରିବା ବଦଳରେ ଦାମୀ ସୁବିଧା ବାଛନ୍ତି, ତେବେ ଯାତ୍ରା ଖର୍ଚ୍ଚ ବହୁତ ଶୀଘ୍ର ବଢ଼ିଯାଏ। “ମୋତେ ଏହା ସ୍ୱାଭାବିକ ଲାଗୁଛି। ଯଦି ଆପଣ ଜଣେ ବ୍ୟାକପ୍ୟାକର୍ ଭଳି ରହିବେ ଏବଂ ସ୍ଥାନୀୟ ଲୋକଙ୍କ ଭଳି ଖାଦ୍ୟ ଖାଇବେ, ତେବେ ଭାରତ ଭ୍ରମଣ ବହୁତ ଶସ୍ତା ହୋଇପାରିବ। କିନ୍ତୁ ଯଦି ଆପଣ ଭଲ ମାନର ହୋଟେଲ, ଭଲ ଖାଦ୍ୟ ଏବଂ ସ୍ୱତନ୍ତ୍ର ଅନୁଭୂତି ପାଇଁ ଚାହିଁବେ, ତେବେ ଖର୍ଚ୍ଚ ନିଶ୍ଚିତ ଭାବେ ବଢ଼ିବ। ବିଶେଷକରି ମହାମାରୀ ପରଠାରୁ ଦରଦାମ୍ ବହୁତ ବଢ଼ିଯାଇଛି।”

ଅବଶ୍ୟ, ସମସ୍ତେ ଏହି ଅଧିକ ଖର୍ଚ୍ଚ ସହ ସହମତ ହୋଇପାରିନାହାଁନ୍ତି। “ବାଃ! ମୁଁ ଭାରତରେ ଦୁଇ ମାସ ରହିଥିଲି, ପ୍ରଥମ ମାସ ପାଇଁ ୫୦୦ ଡଲାର ଏବଂ ଦ୍ୱିତୀୟ ମାସ ପାଇଁ ୭୦୦ ଡଲାର ଖର୍ଚ୍ଚ କରିଥିଲି। ଓଃ! ସେମାନଙ୍କର ଖର୍ଚ୍ଚ ବହୁତ ଅଧିକ।”

ଏହି ଆଲୋଚନା ଦର୍ଶାଉଛି ଯେ ଭ୍ରମଣ ଅନୁଭୂତି କେତେ ଭିନ୍ନ ହୋଇପାରେ। ଯଦିଓ ଭାରତ ଏପରି ଏକ ସ୍ଥାନ ଯେଉଁଠାରେ ପର୍ଯ୍ୟଟକମାନେ ଚାହିଁଲେ ବହୁତ କମ୍ ଖର୍ଚ୍ଚରେ ବୁଲିପାରିବେ, କିନ୍ତୁ ଆରାମଦାୟକ ହୋଟେଲ, ବାରମ୍ବାର ଯାତ୍ରା ଏବଂ ଦାମୀ ସୁବିଧା ବ୍ୟବହାର କରିବା ଦ୍ୱାରା ଖର୍ଚ୍ଚ ଅତି ଶୀଘ୍ର ବହୁତ ବଢ଼ିଯାଇପାରେ।