ଓଡ଼ିଶା ଭାସ୍କର ଡେସ୍କ: ପାଟିରୁ ଦୁର୍ଗନ୍ଧ ଆସିବା ଏକ ସାଧାରଣ ସମସ୍ୟା, କିନ୍ତୁ ଏହା ଯୋଗୁଁ ଲୋକଙ୍କୁ ଅନେକ ସମୟରେ ଅତି ଅପମାନିତ ହେବାକୁ ପଡ଼ିଥାଏ। ଅନେକ ଲୋକଙ୍କର ଅଭିଯୋଗ ଥାଏ ଯେ ସେମାନେ ପ୍ରତିଦିନ ସକାଳେ ଭଲ ଭାବରେ ବ୍ରଶ୍ କରିଥାଆନ୍ତି, କିନ୍ତୁ କାହା ସହ କଥା ହେବା ସମୟରେ ପାଟିରୁ ଦୁର୍ଗନ୍ଧ ବାହାରିଥାଏ। ଏହି ସମସ୍ୟା କେବଳ ଆତ୍ମବିଶ୍ୱାସକୁ ଦୁର୍ବଳ କରେ ନାହିଁ, ବରଂ ଚିନ୍ତାର କାରଣ ମଧ୍ୟ ପାଲଟିଥାଏ।
ପାଟିରୁ କାହିଁକି ଆସେ ଦୁର୍ଗନ୍ଧ: ପାଟିରୁ ଦୁର୍ଗନ୍ଧ ଆସିବାର ସବୁଠାରୁ ବଡ଼ କାରଣ ହେଉଛି ପାଟି ଭିତରେ ଥିବା ବ୍ୟାକ୍ଟେରିଆ। ଦାନ୍ତ ଭିତରେ ଲାଗିରହିଥିବା ଖାଦ୍ୟ ଏବଂ ଜିଭରେ ଜମିଥିବା ମଇଳା ଏହି ବ୍ୟାକ୍ଟେରିଆଗୁଡ଼ିକୁ ବୃଦ୍ଧି କରିବାରେ ସାହାଯ୍ୟ କରିଥାଏ, ଯାହା ଫଳରେ ପାଟିରୁ ଦୁର୍ଗନ୍ଧ ବାହାରିଥାଏ।
ଏହି ସମସ୍ୟାରୁ କିପରି ମୁକ୍ତି ପାଇବେ
- ଧନିଆ ଚୋବାନ୍ତୁ: ଧନିଆରେ ଥିବା ଉପାଦାନ ପାଟିର ଦୁର୍ଗନ୍ଧକୁ ଦୂର କରିବାରେ ସାହାଯ୍ୟ କରିଥାଏ। ପ୍ରତିଦିନ ଖାଦ୍ୟ ଖାଇସାରିବା ପରେ କିଛି ଧନିଆପତ୍ର ଚୋବାଇଲେ ପାଟି ସଫା ହୋଇଥାଏ ଏବଂ ସତେଜତା ଆସିଥାଏ।
- ପାନ ମଧୁରୀ: ଖାଦ୍ୟ ଖାଇବା ପରେ ଅଧା ଚାମଚ ପାନା ମଧୁରୀ ଚୋବାଇବା ଦ୍ୱାରା କେବଳ ପାଟିର ଦୁର୍ଗନ୍ଧ ଦୂର ହୁଏ ନାହିଁ, ବରଂ ହଜମ ଶକ୍ତି ମଧ୍ୟ ଭଲ ରହିଥାଏ।
- ଲେମ୍ବୁ ପାଣିରେ କୁଳି କରନ୍ତୁ: ପ୍ରତିଦିନ ଏକ ଗ୍ଲାସ୍ ପାଣିରେ ଅଧା ଲେମ୍ବୁ ରସ ମିଶାଇ ଦିନକୁ ଦୁଇଥର କୁଳି କରିବା ଦ୍ୱାରା ପାଟିରେ ବ୍ୟାକ୍ଟେରିଆ ବୃଦ୍ଧି ପାଏ ନାହିଁ।
- ଅଦା ରସର ବ୍ୟବହାର: ଏକ ଗ୍ଲାସ୍ ପାଣିରେ ଏକ ଚାମଚ ଅଦା ରସ ମିଶାଇ କୁଳି କଲେ ପାଟିର ବ୍ୟାକ୍ଟେରିଆ ନଷ୍ଟ ହୋଇଯାଏ ଏବଂ ଦୁର୍ଗନ୍ଧ କମିଯାଏ।
ଏହି କଥାଗୁଡ଼ିକ ପ୍ରତି ମଧ୍ୟ ଧ୍ୟାନ ଦିଅନ୍ତୁ:
- ପ୍ରତିଦିନ ଭଲ ଭାବରେ ଜିଭ ସଫା କରନ୍ତୁ।
- ଦିନସାରା ପର୍ଯ୍ୟାପ୍ତ ପରିମାଣରେ ପାଣି ପିଅନ୍ତୁ, କାରଣ ପାଟି ଶୁଖିଗଲେ ଦୁର୍ଗନ୍ଧ ବୃଦ୍ଧି ପାଇଥାଏ।
- ଖାଦ୍ୟ ଖାଇସାରିବା ପରେ ଦାନ୍ତକୁ ଭଲ ଭାବରେ ସଫା କରନ୍ତୁ ଏବଂ ଦିନକୁ ଦୁଇଥର ବ୍ରଶ୍ କରିବାର ଅଭ୍ୟାସ କରନ୍ତୁ।