ଏହି ସମୟରେ, ତେହରାନ ମଧ୍ୟ ଆମେରିକା ରାଷ୍ଟ୍ରପତିଙ୍କ ଧମକର ଜବାବ ଦେଇଛି।

ଜୋଲଫାଘାରି ଲକ୍ଷ୍ୟ ରଖିଛନ୍ତି

IRGC ମୁଖପାତ୍ର ଇବ୍ରାହିମ ଜୋଲଫାଘାରି ଟ୍ରମ୍ପଙ୍କ ଧମକକୁ ଭିତ୍ତିହୀନ ବୋଲି ଖାରଜ କରି ଚେତାବନୀ ଦେଇଛନ୍ତି ଯେ, ଆକ୍ରମଣାତ୍ମକ କାର୍ଯ୍ୟ ଜାରି ରହିବ। ସେ କହିଛନ୍ତି, “ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ‘ଅଶ୍ଳୀଳ ଭାଷଣବାଜି’ ଏବଂ ଅହଂକାର ଏକ ଅଚଳାବସ୍ଥାରୁ ଉତ୍ପନ୍ନ, ଏବଂ ସେମାନଙ୍କର ଉଦ୍ଦେଶ୍ୟ ହେଉଛି ଆମେରିକୀୟ ସାମରିକ ବିଫଳତାକୁ ଯଥାର୍ଥ କରିବା।”

ଜୋଲଫାଘାରି ଆହୁରି ମଧ୍ୟ କହିଛନ୍ତି, “ଏହି ବକ୍ତବ୍ୟଗୁଡ଼ିକ ଆମେରିକା ଏବଂ ଇସ୍ରାଏଲ ବିରୁଦ୍ଧରେ ଚାଲିଥିବା ଆକ୍ରମଣାତ୍ମକ ଏବଂ ନିର୍ଣ୍ଣାୟକ ଅଭିଯାନ ଉପରେ କୌଣସି ପ୍ରଭାବ ପକାଇବ ନାହିଁ ଏବଂ ଏପରି ବୟାନବାଜି ପଶ୍ଚିମ ଏସିଆରେ ଆମେରିକାର ପରାଜୟର କ୍ଷତିପୂରଣ ଦେବ ନାହିଁ।” ସେ ଚେତାବନୀ ଦେଇଥିଲେ ଯେ, ଆମେରିକା ଏବଂ ଇସ୍ରାଏଲ ଦ୍ୱାରା କରାଯାଇଥିବା ପ୍ରତ୍ୟେକ ପଦକ୍ଷେପ ସେମାନଙ୍କର ପୂର୍ବ ପରାଜୟରେ କେବଳ ଆଉ ଏକ ପରାଜୟ ଯୋଡ଼ିବ।

ଖାମେନିଙ୍କ ପ୍ରତିଶୋଧ

ଇରାନର ସର୍ବୋଚ୍ଚ ନେତା ମୋଜତାବା ଖାମେନି ଟେଲିଗ୍ରାମରେ ପୋଷ୍ଟ କରି କହିଛନ୍ତି ଯେ, “ଇରାନ ଉପରେ ସାମରିକ ଆକ୍ରମଣ କିମ୍ବା ଏହାର ସଶସ୍ତ୍ର ବାହିନୀକୁ ଦୁର୍ବଳ କରିବା ପାଇଁ ଚେଷ୍ଟା କେବେ ସଫଳ ହେବ ନାହିଁ।” ସେ ଏହା ମଧ୍ୟ ସ୍ପଷ୍ଟ କରିଥିଲେ ଯେ, ଦେଶ ମଧ୍ୟରେ ହତ୍ୟା ଏବଂ ଅପରାଧ ଇରାନର ସାମରିକ କାର୍ଯ୍ୟକୁ ବାଧା ଦେବ ନାହିଁ।

ଟ୍ରମ୍ପଙ୍କ ଧମକ

ଗତକାଲି, ଟ୍ରମ୍ପ ଧମକ ଦେଇ କହିଥିଲେ ଯେ ଯଦି ଇରାନ ମଙ୍ଗଳବାର ରାତି (୭ ଏପ୍ରିଲ) ସୁଦ୍ଧା ଏକ ସମାଧାନ ପାଇଁ ରାଜି ନହୁଏ, ତେବେ ସେ ଚାରି ଘଣ୍ଟା ମଧ୍ୟରେ ତେହେରାନକୁ ସମ୍ପୂର୍ଣ୍ଣ ଧ୍ୱଂସ କରିଦେବେ। ଏକ ସାମ୍ବାଦିକ ସମ୍ମିଳନୀରେ ଭାଷଣ ଦେଇ ଟ୍ରମ୍ପ ଘୋଷଣା କରିଥିଲେ, “ଆମର ଏକ ଯୋଜନା ଅଛି । ଏବଂ ଏହା ଆମ ସାମରିକ ଶକ୍ତି ଦ୍ୱାରା ସମର୍ଥିତ । ଯାହା ଅଧୀନରେ ଆସନ୍ତାକାଲି (ମଙ୍ଗଳବାର) ରାତି ୧୨:୦୦ ଟା ସୁଦ୍ଧା ଇରାନର ପ୍ରତ୍ୟେକ ସେତୁ ଭାଙ୍ଗି ଦିଆଯିବ । ଇରାନର ପ୍ରତ୍ୟେକ ବିଦ୍ୟୁତ୍ ପ୍ଲାଣ୍ଟ ବନ୍ଦ ହୋଇଯିବ, ପୋଡ଼ି ଦିଆଯିବ, ଉଡ଼ାଇ ଦିଆଯିବ ଏବଂ ସ୍ଥାୟୀ ଭାବରେ ବ୍ୟବହାର ଅଯୋଗ୍ୟ ହୋଇଯିବ। ମୁଁ କହିବାକୁ ଚାହୁଁଛି ଯେ, ଏହା ୧୨ ଟା ସୁଦ୍ଧା ସମ୍ପୂର୍ଣ୍ଣ ଭାବରେ ଭାଙ୍ଗି ଦିଆଯିବ ଏବଂ ଯଦି ଆମେ ଚାହିଁବୁ, ତେବେ ଏହା ଚାରି ଘଣ୍ଟା ମଧ୍ୟରେ କରାଯାଇପାରେ।”