ନୂଆଦିଲ୍ଲୀ: ଭାରତର ଦୁଇଥର ଅଲିମ୍ପିକ୍ ପଦକ ବିଜେତା ଶୁଟର ମନୁ ଭାକର ଯୁବପିଢ଼ିଙ୍କ ମଧ୍ୟରେ ଅଶ୍ଳୀଳ ଓ ଅପମାନଜନକ ଭାଷାର ବଢ଼ୁଥିବା ପ୍ରଚଳନକୁ ନେଇ ଚିନ୍ତା ପ୍ରକାଶ କରିଛନ୍ତି। ସୋସିଆଲ ମିଡିଆରେ ଏକ ପୋଷ୍ଟ କରି ସେ କହିଛନ୍ତି, "ଖରାପ ଭାଷା ବ୍ୟବହାର କରିବା କେବେ ବି 'କୁଲ୍' ନୁହେଁ। ଆମେ ଯେଉଁ ଭାଷା ବ୍ୟବହାର କରୁ, ତାହା ଆମର ବ୍ୟକ୍ତିତ୍ୱ ଓ ସଂସ୍କାରକୁ ପ୍ରତିଫଳିତ କରେ।" ସେ ସମସ୍ତଙ୍କୁ ଭାବିଚିନ୍ତି ଶବ୍ଦ ବ୍ୟବହାର କରିବାକୁ ପରାମର୍ଶ ଦେଇଛନ୍ତି।
ମନୁ ଭାକର କହିଛନ୍ତି ଯେ, ଆଜିକାଲି ବିଶେଷକରି ଯୁବପିଢ଼ିଙ୍କ ମଧ୍ୟରେ ଗାଳିଗୁଲଜକୁ ସାଧାରଣ କଥା ଭାବେ ନିଆଯାଉଛି ଏବଂ ଅନେକେ ଏହାକୁ ଆଧୁନିକତା କିମ୍ବା ଆତ୍ମବିଶ୍ୱାସର ପ୍ରତୀକ ବୋଲି ଭାବୁଛନ୍ତି। ତାଙ୍କ ମତରେ ପ୍ରକୃତ ଅର୍ଥରେ 'କୁଲ୍' ହେଉଛି ପରିଶ୍ରମୀ, ସଚ୍ଚୋଟ, ଭଦ୍ର, ସମ୍ମାନଜନକ ଓ ଦାୟିତ୍ୱବାନ ହେବା। ସଫଳତା ହାସଲ କରି ନିଜ ପରିବାର ଓ ଦେଶର ଗୌରବ ବଢ଼ାଇବା ହିଁ ପ୍ରକୃତ ଆଦର୍ଶ ବୋଲି ସେ କହିଛନ୍ତି।
ମନୁ ଭାକରଙ୍କ ଏହି ମନ୍ତବ୍ୟ ନିକଟରେ ନୂଆଦିଲ୍ଲୀର ଯନ୍ତରମନ୍ତରରେ ହୋଇଥିବା ଏକ ଛାତ୍ର ଆନ୍ଦୋଳନ ସମୟରେ କେତେକ ପ୍ରତିବାଦକାରୀଙ୍କ ଦ୍ୱାରା ପ୍ରଧାନମନ୍ତ୍ରୀଙ୍କ ବିରୋଧରେ ଅପମାନଜନକ ସ୍ଲୋଗାନ ଦିଆଯାଇଥିବା ଘଟଣା ପରେ ଆସିଛି। ଯଦିଓ ମନୁ କୌଣସି ନିର୍ଦ୍ଦିଷ୍ଟ ଘଟଣାର ନାମ ଉଲ୍ଲେଖ କରିନାହାନ୍ତି, ତାଙ୍କ ବାର୍ତ୍ତାକୁ ନେଇ ଦେଶବ୍ୟାପୀ ଚର୍ଚ୍ଚା ଜୋର ଧରିଛି। ଏହି ପ୍ରସଙ୍ଗରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଏକ ଭିଡିଓ ବାର୍ତ୍ତାରେ ଛାତ୍ରମାନଙ୍କୁ କ୍ଷମା କରିବା ସହ ସେମାନଙ୍କୁ ଦଣ୍ଡିତ କରିବା ପରିବର୍ତ୍ତେ ସଠିକ୍ ପଥ ଦେଖାଇବାକୁ ସମାଜକୁ ଆହ୍ୱାନ କରିଥିଲେ। ଅନ୍ୟପକ୍ଷରେ ଅଭିନେତା ଅନୁପମ ଖେର ମଧ୍ୟ ଗଣତନ୍ତ୍ରରେ ମତଭେଦର ଅଧିକାର ଥିଲେ ମଧ୍ୟ ଅପମାନଜନକ ଭାଷାର କୌଣସି ସ୍ଥାନ ନଥିବା କହି ପ୍ରତିକ୍ରିୟା ରଖିଥିଲେ।