ଏକ ସମୟରେ ସରକାରୀ କାର୍ଯ୍ୟାଳୟ, ଅଫିସ ଓ ପୁସ୍ତକାଳୟରେ ପ୍ରତିଦିନ ଖବରକାଗଜର ଗଦା ଦେଖିବାକୁ ମିଳୁଥିଲା। କିନ୍ତୁ କୋଭିଡ୍ ପରେ ପରିସ୍ଥିତି ବଦଳିଗଲା। ୱର୍କ-ଫ୍ରମ୍-ହୋମ୍, ସ୍ମାର୍ଟଫୋନ୍ ଓ ଡିଜିଟାଲ୍ ନ୍ୟୁଜ୍ ପ୍ଲାଟଫର୍ମର ବୃଦ୍ଧି ସହ ଛାପା ଖବରକାଗଜର ସର୍କୁଲେସନ୍ ଦେଶବ୍ୟାପୀ ଉଲ୍ଲେଖନୀୟ ଭାବେ କମିଛି। ଅନେକ ସରକାରୀ ବିଭାଗ ମଧ୍ୟ ପୂର୍ବଭଳି ବହୁ ସଂଖ୍ୟାରେ ଖବରକାଗଜ କିଣୁନାହାନ୍ତି।
ଏଭଳି ସମୟରେ ବୈଦେଶିକ ମୁଦ୍ରା ସଞ୍ଚୟ ଓ ନ୍ୟୁଜପ୍ରିଣ୍ଟ ଆମଦାନୀ ଖର୍ଚ୍ଚ କମାଇବା ଉଦ୍ଦେଶ୍ୟରେ ମହାରାଷ୍ଟ୍ର ସରକାର ସରକାରୀ କାର୍ଯ୍ୟାଳୟରେ ଛାପା ଖବରକାଗଜ କିଣିବା ବନ୍ଦ କରି ଡିଜିଟାଲ୍ ନ୍ୟୁଜ୍କୁ ପ୍ରାଥମିକତା ଦେବା ନେଇ ଚର୍ଚ୍ଚାରେ ରହିଛନ୍ତି। ମଧ୍ୟପ୍ରାଚ୍ୟର ଅସ୍ଥିରତା ଯୋଗୁଁ ନ୍ୟୁଜପ୍ରିଣ୍ଟ ଆମଦାନୀ ଖର୍ଚ୍ଚ ବଢ଼ିଥିବାରୁ ସରକାରୀ ବ୍ୟୟ କମାଇବା ଏହି ପଦକ୍ଷେପର ମୁଖ୍ୟ କାରଣ ବୋଲି କୁହାଯାଉଛି।
ଏହାପରେ ପ୍ରଶ୍ନ ଉଠୁଛି-ଓଡ଼ିଶା ସରକାର ମଧ୍ୟ କେବେ ଏଭଳି ମଡେଲ୍ ଗ୍ରହଣ କରିବେ? ଯଦି ସରକାରୀ କାର୍ଯ୍ୟାଳୟରେ ଡିଜିଟାଲ୍ ନ୍ୟୁଜ୍କୁ ପ୍ରାଧାନ୍ୟ ଦିଆଯାଏ, ତେବେ ସରକାରୀ ଖର୍ଚ୍ଚ ଓ କାଗଜ ବ୍ୟବହାର କମିପାରେ। କିନ୍ତୁ ଅନ୍ୟପଟେ ଏହା ଛାପା ଖବରକାଗଜ ଶିଳ୍ପ, ବିତରକ, ହକର୍ ଓ ସାମ୍ବାଦିକତା ଉପରେ କେମିତି ପ୍ରଭାବ ପକାଇବ, ସେଥିରେ ମଧ୍ୟ ଗୁରୁତର ଆଲୋଚନା ଆବଶ୍ୟକ।