ଜେଲ୍‌ରେ ଥିବା ବନ୍ଦୀଙ୍କୁ ଏଭଳି ଦଣ୍ଡ ମିଳିଲେ, ସେ ଭୋଗୁଥିବା ଦଣ୍ଡ ଶେଷ ହେବା ପରେ ନୂଆ ଦଣ୍ଡ ଆରମ୍ଭ ହେବ।

ମୁଖ୍ୟମନ୍ତ୍ରୀ ପ୍ରମୋଦ ସାୱନ୍ତ ଏହି ବିଲ୍‌କୁ ବିଧାନସଭାରେ ଉପସ୍ଥାପନ କରିଥିଲେ। ନୂଆ ଆଇନରେ ଜେଲ୍‌ ଭିତରକୁ ନିଷିଦ୍ଧ ସାମଗ୍ରୀ ଆଣିବା, ବାହାରକୁ ନେବା, ବନ୍ଦୀଙ୍କୁ ଯୋଗାଇବା କିମ୍ବା ଅନଧିକୃତ ଯୋଗାଯୋଗରେ ସହାୟତା କରିବା ଉପରେ ମଧ୍ୟ କଡ଼ା ବ୍ୟବସ୍ଥା ରହିଛି। ଜାଣିଶୁଣି ଏଭଳି କାର୍ଯ୍ୟକୁ ସହଯୋଗ କରୁଥିବା ଜେଲ୍‌ କର୍ମଚାରୀ ମଧ୍ୟ ଦଣ୍ଡିତ ହେବେ। ଏଥିସହ ଜେଲ୍‌ର ସମ୍ବେଦନଶୀଳ ବାରାକ୍‌ ଓ ସେଲ୍‌ରେ ନିୟୋଜିତ କର୍ମଚାରୀଙ୍କୁ ନିୟମିତ ଭାବେ ବଦଳି କରାଯିବ, ଯାହାଦ୍ୱାରା ବନ୍ଦୀ ଓ କର୍ମଚାରୀଙ୍କ ମଧ୍ୟରେ ଅନୈତିକ ସମ୍ପର୍କ ଗଢ଼ିଉଠିବାକୁ ରୋକାଯାଇପାରିବ।

ଏହି ଆଇନରେ ଉଚ୍ଚ ବିପଦପୂର୍ଣ୍ଣ ଓ ଅଭ୍ୟାସଗତ ଅପରାଧୀଙ୍କ ଉପରେ ଗୁଇନ୍ଦା ନଜରଦାରି ଓ ନିରୀକ୍ଷଣକୁ ମଧ୍ୟ ମଜବୁତ କରାଯିବ। ଜେଲ୍‌ରେ ନିଷିଦ୍ଧ ସାମଗ୍ରୀ ଓ ମୋବାଇଲ୍‌ ଖୋଜିବା ପାଇଁ ନିୟମିତ ତଲାସୀ ସହ ଅଚାନକ ଯାଞ୍ଚ ଓ ଆଧୁନିକ ଜାମର୍‌ ବ୍ୟବସ୍ଥା କରାଯିବ। ଏହାସହ ଜାମିନ, ପାରୋଲ୍‌ କିମ୍ବା ଫର୍ଲୋରେ ମୁକ୍ତ ହେଉଥିବା ଉଚ୍ଚ ବିପଦପୂର୍ଣ୍ଣ ଅପରାଧୀଙ୍କ ସୂଚନା ସମ୍ପୃକ୍ତ ଜିଲ୍ଲାର ଏସ୍‌ପିଙ୍କୁ ଦିଆଯିବ। ବନ୍ଦୀଙ୍କ ପୁନର୍ବାସ ଓ ସମାଜରେ ପୁନଃସମ୍ମିଳନ ପାଇଁ ଖୋଲା ଓ ଅର୍ଦ୍ଧ-ଖୋଲା ସୁଧାରଗୃହ ସ୍ଥାପନର ବ୍ୟବସ୍ଥା ମଧ୍ୟ ଏହି ବିଲ୍‌ରେ ରହିଛି।