ଦିଲ୍ଲୀ ଅଗ୍ନିଶମ ସେବା ଅନୁଯାୟୀ ଆଜି ସକାଳ ପ୍ରାୟ ୧୦.୨୧ ସମୟରେ ଲୋଧି ରୋଡ ପୋଲିସ ଷ୍ଟେସନ ଅଞ୍ଚଳ ଅଧୀନରେ ଆସୁଥିବା ବିକେ ଦତ୍ତ କଲୋନୀରେ ଅଗ୍ନିକାଣ୍ଡ ସମ୍ପର୍କରେ ସେମାନଙ୍କୁ ଏକ ଫୋନ୍ ଆସିଥିଲା। ଘଟଣାଟି ଚାୱଲା ସ୍ୱିଟ୍ସ ସମ୍ମୁଖରେ ଥିବା ଏକ ଘରେ ଘଟିଥିଲା।ସୂଚନା ପାଇବା ମାତ୍ରେ, ଅଗ୍ନିଶମ ବିଭାଗର ତୁରନ୍ତ ଘଟଣାସ୍ଥଳରେ ପହଞ୍ଚିଥିଲା।ଅଗ୍ନିଶମ ବିଭାଗର ଜଣେ ଅଧିକାରୀ କହିଛନ୍ତି ଯେ କୋଠାର ତୃତୀୟ ମହଲାରେ ଥିବା ଘରେ ନିଆଁ ଲାଗିଥିଲା ଏବଂ ଖୁବ୍ ଶୀଘ୍ର ବ୍ୟାପି ଯାଇଥିଲା। ଅଗ୍ନିଶମ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ଉଦ୍ଧାର ଏବଂ ରିଲିଫ୍ କାର୍ଯ୍ୟ ଆରମ୍ଭ କରିଥିଲେ।

ତୃତୀୟ ମହଲାରେ ଖୋଜାଖୋଜି ସମୟରେ ଜଣେ ମହିଳା ଏବଂ ତାଙ୍କ ଦୁଇ ଝିଅଙ୍କ ମୃତଦେହ ଉଦ୍ଧାର କରାଯାଇଥିଲା। ଭୟଙ୍କର ନିଆଁ ଲାଗିବା କାରଣରୁ ଘଟଣାସ୍ଥଳରେ ହିଁ ତିନି ଜଣଙ୍କର ମୃତ୍ୟୁ ହୋଇଥିଲା। ଅଗ୍ନିଶମ ବାହିନୀ ସକାଳ ୧୧:୧୦ ସୁଦ୍ଧା ନିଆଁକୁ ନିୟନ୍ତ୍ରଣ କରିଥିଲା। ପୁନର୍ବାର ନିଆଁ ନଲାଗିବା ପାଇଁ କୁଲିଂ ଅପରେସନ୍ ଆରମ୍ଭ କରାଯାଇଥିଲା। ମୃତକମାନଙ୍କୁ ଏପର୍ଯ୍ୟନ୍ତ ଚିହ୍ନଟ କରାଯାଇ ନାହିଁ। ପୋଲିସ ମୃତକଙ୍କ ବିଷୟରେ ସୂଚନା ସଂଗ୍ରହ କରିବାକୁ ଏବଂ ସେମାନଙ୍କ ପରିବାର ସହିତ ଯୋଗାଯୋଗ କରିବାକୁ ଚେଷ୍ଟା କରୁଛି। ପ୍ରାରମ୍ଭିକ ତଦନ୍ତରୁ ଅଗ୍ନିକାଣ୍ଡର କାରଣ ଜଣାପଡି ନାହିଁ। ପୋଲିସ ସନ୍ଦେହ କରୁଛି ଯେ ସର୍ଟସର୍କିଟ ଯୋଗୁଁ ଏଭଳି ଦୁର୍ଘଟଣା ଘଟିଥାଇପାରେ । ପୋଲିସ ଏବଂ ଫୋରେନସିକ୍ ଦଳ ଘଟଣାସ୍ଥଳରେ ପହଞ୍ଚି ଦୁର୍ଘଟଣାର କାରଣ ତଦନ୍ତ କରୁଛନ୍ତି।