ଆଠଗଡ, (୧୧/୦୬) : ଆପ୍ର : ଆଠଗଡ ଏନଏସିର ୧ ନମ୍ବର ୱାର୍ଡ ଅନ୍ତର୍ଗତ ଗୁହାଳପଡିଆରେ ତିନି ଦିନ ଧରି ବିଦ୍ୟୁତ ସେବାରୁ ବଞ୍ଚିତ ଉତ୍ୟକ୍ତ ଲୋକ ବୁଧବାର ସକାଳେ ୬୫ ନଂ ରାଜ୍ୟ ରାଜପଥ ଅବରୋଧ କରିଥିଲେ ।
ସୂଚନାଯୋଗ୍ୟ ଗତ ସୋମବାର ଅପରାହ୍ନରେ କାଳବୈଶାଖି ପ୍ରଭାବରେ ଝଡ଼ତୋଫାନ ଦ୍ବାରା ଗଛ ଭାଙ୍ଗି ବିଦ୍ୟୁତ୍ ଲାଇନ୍ ଛିଣ୍ଡି ବିଜୁଳି ଯୋଗାଣ ବ୍ୟାହତ ହୋଇଥିଲା। ତେବେ ରାସ୍ତାକଡରେ ଭାଙ୍ଗିଥିବା ଗଛ କଟା ଯାଇ ନଥିବାରୁ ବିଦ୍ୟୁତ ଯୋଗାଣ ସମ୍ଭବ ହୋଇପାରିନଥିଲା। ଗୁହାଳପଡିଆର ଲୋକମାନେ ଆଜିକୁ ୩ଦିନ ଧରି ଅନ୍ଧାରରେ ରହିବା ସହ ଜଳ ଯୋଗାଣ ବ୍ୟାହତ ହେବାରୁ ପାଣି ବିନା ଅସୁବିଧାର ସମ୍ମୁଖୀନ ହେଉଥିଲେ ।
ଏ ନେଇ ବାରମ୍ବାର ଵିଦ୍ୟୁତ ଵିତରକ ସଂସ୍ଥା ଟାଟା ପାୱର ସହ ଯୋଗାଯୋଗ କଲେ ମଧ୍ୟ ସୁଫଳ ନମିଳିବାରୁ ପ୍ରଚଣ୍ଡ ଗରମ ଗୁଳୁଗୁଳିରେ ଅତିଷ୍ଠ ଦଳିତ ଜନସାଧାରଣ ତୁରନ୍ତ ବିଜୁଳି ଯୋଗାଣ ଦାବିରେ ଗୁହାଳ ପଡିଆଠାରେ ଖୁଣ୍ଟୁଣୀ-ନରସିଂହପୁର ମୁଖ୍ୟ ରାସ୍ତାରେ ଗଛପକାଇ ରାସ୍ତାରୋକ କରିଥିଲେ ।
ଖଵର ପାଇ ପ୍ରଶାସନ ପକ୍ଷରୁ ସହକାରୀ ଜିଲ୍ଲାପାଳ ମାନସ ରଞ୍ଜନ ବେହେରା ଘଟଣା ସ୍ଥଳରେ ପହଞ୍ଚି ଉତ୍ୟକ୍ତ ଲୋକଙ୍କୁ ଵୁଝା ସୁଝା କରିବା ସହିତ ତୁରନ୍ତ ଟ୍ୟାଙ୍କର ଯୋଗେ ପାନୀୟ ଜଳ ଯୋଗାଇ ଦେଵା ପାଇଁ ଜନସ୍ବାସ୍ଥ୍ୟ ଵିଭାଗକୁ ନିର୍ଦ୍ଦେଶ ଦେଇଥିଲେ । ଟାଟା ପାୱାରର ସହକାରୀ ଯନ୍ତ୍ରୀ ଓ କନିଷ୍ଠ ଯନ୍ତ୍ରୀ ପହଞ୍ଚି ତୁରନ୍ତ ଭାଙ୍ଗି ପଡ଼ିଥିବା ଲାଇନକୁ ମରାମତି କରି ବିଜୁଳି ଯୋଗାଣ ସ୍ଵାଭାବିକ କରିବା ପରେ ରାସ୍ତାରୋକ ହଟିଥିଲା ।