ଶାସ୍ତ୍ରୀୟ ସଙ୍ଗୀତ, ନୃତ୍ୟ ଓ ନାଟକର ସୁନ୍ଦର ସମାହାରରେ ସଜ୍ଜିତ ଏହି ବାର୍ଷିକ ଆୟୋଜନ ପୂଜ୍ୟ ଗୁରୁ କେଳୁଚରଣ ମହାପାତ୍ରଙ୍କ ଜନ୍ମ ଶତବାର୍ଷିକୀ ବର୍ଷ ପାଳନ ପରିପ୍ରେକ୍ଷୀରେ ଆହୁରି ସ୍ୱ his ତନ୍ତ୍ର ଓ ଆକର୍ଷଣୀୟ ହୋଇପାରିଛି।

ଉଦ୍‌ଘାଟନୀ ସନ୍ଧ୍ୟାର ଆରମ୍ଭ ପ୍ରଦୀପ ପ୍ରଜ୍ୱଳନ ଓ ସ୍ୱାଗତ ଭାଷଣ ଦ୍ୱାରା ହୋଇଥିଲା। ଏହି ଶୁଭାରମ୍ଭ କାର୍ଯ୍ୟକ୍ରମରେ ବରିଷ୍ଠ କଣ୍ଠଶିଳ୍ପୀ ପଣ୍ଡିତ ଅନୁପ ଜଲୋଟା, ଓଡ଼ିଶା ରାଜସ୍ୱ ପରିଷଦର ପୂର୍ବତନ ସଦସ୍ୟ ଅଶୋକ କୁମାର ତ୍ରିପାଠୀ, ଏମ୍‌.ଜି.ଏମ୍‌ ମିନେରାଲ୍ସର ମୁଖ୍ୟ ପରିଚାଳନା ନିର୍ଦ୍ଦେଶକ ପଙ୍କଜ ଲୋଚନ ମହାନ୍ତି, ଶ୍ରୀ ଶ୍ରୀ ବିଶ୍ୱବିଦ୍ୟାଳୟର କୁଳପତି ପ୍ରଫେସର ତେଜ ପ୍ରତାପ ଏବଂ ସୃଜନର ନିର୍ଦ୍ଦେଶକ ଗୁରୁ ରତିକାନ୍ତ ମହାପାତ୍ର ପ୍ରମୁଖ ସମ୍ମାନନୀୟ ଅତିଥି ଭାବେ ଯୋଗଦେଇ କାର୍ଯ୍ୟକ୍ରମକୁ ଆଗେଇ ନେଇଥିଲେ।

ପ୍ରଥମ ସନ୍ଧ୍ୟାର ବିଶେଷ ଆକର୍ଷଣ ଥିଲେ ପ୍ରସିଦ୍ଧ ହିନ୍ଦୁସ୍ତାନୀ କଣ୍ଠଶିଳ୍ପୀ ବିଦୁଷୀ ଶୁଭା ମୁଦଗଲ, ଯାହାଙ୍କ ସୁରମୟ ପରିବେଷଣ ଦର୍ଶକଙ୍କୁ ସମ୍ପୂର୍ଣ୍ଣ ଆପ୍ଲୁତ କରିଥିଲା । ସେ ରାଗ ବାଗେଶ୍ରୀରେ ଶ୍ରୀକୃଷ୍ଣଙ୍କ ଜନ୍ମ ଉପରେ ଆଧାରିତ ରୂପକ ତାଲର ବିଲମ୍ବିତ ରଚନାରୁ ଗାୟନ ଆରମ୍ଭ କରିଥିଲେ । ଏହାପରେ ତିନ ତାଲରେ ମଙ୍ଗତ ଚାନ୍ଦ କନହୟୀଙ୍କ ରଚନା ପ୍ରସ୍ତୁତ କରି କୃଷ୍ଣ ଜନ୍ମାଷ୍ଟମୀର ଭକ୍ତିମୟ ମାହୋଲ ସୃଷ୍ଟି କରିଥିଲେ। ପରେ ରାଗ ଗୌର ମଲହାର ସହ ଖୟାଲ, ଥୁମରୀ ଓ ଦାଦରା ପରିବେଷଣ କରି ସେ ଶାସ୍ତ୍ରୀୟ ସଙ୍ଗୀତର ଏକ ଅନନ୍ୟ ଅନୁଭୂତି ଭେଟି ଦେଇଥିଲେ । ତାଙ୍କ ସହ ତବଲାରେ ଡ. ଅନୀଶ ପ୍ରଧାନ, ହାର୍ମୋନିୟମରେ ସୁଧୀର ନାୟକ ଓ ତନପୁରାରେ ନୀଲିମା ପ୍ରଧାନ ସହଯୋଗ କରିଥିଲେ । ସମଗ୍ର କାର୍ଯ୍ୟକ୍ରମଟିକୁ ଡ. ମୃତ୍ୟୁଞ୍ଜୟ ରଥ ନିପୁଣତାର ସହ ମଞ୍ଚ ପରିଚାଳନା କରିଥିଲେ ।

ଉତ୍ସବର ଦ୍ୱିତୀୟ ସନ୍ଧ୍ୟାରେ ପଣ୍ଡିତ ତେଜେନ୍ଦ୍ର ନାରାୟଣ ମଜୁମଦାରଙ୍କ ସରୋଦ, ସତ୍ୟଜିତ ତାଲୱାଲକରଙ୍କ ତବଲା ବାଦନ ଏବଂ ଲିପ୍ସା ଶତପଥୀଙ୍କ ଏକକ ଓଡ଼ିଶୀ ନୃତ୍ୟ ପ୍ରଦର୍ଶିତ ହେବ। ଗୁରୁ ରତିକାନ୍ତ ମହାପାତ୍ରଙ୍କ ନିର୍ଦ୍ଦେଶନାରେ ସଜ୍ଜିତ ଏହି ଉତ୍ସବକୁ ଦେବୀପ୍ରସାଦ ମଶ୍ର ସୁଚାରୁ ରୂପେ ପରିଚାଳନା କରୁଛନ୍ତି। ଉଲ୍ଲେଖଯୋଗ୍ୟ, ୩୨ତମ ଗୁରୁ କେଳୁଚରଣ ମହାପାତ୍ର ପୁରସ୍କାର ଉତ୍ସବ ୨୦୨୬କୁ ଭାରତ ସରକାରଙ୍କ ସଂସ୍କୃତି ମନ୍ତ୍ରଣାଳୟ ଏବଂ ଓଡ଼ିଶା ସରକାରଙ୍କ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ପକ୍ଷରୁ ସମ୍ପୂର୍ଣ୍ଣ ସହଯୋଗ ଯୋଗାଇ ଦିଆଯାଉଛି।