Thursday, 16 Sep, 8.40 pm ONA Khabar

ଲାଟେଷ୍ଟ ନ୍ୟୁଜ୍
ଚାରିଧାମ ଯାତ୍ରା ପାଇଁ ବାଟ ଫିଟିଲା : ସର୍ତ୍ତମୂଳକ ଅନୁମତି ଦେଲେ ହାଇକୋର୍ଟ

ଉତ୍ତରାଖଣ୍ଡ : ଚାରିଧାମ ଯାତ୍ରା ଉପରୁ ହଟିଲା ପ୍ରତିବନ୍ଧକ । ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତିରେ ପ୍ରତିବନ୍ଧକ ହଟାଇବା ସହ କଟକଣାକୁ କିଛିକାଂଶରେ କୋହଳ କରିଛନ୍ତି ଉତ୍ତରାଖଣ୍ଡ ହାଇକୋର୍ଟ । କୋଭିଡ ୧୯ ସହ ଜଡିତ ପର୍ଯ୍ୟାପ୍ତ ବ୍ୟବସ୍ଥା ନଥିବାରୁ ଜୁନ୍ ୨୮ରେ ହାଇକୋର୍ଟ ଉତ୍ତରାଖଣ୍ଡର ଏହି ମହତ୍ୱପୂର୍ଣ୍ଣ ତୀର୍ଥଯାତ୍ରା ଉପରେ ପ୍ରତିବନ୍ଧକ ଲଗାଇଥିଲେ । ତେବେ ଚାରିଧାମ ଯାତ୍ରା ଉପରୁ ରୋକ୍ ହଟାଇବା ପାଇଁ ରାଜ୍ୟ ସରକାର ନିରନ୍ତର ଉଦ୍ୟମ କରୁଥିଲେ । ଆଉ ଏଥିପାଇଁ ରାଜ୍ୟ ରାଜନୀତି ମଧ୍ୟ ସବୁବେଳେ ସରଗରମ ରହୁଥିଲା । ଆଉ ଆଜି ହାଇକୋର୍ଟ ଚାରିଧାମ ଯାତ୍ରା ପାଇଁ ରାସ୍ତା ସଫା କରିଛନ୍ତି । ଚାରିଧାମ ଯାତ୍ରା ପାଇଁ ସର୍ତ୍ତମୂଳକ ଅନୁମତି ଦେଛନ୍ତି ହାଇକୋର୍ଟ । ନିର୍ଦ୍ଦେଶ ଅନୁସାରେ ବଦ୍ରିନାଥ ଧାମରେ ୧୨୦୦, କେଦାରନାଥ ଧାମରେ ୮୦୦, ଗାଙ୍ଗୋତ୍ରିରେ ୬୦୦ ଏବଂ ଯମୁନୋତ୍ରି ଧାମରେ ୪୦୦ ଭକ୍ତ କିମ୍ବା ତୀର୍ଥଯାତ୍ରୀ ଅନୁମତି ଦିଆଯାଇଛି । ଏହା ସହିତ କୋର୍ଟ ପ୍ରତ୍ୟେକ ଭକ୍ତ କିମ୍ବା ଯାତ୍ରୀଙ୍କ ପାଇଁ କୋଭିଡ୍ ନେଗେଟିଭ୍ ରିପୋର୍ଟ ବାଧ୍ୟତାମୂଳକ କରିଛନ୍ତି । ଚାରିଧାମ ଯାତ୍ରା ପାଇଁ କୋଭିଡ୍ ନେଗେଟିଭ୍ ରିପୋର୍ଟ ସହ ଉଭୟ ଡୋଜ ଟିକା ନେବା ଅନିବାର୍ଯ୍ୟ । କେବଳ ଏତିକି ନୁହେଁ, ଚମୋଲି, ରୁଦ୍ରପ୍ରୟାଗ ଏବଂ ଉତ୍ତରକାଶୀ ଜିଲ୍ଲାରେ ଆବଶ୍ୟକତା ଅନୁସାରେ ପୋଲିସ ଫୋର୍ସ ମୁତୟନ କରିବାକୁ କହିଛନ୍ତି ହାଇକୋର୍ଟ । ତେବେ କୌଣସି ପୁଷ୍କରିଣୀରେ ଭକ୍ତମାନେ ସ୍ନାନ କରିପାରିବେ ନାହିଁ ବୋଲି ମଧ୍ୟ କଡ଼ା ନିର୍ଦ୍ଦେଶ ରହିଛି । ସେପ୍େଟମ୍ବର ୧୦ରେ ଚାରଧାମ୍ ଯାତ୍ରା ଶୁଣାଣି କରାଯାଉ ଦାବି କରି କୋର୍ଟରେ ଆବେଦନ କରିଥିଲେ ସରକାର । ତେବେ ଶୁଣାଣି ପାଇଁ କୋର୍ଟ ସେପ୍େଟମ୍ବର ୧୬ ଦିନକୁ ସ୍ଥିର କରିଥିଲେ । ମୁଖ୍ୟ ବିଚାରପତି ଆରଏସ ଚୌହାନ ଏବଂ ଜଷ୍ଟିସ ଆଲୋକ କୁମାର ବର୍ମାଙ୍କ ଖଣ୍ଡପୀଡ ଏହି ମାମଲାର ଶୁଣାଣି କରିଛନ୍ତି । କରୋନା ସଂକ୍ରମଣ ପାଇଁ ନିର୍ଦ୍ଦେଶାବଳୀ ପାଳନ କରି ଯାତ୍ରା କରିବାକୁ ଶ୍ରଦ୍ଧାଳଙ୍କୁ ସର୍ତ୍ତମୂଳକ ଅନୁମତି ଦେଇଛନ୍ତି କୋର୍ଟ ।

The post ଚାରିଧାମ ଯାତ୍ରା ପାଇଁ ବାଟ ଫିଟିଲା : ସର୍ତ୍ତମୂଳକ ଅନୁମତି ଦେଲେ ହାଇକୋର୍ଟ appeared first on ONA KHABAR.

Dailyhunt
Disclaimer: This story is auto-aggregated by a computer program and has not been created or edited by Dailyhunt. Publisher: ONA Khabar
Top