ଖଲ୍ଲିକୋଟ, ୩୧/୦୮: ଅଦରକାରୀ କାଗଜକୁ ନୂଆ ରୂପ ଦେଇ ସୃଜନଶୀଳ କଳାକୃତିରେ ପରିଣତ କରିବାର ଲକ୍ଷ୍ୟ ନେଇ ସରକାରୀ ଚାରୁ ଓ କାରୁକଳା ମହାବିଦ୍ୟାଳୟ, ଖଲ୍ଲିକୋଟ ପକ୍ଷରୁ 'From Scrap to Creation' ଶୀର୍ଷକ ପେପର କୋଲାଜ କର୍ମଶାଳା ଆୟୋଜିତ ହୋଇଛି। ସୋମବାର ଏହି କର୍ମଶାଳା ଅନୁଷ୍ଠାନିକ ଭାବେ ଉଦ୍ଘାଟିତ ହୋଇଯାଇଛି।
ପ୍ରଦୀପ ପ୍ରଜ୍ୱଳନ କରି କର୍ମଶାଳାର ଶୁଭାରମ୍ଭ:
ମହାବିଦ୍ୟାଳୟର ଅଧ୍ୟକ୍ଷ ଦେବୀ ପ୍ରସାଦ ଦାଶ ଏବଂ କର୍ମଶାଳାର ବିଶେଷଜ୍ଞ ପଞ୍ଚାନନ ସୁର ମିଳିତ ଭାବେ ପ୍ରଦୀପ ପ୍ରଜ୍ୱଳନ କରି କର୍ମଶାଳାର ଶୁଭାରମ୍ଭ କରିଥିଲେ। ଉଦ୍ଘାଟନୀ କାର୍ଯ୍ୟକ୍ରମରେ ଅଧ୍ୟକ୍ଷ ଦେବୀ ପ୍ରସାଦ ଦାଶ ବିଶେଷଜ୍ଞ ପଞ୍ଚାନନ ସୁରଙ୍କ ସୃଜନଶୀଳ ଓ ବହୁମୁଖୀ ପ୍ରତିଭା ସହିତ ତାଙ୍କ କାର୍ଯ୍ୟଦକ୍ଷତା ସମ୍ପର୍କରେ ଛାତ୍ରଛାତ୍ରୀଙ୍କୁ ଅବଗତ କରାଇଥିଲେ। ଏଥିସହ New Media ଏବଂ ସମସାମୟିକ ଚିତ୍ରଶିଳ୍ପୀଙ୍କ ସମ୍ପର୍କରେ ମଧ୍ୟ ସେ ବିସ୍ତୃତ ଆଲୋଚନା କରିଥିଲେ।
ପେପର କୋଲାଜର ବିଭିନ୍ନ କୌଶଳ ଶିଖିଲେ ଛାତ୍ରଛାତ୍ରୀ:
କର୍ମଶାଳାର ବିଶେଷଜ୍ଞ ପଞ୍ଚାନନ ସୁର ମହାବିଦ୍ୟାଳୟ ସହ ତାଙ୍କର ପୁରୁଣା ସ୍ମୃତିକୁ ଛାତ୍ରଛାତ୍ରୀଙ୍କ ସହ ବାଣ୍ଟିଥିଲେ। ଏଥିସହ ନିଜର କଳାକୃତି ଓ କଳା ଅଭିଜ୍ଞତା ସମ୍ପର୍କରେ ମଧ୍ୟ ସେ ବିସ୍ତୃତ ଆଲୋଚନା କରିଥିଲେ। ପେପର କୋଲାଜ କଳାର ବିଭିନ୍ନ କୌଶଳ ଓ ଏହାର ସୃଜନଶୀଳ ଦିଗ ସମ୍ପର୍କରେ ବିଶେଷଜ୍ଞ ଛାତ୍ରଛାତ୍ରୀଙ୍କୁ ତାଲିମ ଦେଇଥିଲେ। ଅଦରକାରୀ କାଗଜ ଓ ବିଭିନ୍ନ ସାମଗ୍ରୀକୁ ବ୍ୟବହାର କରି କିପରି ନୂଆ କଳାକୃତି ସୃଷ୍ଟି କରାଯାଇପାରେ, ସେ ସମ୍ପର୍କରେ ମଧ୍ୟ ଛାତ୍ରଛାତ୍ରୀମାନେ ଜ୍ଞାନ ଆହରଣ କରିଥିଲେ।
ଶିକ୍ଷକ ଓ ଛାତ୍ରଛାତ୍ରୀଙ୍କ ସହଯୋଗ:
କାର୍ଯ୍ୟକ୍ରମର ଶେଷରେ ଭାସ୍କର୍ଯ୍ୟ କଳା ବିଭାଗର ଅଧ୍ୟାପକ ସୋମନାଥ ରାଉତ ଧନ୍ୟବାଦ ଅର୍ପଣ କରିଥିଲେ। ମହାବିଦ୍ୟାଳୟର ଅତିଥି ଅଧ୍ୟାପକ ଦିନେଶ କୁମାର ସାହୁ, ଦିପାଲି ଦେବସ୍ମିତା ଦାଶ, ମୀରା ବେହେରା, ସ୍ମୃତିଲିପି ପ୍ରଧାନ, ସୁମିତ୍ରା ମହାରଣା ଓ ବରୁଣ ବେହେରା ପ୍ରମୁଖ ଉଦ୍ଘାଟନୀ ଉତ୍ସବର ପରିଚାଳନାରେ ସହଯୋଗ କରିଥିଲେ। ଏହି କର୍ମଶାଳାର ସଫଳ ଆୟୋଜନରେ ମହାବିଦ୍ୟାଳୟର ସମସ୍ତ କର୍ମଚାରୀ ଓ ଛାତ୍ରଛାତ୍ରୀ ସହଯୋଗ କରିଥିଲେ।