ନୂଆଦିଲ୍ଲୀ,୪।୪: ପଞ୍ଜାବର ଚଣ୍ଡୀଗଡ ସେକ୍ଟର ୩୭ ସ୍ଥିତ ବିଜେପି ମୁଖ୍ୟାଳୟରେ ହୋଇଥିବା ବ୍ଲାଷ୍ଟ ମାମଲାର ତଦନ୍ତ ପରେ ଆସିଲା ବଡ଼ ଖବର। ପଞ୍ଜାବ ପୋଲିସ କାଉଣ୍ଟର ଇଣ୍ଟେଲିଜେନ୍ସ ଶାଖା ଚଣ୍ଡୀଗଡ ପୋଲିସ ସହ ମିଳିତ ଅଭିଯାନରେ ଘଟଣାରେ ସାମିଲ ୫ ଜଣଙ୍କୁ ଗିରଫ କରିଛି। ଆକ୍ରମଣରେ ସାମିଲ ଦୁଇ ମୁଖ୍ୟ ଆକ୍ରମଣକାରୀଙ୍କୁ ଚିହ୍ନଟ କରାଯାଇଛି।
ତାଙ୍କ ପାଖରୁ ହାଣ୍ଡଗ୍ରେନେଡ୍, ୩୦ ବୋର୍ ଜିଗାନା ପିସ୍ତଲ ଓ ଜୀବନ୍ତ ଗୁଳି ଜବତ କରାଯାଇଛି।
ପଞ୍ଜାବ ପୋଲିସ ଡିଜିପି ଗୌରବ ଯାଦବ ଶନିବାର ଚଣ୍ଡୀଗଡରେ କହିଛନ୍ତି, ପ୍ରାରମ୍ଭିକ ଯାଞ୍ଚରେ ଏହି ପୁରା ମଡ୍ୟୁଲର ପାକିସ୍ତାନ ଗୁଇନ୍ଦା ଏଜେନ୍ସି ସହିତ ଯୋଡି ହୋଇଥିବାର ସଙ୍କେତ ରହିଛି। ଏହି ନେଟଓ୍ବର୍କ ବିଦେଶରେ ଥିବା ହାଣ୍ଡେଲରଙ୍କ ଇଶାରାରେ କାମ କରୁଥିଲା। ଏହାର ଲୋକେସନ୍ ପର୍ତ୍ତୁଗାଲ ଓ ଜର୍ମାନୀ ବୋଲି ଜଣାପଡିଛି। ପୋଲିସର କହିବା ଅନୁସାରେ, ଏଥିରେ ବହୁ ଅଲଗା ଅଲଗା ମଡ୍ୟୁଲ ଓ ଉପ-ମଡ୍ୟୁଲ ବ୍ୟବହାର କରାଯାଇଥିଲା। ଗିରଫ ଅଭିଯୁକ୍ତଙ୍କ ଚିହ୍ନଟ ପଞ୍ଜାବର ବଲବିନ୍ଦର ଲାଲ୍ ଓରଫ୍ ଶାମି, ଜସବୀର ସିଂହ ଓରଫ ଜସି, ଚରଣଜିତ୍ ସିଂହ, ଶିମଲାର ନିବାସୀ ରୁବଲ ଚୌହାନ ଓ ଧୁରୀ ନିବାସର ମନ୍ଦୀପ ଓରଫ୍ ଅଭିଯୋଗ ଶର୍ମା ଭାବରେ ହୋଇଛି।
ଡିଜିପି ଗୌରବ ଯାଦବ କହିଛନ୍ତି, ଏହା ଏକ ସଂଗଠିତ ନେଟଓ୍ବର୍କ ଥିଲା। ଏହାର କାମ ହତିଆରର ସପ୍ଳାଇ, ଟ୍ରାନ୍ସପୋର୍ଟ ଓ ଆକ୍ରମଣ କରିବା ପର୍ଯ୍ୟନ୍ତ ଥିଲା। ତଦନ୍ତରୁ ଜଣାପଡିଛି ଯେ ଏହି ମଡ୍ୟୁଲ୍ ପର୍ତ୍ତୁଗାଲ ଏବଂ ଜର୍ମାନୀରେ ଅବସ୍ଥିତ ବିଦେଶୀ ହ୍ୟାଣ୍ଡଲରମାନଙ୍କ ଦ୍ୱାରା ନିୟନ୍ତ୍ରିତ ହେଉଥିଲା। ଗିରଫ ସନ୍ଦିଗ୍ଧ ବ୍ୟକ୍ତିମାନେ ବିଦେଶରୁ ନିର୍ଦ୍ଦେଶ ପାଇଥିବା ସ୍ୱୀକାର କରିଛନ୍ତି। ଆତଙ୍କବାଦୀମାନେ ଏହି ଆକ୍ରମଣ କରିବା ପାଇଁ କଟ-ଆଉଟ୍ ଏବଂ ସବ୍-ମଡ୍ୟୁଲର ଏକ ନେଟୱାର୍କ ବ୍ୟବହାର କରିଥିଲେ, ଯାହା ଦ୍ବାରା ମୁଖ୍ୟ ଷଡ଼ଯନ୍ତ୍ରକାରୀଙ୍କୁ ଚିହ୍ନଟ କରିହେବନି।