ଚେନ୍ନାଇ, ୪।୫: ତାମିଲନାଡ଼ୁ ରାଜନୀତିରେ ଏକ ବଡ଼ ଧରଣର ପରିବର୍ତ୍ତନ ଦେଖିବାକୁ ମିଳିଛି । ଦୀର୍ଘ ୧୦ ବର୍ଷ ପରେ ଷ୍ଟାଲିନ୍ ସରକାରଙ୍କ ବିଦାୟ ପ୍ରାୟ ସୁନିଶ୍ଚିତ ହୋଇଥିବା ବେଳେ, ସୁପରଷ୍ଟାର୍ ବିଜୟଙ୍କ ନୂତନ ଦଳ ତାମିଲଗା ଭେଟ୍ରି କାଡ଼ଗମ (TVK) ବିଜୟ ଆଡ଼କୁ ଅଗ୍ରସର ହେଉଛି । ୨୩୪ ଆସନ ବିଶିଷ୍ଟ ତାମିଲନାଡ଼ୁ ବିଧାନସଭାରେ ବିଜୟଙ୍କ ଦଳ ୧୦୦ରୁ ଅଧିକ ଆସନରେ ଆଗୁଆ ରହି ଚମତ୍କାର ପ୍ରଦର୍ଶନ କରିଛି ।

ଚଳଚ୍ଚିତ୍ର ଜଗତରୁ ସିଧାସଳଖ ରାଜନୀତିକୁ ଆସିଥିବା ୫୧ ବର୍ଷୀୟ ବିଜୟଙ୍କ ଏହି ସଫଳତା ପଛରେ ତାଙ୍କର ଲୋକାଭିମୁଖୀ ପ୍ରତିଶ୍ରୁତି ବା 'ଚୁନାବୀ ଗ୍ୟାରେଣ୍ଟି' ମୁଖ୍ୟ କାରଣ ବୋଲି କୁହାଯାଉଛି ।

କାମ କଲା ବିଜୟଙ୍କ ୫ଟି ବଡ଼ ପ୍ରତିଶ୍ରୁତି:

ବିଜୟଙ୍କ ନିର୍ବାଚନୀ ଇସ୍ତାହାରରେ ସାଧାରଣ ଜନତା, ବିଶେଷ କରି ମହିଳା ଓ ଯୁବବର୍ଗଙ୍କ ପାଇଁ ଅନେକ ଆକର୍ଷଣୀୟ ଯୋଜନା ରହିଥିଲା । ସେଗୁଡ଼ିକ ହେଲା:

୧. କନ୍ୟା ରତ୍ନଙ୍କ ପାଇଁ ସୁନା ଓ ଶାଢ଼ୀ:

ବିଜୟ ପ୍ରତିଶ୍ରୁତି ଦେଇଥିଲେ ଯେ, ଯଦି ତାଙ୍କ ଦଳ କ୍ଷମତାକୁ ଆସେ, ତେବେ ତାମିଲନାଡ଼ୁର ପ୍ରତ୍ୟେକ ଯୁବତୀଙ୍କୁ ବିବାହ ସମୟରେ ସରକାରଙ୍କ ପକ୍ଷରୁ ୮ ଗ୍ରାମ ସୁନା ଏବଂ ଏକ ରେଶମ ଶାଢ଼ୀ ଉପହାର ସ୍ୱରୂପ ପ୍ରଦାନ କରାଯିବ । ଏହି ଘୋଷଣା ଗରିବ ଓ ମଧ୍ୟବିତ୍ତ ପରିବାର ମଧ୍ୟରେ ବେଶ୍ ଆଦୃତ ହୋଇଥିଲା ।

୨. ମହିଳା ଓ ବୃଦ୍ଧଙ୍କ ପାଇଁ ଆର୍ଥିକ ସହାୟତା:

ମହିଳାମାନଙ୍କୁ ସ୍ୱାବଲମ୍ବୀ କରିବା ପାଇଁ ମାସିକ ୨୫୦୦ ଟଙ୍କାର ଆର୍ଥିକ ସହାୟତା ଦେବାକୁ ସେ ଘୋଷଣା କରିଥିଲେ । ଏହା ସହିତ ବୃଦ୍ଧ ଓ ଦିବ୍ୟାଙ୍ଗମାନଙ୍କ ପେନସନ୍କୁ ୩୦୦୦ ଟଙ୍କାକୁ ବୃଦ୍ଧି କରିବାକୁ ଟିଭିକେ ପ୍ରତିଶ୍ରୁତି ଦେଇଥିଲା ।

୩. ଭୂମିହୀନଙ୍କୁ ମାଗଣା ଜମି ପଟ୍ଟା:

ରାଜ୍ୟର ଭୂମିହୀନ ଗରିବ ଲୋକଙ୍କୁ ସରକାରୀ ଜମିର ପଟ୍ଟା ମାଗଣାରେ ଯୋଗାଇ ଦେବାକୁ ବିଜୟ ପ୍ରତିଶ୍ରୁତି ଦେଇଛନ୍ତି । ଯେଉଁମାନଙ୍କର ନିଜସ୍ୱ ଜମି ନାହିଁ, ସେମାନଙ୍କୁ ସରକାରୀ ଜମିରେ ଅଧିକାର ଦେବା ତାଙ୍କର ଏକ ପ୍ରମୁଖ ଲକ୍ଷ୍ୟ ଥିଲା ।

୪. ମାଗଣା ବିଦ୍ୟୁତ୍, ସିଲିଣ୍ଡର ଓ ବିନା ସୁଧରେ ଋଣ:

ପ୍ରତ୍ୟେକ ପରିବାରକୁ ମାସିକ ୨୦୦ ୟୁନିଟ୍ ମାଗଣା ବିଦ୍ୟୁତ୍ ଏବଂ ବର୍ଷକୁ ୬ଟି ଗ୍ୟାସ୍ ସିଲିଣ୍ଡର ମାଗଣାରେ ଦେବାକୁ ବିଜୟ କହିଥିଲେ । ଏହା ବ୍ୟତୀତ ମହିଳାମାନଙ୍କୁ ୫ ଲକ୍ଷ ଟଙ୍କା ପର୍ଯ୍ୟନ୍ତ ବିନା ସୁଧରେ ଋଣ ପ୍ରଦାନ କରିବାର ପ୍ରତିଶ୍ରୁତି ମଧ୍ୟ ମହିଳା ଭୋଟରଙ୍କୁ ଆକୃଷ୍ଟ କରିଛି ।

୫. ଯୁବବର୍ଗଙ୍କ ପାଇଁ ନିଯୁକ୍ତି ଓ ବେକାରୀ ଭତ୍ତା:

ଯୁବକମାନଙ୍କୁ ଆକୃଷ୍ଟ କରିବା ପାଇଁ ସ୍ନାତକ ପାସ୍ କରିଥିବା ଯୁବକଯୁବତୀଙ୍କୁ ୪୦୦୦ ଟଙ୍କା ବେକାରୀ ଭତ୍ତା ଦେବାକୁ ଦଳ ଘୋଷଣା କରିଥିଲା । ଆଗାମୀ ୫ ବର୍ଷରେ ୫ ଲକ୍ଷ ସରକାରୀ ଚାକିରି ଏବଂ ୫ ଲକ୍ଷ ଇଣ୍ଟର୍ନଶିପ୍ ଯୋଗାଇ ଦେବାକୁ ବିଜୟଙ୍କ ଦଳ ପ୍ରତିଶ୍ରୁତି ଦେଇଛି ।