ଖରସ୍ରୋତା ନଦୀରେ ଭାସିଗଲେ ୮୫ ବର୍ଷୀୟ ବୃଦ୍ଧ, ୧ ଘଣ୍ଟାର ଅପରେସନ ପରେ ଜୀବିତ ଉଦ୍ଧାର

ଆଳି: କେନ୍ଦ୍ରାପଡ଼ା ଜିଲ୍ଲା ଆଳି ବ୍ଲକ୍ ଅଞ୍ଚଳରୁ ଏକ ଆଶ୍ଚର୍ଯ୍ୟଜନକ ଖବର ସାମ୍ନାକୁ ଆସିଛି । ଖରସ୍ରୋତା ନଦୀରେ ଭାସିଯାଇ ଜଣେ ୮୫ ବର୍ଷୀୟ ବୃଦ୍ଧ ନିଖୋଜ ହୋଇଯାଇଥିଲେ । ଦମକଳ ବାହିନୀ ଏବଂ ସ୍ଥାନୀୟ ଲୋକଙ୍କ ଅକ୍ଳାନ୍ତ ପରିଶ୍ରମ ଯୋଗୁଁ ତାଙ୍କୁ ଜୀବିତ ଉଦ୍ଧାର କରାଯାଇଛି । ସୂଚନା ଅନୁଯାୟୀ, ଆଳି ବ୍ଲକ୍ ଅନ୍ତର୍ଗତ ହିଞ୍ଜଳ ଗାଁର ନରେନ୍ଦ୍ର ବେହେରା (୮୫) ସକାଳେ ଖରସ୍ରୋତା ନଦୀକୁ ଶୌଚ ହେବା ପାଇଁ ଯାଇଥିଲେ ।

ଏହି ସମୟରେ ଅସାବଧାନତା ବଶତଃ ସେ ନଦୀ ସ୍ରୋତରେ ଭାସି ଯାଇଥିଲେ । ନଦୀରେ ସେ ଭାସି ଯାଉଥିବାର ସ୍ଥାନୀୟ ଲୋକେ ଦେଖିବାକୁ ପାଇଥିଲେ ମଧ୍ୟ ଦେଖୁଦେଖୁ ସେ ହଠାତ୍ ପାଣି ଭିତରେ ନିଖୋଜ ହୋଇଯାଇଥିଲେ । ଘଟଣା ସମ୍ପର୍କରେ ଜଣାପଡ଼ିବା ପରେ ସ୍ଥାନୀୟ ଲୋକେ ତୁରନ୍ତ ଅଗ୍ନିଶମ ବାହିନୀକୁ ଖବର ଦେଇଥିଲେ । ବିଞ୍ଝାରପୁର ଦମକଳ ବାହିନୀ ତତ୍ପରତା ଦେଖାଇ ଘଟଣାସ୍ଥଳରେ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ତୁରନ୍ତ ଖୋଜାଖୋଜି ଆରମ୍ଭ କରିଥିଲା । ଦୀର୍ଘ ଏକ ଘଣ୍ଟାର ପ୍ରାଣମୂର୍ଚ୍ଛା ରେସକ୍ୟୁ ଅପରେସନ ପରେ ବୃଦ୍ଧଙ୍କୁ ନଦୀ ଭିତରୁ ଜୀବିତ ଅବସ୍ଥାରେ ଉଦ୍ଧାର କରାଯାଇଥିଲା । ପରେ ନରେନ୍ଦ୍ର ବେହେରାଙ୍କୁ ତୁରନ୍ତ ଚିକିତ୍ସା ପାଇଁ ବିଞ୍ଝାରପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି ।