ମର୍ମନ୍ତୁଦ ସଡ଼କ ଦୁର୍ଘଟଣା: ଟ୍ରକ୍-ମିନିବସ୍ ମୁହାଁମୁହିଁ ଧକ୍କାରେ ୨୭ ଶ୍ରଦ୍ଧାଳୁଙ୍କ ମୃତ୍ୟୁ

ନୂଆଦିଲ୍ଲୀ: ଜିମ୍ବାୱେରେ ଏକ ଭୟଙ୍କର ସଡ଼କ ଦୁର୍ଘଟଣା ଘଟିଛି। ଏକ ମିନିବସ୍ ଏବଂ ମାଲବାହୀ ଟ୍ରକ୍ ମଧ୍ୟରେ ମୁହାଁମୁହିଁ ଧକ୍କା ହେବା ଫଳରେ ୨୭ ଜଣ ଶ୍ରଦ୍ଧାଳୁଙ୍କ ମୃତ୍ୟୁ ଘଟିଛି। ରାଜଧାନୀ ହରାରେଠାରୁ ପ୍ରାୟ ୧୪୦ କିଲୋମିଟର ଦୂର ଚିଭୁ ନିକଟରେ ଶୁକ୍ରବାର ସନ୍ଧ୍ୟାରେ ଏହି ଦୁର୍ଘଟଣା ଘଟିଥିବା ପୋଲିସ ସୂଚନା ଦେଇଛି। ଅନ୍ୟ ଏକ ଦେଶରେ ପଞ୍ଜୀକୃତ ଟ୍ରକ୍ ଅନ୍ୟ ଏକ ଗାଡ଼ିକୁ ଓଭରଟେକ୍ କରୁଥିବା ସମୟରେ ବିପରୀତ ଦିଗରୁ ଶ୍ରଦ୍ଧାଳୁମାନଙ୍କୁ ନେଇ ଏକ ଧାର୍ମିକ ସମ୍ମିଳନୀକୁ ଯାଉଥିବା ମିନିବସ୍ ସହ ସିଧାସଳଖ ଧକ୍କା ହୋଇଥିଲା।

ଏହି ଦୁର୍ଘଟଣାରେ ୨୭ ଜଣଙ୍କର ମୃତ୍ୟୁ ଘଟିଥିବା ବେଳେ ୭ ଜଣ ଗୁରୁତର ଆହାତ ହୋଇଛନ୍ତି। ମିଳିଥିବା ଭିଡିଓ ଅନୁଯାୟୀ, ଧକ୍କା ପରେ ମିନିବସଟି ସମ୍ପୂର୍ଣ୍ଣ ଜଳିଯାଇଛି। ଜିମ୍ବାୱେରେ ଖରାପ ରାସ୍ତା, ଖାଲଖମା ଏବଂ ବେପରୁଆ ଗାଡ଼ି ଚାଳନା ଯୋଗୁଁ ଅନେକ ସମୟରେ ଏପରି ସଡ଼କ ଦୁର୍ଘଟଣା ଘଟୁଛି। ସ୍ଥାନୀୟ ଅଞ୍ଚଳରେ ଯାତାୟାତ ପାଇଁ ବ୍ୟବହୃତ ହେଉଥିବା 'କୋମ୍ବି' ନାମକ ଏହି ପ୍ରାଇଭେଟ୍ ମିନିବସଗୁଡ଼ିକରେ ପ୍ରାୟତଃ କ୍ଷମତାଠାରୁ ଅଧିକ ଯାତ୍ରୀ ଯାତ୍ରା କରୁଥିବାରୁ ଏଭଳି ବିପଦ ସୃଷ୍ଟି ହେଉଛି।