New Delhi: ଆଇପିଏଲ୍ ୨୦୨୬ରେ ଚେନ୍ନାଇ ସୁପର କିଙ୍ଗସ (CSK) ର ପ୍ରଦର୍ଶନ ବର୍ତ୍ତମାନ ଦୁର୍ବଳ ରହିଛି। ଦଳ ଲଗାତାର ତିନୋଟି ମ୍ୟାଚ୍ ହାରି ପଏଣ୍ଟ ଟେବୁଲର ସବୁଠାରୁ ତଳ ସ୍ଥାନରେ ଅବସ୍ଥିତ। ଏହା ସହ ଷ୍ଟାର ଖେଳାଳିଙ୍କ ଆହତ ସମସ୍ୟା ଦଳର ଚିନ୍ତାକୁ ଆହୁରି ବଢ଼ାଇ ଦେଇଛି।
ସମସ୍ତଙ୍କ ଦୃଷ୍ଟି ଏବେ ଗୋଟିଏ ପ୍ରଶ୍ନ ଉପରେ-ଆସନ୍ତା ଦିଲ୍ଲୀ କ୍ୟାପିଟାଲ୍ସ ବିପକ୍ଷ ମ୍ୟାଚ୍ରେ ମହେନ୍ଦ୍ର ସିଂ ଧୋନି ଖେଳିବେ କି?
ଚେନ୍ନାଇ ସୁପର କିଙ୍ଗସର ସିଇଓ କାଶୀ ବିଶ୍ୱନାଥନଙ୍କ କହିବା ଅନୁସାରେ, ଧୋନି ଏବେ ମଧ୍ୟ କାଫ୍ ଇଞ୍ଜୁରି ଯୋଗୁଁ ଅସୁବିଧାରେ ଅଛନ୍ତି। ସେ ଚେନ୍ନାଇରେ ରହି ପରିବାର ସହ ସମୟ କାଟୁଥିବା ସହ ରିହାବ୍ ପ୍ରକ୍ରିୟାରେ ଅଛନ୍ତି।
ବିଶ୍ୱନାଥନ କହିଛନ୍ତି ଯେ, ଧୋନି ସମ୍ପୂର୍ଣ୍ଣ ଫିଟ୍ ହେବା ପାଇଁ ଅତିକମରେ ଆଉ ଗୋଟିଏ ସପ୍ତାହ ସମୟ ଲାଗିପାରେ। ସେ କେବେ ମୈଦାନକୁ ଫେରିବେ, ସେଥିପାଇଁ ଏବେଠାରୁ ସ୍ପଷ୍ଟ ତାରିଖ ଦିଆଯାଇନାହିଁ।
ଏହି ସିଜନରେ ଧୋନି ଏପର୍ଯ୍ୟନ୍ତ କୌଣସି ମ୍ୟାଚ୍ରେ ଦଳ ସହ ଦେଖାଯାଇନାହାନ୍ତି। ସେ ଗୁଆହାଟୀ, ଚେନ୍ନାଇ କିମ୍ବା ବେଙ୍ଗାଲୁରୁ-କୌଣସି ସ୍ଥାନରେ ମଧ୍ୟ ଟିମ୍ ସହ ଯାତ୍ରା କରିନାହାନ୍ତି।
ଏପରି ସ୍ଥିତିରେ ଦଳ ପାଇଁ ଏକ ଭଲ ଖବର ମଧ୍ୟ ସାମ୍ନାକୁ ଆସିଛି। ଷ୍ଟାର ବ୍ୟାଟର ଡିୱାଲ୍ଡ ବ୍ରେଭିସ, ଯିଏ ସାଇଡ୍ ଷ୍ଟ୍ରେନ୍ ଯୋଗୁଁ ପ୍ରାରମ୍ଭିକ ମ୍ୟାଚ୍ଗୁଡ଼ିକୁ ମିସ୍ କରିଥିଲେ, ସେ ବର୍ତ୍ତମାନ ସୁସ୍ଥ ହେଉଥିବା ଖବର ମିଳିଛି। ଯଦି ସବୁକିଛି ଠିକ୍ ରହେ, ତେବେ ସେ ଦିଲ୍ଲୀ ବିପକ୍ଷ ମ୍ୟାଚ୍ରେ ଖେଳିପାରନ୍ତି, ଯାହା ଦଳର ମଧ୍ୟକ୍ରମକୁ ଶକ୍ତି ଦେବ।
ଋତୁରାଜ ଗାଏକ୍ୱାଡଙ୍କ ନେତୃତ୍ୱରେ ଖେଳୁଥିବା CSK ଏବେ ଚାପରେ ରହିଛି। ୨୦୨୨ରେ ରବୀନ୍ଦ୍ର ଜାଡେଜାଙ୍କ ଅଧିନାୟକତ୍ୱରେ ଦଳ ପ୍ରଥମ ଚାରିଟି ମ୍ୟାଚ୍ ହାରିଥିଲା, ଏବେ ସେହି ଅବସ୍ଥା ପୁଣିଥରେ ଦେଖାଯାଉଛି।
୧୧ ଏପ୍ରିଲରେ ଚେପକରେ ଦିଲ୍ଲୀ କ୍ୟାପିଟାଲ୍ସ ବିପକ୍ଷ ମ୍ୟାଚ୍ CSK ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଲଗାତାର ପରାଜୟ ପରେ ଦଳ ଏହି ମ୍ୟାଚ୍ ଜିତି ଟୁର୍ଣ୍ଣାମେଣ୍ଟରେ ପୁନଃ ଫେରିବାକୁ ଲକ୍ଷ୍ୟ ରଖିଛି।