ଭୁବନେଶ୍ୱର(ସତ୍ୟପାଠ ବ୍ୟୁରୋ): ହର୍ମୁଜ୍ ପ୍ରଣାଳୀ ଖୋଲିବା ପ୍ରତିବାଦରେ ରାସ୍ତାକୁ ଓହ୍ଲାଇଲେ ଇରାନୀ ମହିଳା । ଏହା ସହ ଏହି ସେମାନେ ଇରାନ-ଆମେରିକା ଶାନ୍ତି ଆଲୋଚନାକୁ ସ୍ପଷ୍ଟ ଭାବରେ ବିରୋଧ କରିଛନ୍ତି ଏବଂ କହିଛନ୍ତି ଯେ, ଆମେରିକାକୁ ଆଦୌ ବିଶ୍ୱାସ କରାଯାଇପାରିବ ନାହିଁ । ଅନ୍ୟପକ୍ଷରେ, ବିଶ୍ୱ ଶକ୍ତି ବଜାରକୁ ଆଶ୍ୱସ୍ତି ଦେଇ, ଇରାନ ବାଣିଜ୍ୟିକ ଜାହାଜ ପାଇଁ ହର୍ମୁଜ୍ ପ୍ରଣାଳୀକୁ ସମ୍ପୂର୍ଣ୍ଣ ଖୋଲିବାର ଏକ ବଡ଼ ଘୋଷଣା କରିଛି।

ଆମେରିକା ମଧ୍ୟସ୍ଥତାରେ ହୋଇଥିବା ଦଶ ଦିନିଆ ଅସ୍ତ୍ରବିରତି ମଧ୍ୟରେ ଏହି ଗୁରୁତ୍ୱପୂର୍ଣ୍ଣ ପଦକ୍ଷେପ ନିଆଯାଇଛି, ଯାହା ସାରା ବିଶ୍ୱରେ ବାଣିଜ୍ୟକୁ ବହୁତ ଆଶ୍ୱସ୍ତି ଦେଇଛି । ସେପଟେ ଏପ୍ରିଲ ୧୭ ତାରିଖରେ ଇରାନର ରାଜଧାନୀ ତେହେରାନରେ 'ଇରାନର ସମର୍ପିତ ଝିଅ' ନାମକ ଏକ ବିଶାଳ ରାଲି ଅନୁଷ୍ଠିତ ହୋଇଥିଲା। ହଜାର ହଜାର ଇରାନୀ ମହିଳା ଏହି ବିଶାଳ ରାଲିରେ ଅଂଶଗ୍ରହଣ କରି ଆମେରିକା ଏବଂ ଇସ୍ରାଏଲ ବିରୋଧରେ ଦୃଢ଼ ପ୍ରତିବାଦ ଜଣାଇଥିଲେ। ରାଲି ଇମାମ ହୁସେନ ସେରିମୋନିଆଲ ସ୍କୋୟାରରୁ ଆରମ୍ଭ ହୋଇ ଏଙ୍ଗେଲାବ ଷ୍ଟ୍ରିଟ୍ ଦେଇ ଗତି କରି କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ଭାଲିଆସର ଛକରେ ପହଞ୍ଚିଥିଲା। ରାସ୍ତାକୁ ଓହ୍ଲାଇଥିବା ମହିଳାମାନେ ଆମେରିକା ସହିତ ଚାଲିଥିବା ଶାନ୍ତି ଆଲୋଚନା ପ୍ରତି ସେମାନଙ୍କର ଗଭୀର ସନ୍ଦେହ ଏବଂ ଦୃଢ଼ ଆପତ୍ତି ପ୍ରକାଶ କରିଛନ୍ତି।