ସବୁଦିନ ପରି ମମତା ଆଜି ସାଦାସିଧା ପୋଷାକ ପରିଧାନ କରିଥିଲେ। ସେପଟେ ପଦଯାତ୍ରା ସମୟରେ ଟିଏମ୍‌ସି ସମର୍ଥକମାନେ 'ମମତା ବାନାର୍ଜୀ ଜିନ୍ଦାବାଦ' ଏବଂ 'ଟିଏମ୍‌ସି ଜିନ୍ଦାବାଦ' ସ୍ଲୋଗାନ ଦେଇ ଏହି ଶୋଭାଯାତ୍ରାକୁ ଏକ ରାଜନୈତିକ ଶକ୍ତି ପ୍ରଦର୍ଶନରେ ପରିଣତ କରିଥିଲେ।

ମମତା ପ୍ରାର୍ଥିପତ୍ର ଦାଖଲ କରିବା ପରେ କହିଛନ୍ତି, ' ମୁଁ ଭବାନୀପୁରରେ ଜନ୍ମ ହୋଇଛି ଏବଂ ବଢ଼ିଛି। ଏଠାରେ ମୁଁ ବର୍ଷର ୩୬୫ ଦିନ ରହୁଛି। ମୋ ଜୀବନ, ମୋ କାମ, ମୋର ଗତିବିଧି ସବୁକିଛି ଭବାନୀପୁରରେ। ମୋ ଜୀବନରେ ସବୁକିଛି ଏହିଠାରୁ ଆରମ୍ଭ ହୋଇଛି। ମୁଁ ଭବାନୀପୁରର ଲୋକମାନଙ୍କୁ ସାଲ୍ୟୁଟ ମାରୁଛି ଏବଂ ଧନ୍ୟବାଦ ଜଣାଉଛି। ମମତା କହିଛନ୍ତି, କେବଳ ଭବାନୀପୁରରେ ନୁହେଁ ସମସ୍ତ ୨୯୪ ଆସନରେ ଟିଏମ୍‌ସିର ବିଜୟ ସୁନିଶ୍ଚିତ କରିବାପାଇଁ ମୁଁ ଲୋକମାନଙ୍କୁ ଅନୁରୋଧ କରୁଛି। ଆମେ ଏକ ବଡ଼ ଜନାଦେଶ ସହ ଜିତିବୁ ବୋଲି ମମତା ଦୃଢ଼ୋକ୍ତି ବାଢ଼ିଛନ୍ତି। ଅନ୍ୟପକ୍ଷେ ଏସ୍‌ଆଇଆର (ସ୍ବତନ୍ତ୍ର ଭୋଟର ତାଲିକା ସଂଶୋଧନ) ପ୍ରକ୍ରିୟାରୁ ଅନେକ ନାଁ କଟିବା ତାଙ୍କୁ ଖୁବ୍‌ କଷ୍ଟ ଦେଇଥିବା ସେ କହିଛନ୍ତି।