Monday, 20 Jan, 6.45 am ସମାଜ

ଭୁବନେଶ୍ବର
ଆଜିଠୁ ଘର ଘର ବୁଲି ଦିଆଯିବ ପଲ୍‌ସ ପୋଲିଓ ବୁନ୍ଦା

ଭୁବନେଶ୍ୱର : ଅନୁଷ୍କା ନାୟକଙ୍କୁ ପଲ୍‌ସ ପୋଲିଓ ଦିଆଯାଇ ୨୦୨୦ ରାଜ୍ୟସ୍ତରୀୟ ଟିକାକରଣ ଅଭିଯାନ ଆରମ୍ଭ ହୋଇଛି। ୟୁନିଟ-୪ ସହରାଞ୍ଚଳ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରଠାରେ ଏହି ଅଭିଯାନ ଶୁଭାରମ୍ଭ ହୋଇଛି। କାର୍ଯ୍ୟକ୍ରମରେ ରାଜ୍ୟ ପରିବାର କଲ୍ୟାଣ ନିର୍ଦେଶକ ଡା. ସମୀର କୁମାର ଦାଶ, ସ୍ୱାସ୍ଥ୍ୟ ଓ ପରିବାର କଲ୍ୟାଣ ପ୍ରତିଷ୍ଠାନ ନିର୍ଦେଶକ ଡା. ସରୋଜ କୁମାର ନାୟକ, ନର୍ସିଂ ନିର୍ଦେଶକ ଡା. ସୁଶୀଲ କର, ସ୍ୱାସ୍ଥ୍ୟ ନିର୍ଦେଶକ ଡା. ବିଜୟ କୁମାର ମହାପାତ୍ର, ଜାତୀୟ ଟିକାକରଣ କାର୍ଯ୍ୟକ୍ରମର ରାଜ୍ୟସ୍ତରୀୟ ଅଧିକାରୀ ଡା. ତାପସ କୁମାର ପାତ୍ରଙ୍କ ସହିତ ବିଶ୍ୱ ସ୍ୱାସ୍ଥ୍ୟ ସଂଗଠନ ଓ ୟୁନିସେଫ୍‌ର ଅଧିକାରୀବୃନ୍ଦ ଉପସ୍ଥିତ ଥିଲେ।

ଚଳିତ ଅଭିଯାନରେ ଜନ୍ମରୁ ୫ବର୍ଷ ପର୍ଯ୍ୟନ୍ତ ୪୧୩୫୬୦୮ ଶିଶୁଙ୍କୁ ପୋଲିଓ ବୁନ୍ଦା ଦିଆଯିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଛି। ଏନେଇ ପାଇଁ ୧୮୯୬୮ ବୁଥ୍ ଖୋଲାଯିବା ସହିତ ୭୫୮୭୨ ଟିକାଦାନକାରୀ, ସ୍ୱେଚ୍ଛାସେବୀଙ୍କ ସହିତ ୩୭୯୫ ସୁପରଭାଇଜରଙ୍କୁ ନିୟୋଜିତ କରାଯାଇଛି। ବସ୍‌ଷ୍ଟାଣ୍ଡ, ରେଳଷ୍ଟେସନ, ସାପ୍ତାହିକ ହାଟ ଏବଂ ଦୁର୍ଗମ ଅଞ୍ଚଳ ପାଇଁ ସ୍ୱତନ୍ତ୍ର ଟିକାଦାନକାରୀଙ୍କୁ ନିୟୋଜିତ କରାଯାଇଛି। ବୁଥ୍ ଦିବସ (୧୯ ତାରିଖ)ରେ ପୋଲିଓ ବୁନ୍ଦା ଖାଇପାରି ନଥିବା ଶିଶୁଙ୍କୁ ୨୦ ଏବଂ ୨୧ ତାରିଖରେ ଟିକାଦାନକାରୀ ଘରକୁ ଘର ଯାଇ ପୋଲିଓ ବୁନ୍ଦା ଖୁଆଇବେ।
ରାଜଧାନୀରେ ପୋଲିଓ ଖାଇଲେ ୭୧ ହଜାର : ପଲସ୍‌ .ପୋଲିଓ ଅଭିଯାନରେ ରବିବାର ରାଜଧାନୀରେ ପ୍ରାୟ ୭୧ ହଜାର ଶିଶୁ ପୋଲିଓ ଟିକା ନେଇଛନ୍ତି। ବାଦ୍‌ ପଡ଼ିଥିବା ଶିଶୁଙ୍କୁ ଆସନ୍ତା ୨୦ ଏବଂ ୨୧ ତାରିଖରେ ପୋଲିଓ ବୁନ୍ଦା ଦିଆଯିବ। ଟିକାଦାନକାରୀ କର୍ମୀ ୬୭ ୱାର୍ଡରେ ଘରକୁ ଘର ବୁଲି ପୋଲିଓ ବୁନ୍ଦା ଦେବେ ବୋଲି ନୋଡାଲ ଅଧିକାରୀ ସୂଚନା ଦେଇଛନ୍ତି। ଏଥିନିମନ୍ତେ ୨୪୯ଟି ବୁଥ୍‌ କରାଯାଇଥିବାବେଳେ ୪୯୮ଟି ଦଳରେ ୯୯୬ ଟିକାଦାନକାରୀ ରହିଛନ୍ତି। ବସ୍‌ଷ୍ଟାଣ୍ଡ, ରେଳଷ୍ଟେସନ, ହାଟ ଆଦି ସ୍ଥାନଗୁଡ଼ିକରେ ବାହାର ଶିଶୁଙ୍କ ପାଇଁ ୩୦ଟି ଅସ୍ଥାୟୀ ଦଳ ଗଠନ କରାଯାଇଛି। ସେହିପରି ନିକୋ ପାର୍କ ଓ ଅନ୍ୟାନ୍ୟ ପାର୍କରେ ମଡେଲ ଟିକାକରଣ ବୁଥ୍‌ କରାଯାଇଛି। ରାଜଧାନୀରେ ପାଖାପାଖି ୮୬ହଜାର ଶିଶୁଙ୍କୁ ଟିକା ଦେବା ଲକ୍ଷ୍ୟ ରହିଛି।

Dailyhunt
Disclaimer: This story is auto-aggregated by a computer program and has not been created or edited by Dailyhunt. Publisher: The Samaja Odia
Top