ଭୁବନେଶ୍ଵର: ପରଲୋକରେ ବରିଷ୍ଠ ସାମ୍ବାଦିକ, ସ୍ତମ୍ଭକାର, ସୁସଂଗଠକ ତଥା ସମାଜସେବୀ ଦେବ ପ୍ରସାଦ ମିଶ୍ର। ଆଜି ସକାଳେ କଟକର ଏକ ଘରୋଇ ହସ୍ପିଟାଲରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି। ଦୈନିକ ଓଡିଆ ଖବର କାଗଜ 'ସମାଜ'ରେ ଭୁବନେଶ୍ଵର ଶାଖାର ସେ ଥିଲେ ବ୍ୟୁରୋ ମୁଖ୍ୟ। ଦୀର୍ଘ ଦିନ ଧରି ସମାଜର ପୂର୍ବତନ ସମ୍ପାଦକ ପଦ୍ମଭୂଷଣ ରାଧାନାଥ ରଥଙ୍କର ସହାୟକ ଭାବେ ସେ କାମ କରୁଥିଲେ।
ତାଙ୍କ ସମୟରେ ସେ ଅବିଭକ୍ତ କଳାହାଣ୍ଡି ଜିଲ୍ଲାର ଭୋକର ଭୂଗୋଳ ବା ଦାରିଦ୍ରର କଥାକୁ ସମାଜ ଜରିଆରେ ଲୋକଲୋଚନକୁ ଆଣିଥିଲେ। ଯାହାକୁ ନେଇ ସରକାର ଚେତିଥିଲେ।
'ସମାଜ'ର ସମ୍ପାଦକ ତପନ କୁମାର ମିଶ୍ର ,'ସମାଜ'ର ପୂର୍ବତନ କାର୍ଯ୍ୟବାହୀ ସମ୍ପାଦକ ଡ. ସତ୍ୟ ରାୟ, ସମାଜର ପୂର୍ବତନ ବରିଷ୍ଠ ସାମ୍ବାଦିକ ଅରବିନ୍ଦ ରାଉତରାୟ ଦେବ ପ୍ରସାଦଙ୍କୁ ଶେଷ ଦର୍ଶନ କରିଛନ୍ତି। କଟକରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଥିବାବେଳେ ତାଙ୍କ ମୃତ୍ୟୁରେ ଲୋକସେବକ ମଣ୍ଡଳର ସଭାପତି ଶ୍ରୀ ରାଜକୁମାର, ଲୋକସେବକ ମଣ୍ଡଳର ରାଷ୍ଟ୍ରୀୟ ସମ୍ପାଦକ ରମାନାଥ ଝା, ରାଷ୍ଟ୍ରୀୟ କୋଷାଧ୍ୟକ୍ଷ ତଥା 'ସମାଜ'ର ମୁଦ୍ରାକର ଓ ପ୍ରକାଶକ ରାଜେନ୍ଦ୍ର କୁମାର ଜେନା ଏବଂ 'ସମାଜ'ର କାର୍ଯ୍ୟନିର୍ବାହୀ ମୁଖ୍ୟ ପରିଚାଳକ ଗୋପୀନାଥ ବାରିକ ପ୍ରମୂଖ ଶୋକ ପ୍ରକାଶ କରିଛନ୍ତି। ସେପଟେ ଦେବପ୍ରସାଦଙ୍କ ମୃତ୍ୟୁରେ ବିରୋଧୀ ଦଳ ନେତା ନବୀନ ପଟ୍ଟନାୟକ ମଧ୍ୟ ଅମର ଆତ୍ମାର ସଦଗତି କାମନା କରିବା ସହ ଶୋକସନ୍ତପ୍ତ ପରିବାର ସଦସ୍ୟଙ୍କୁ ସମବେଦନା ଜଣାଇଛନ୍ତି। ଅନ୍ୟପଟେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ଶୋକପ୍ରକାଶ କରିଛନ୍ତି। ଏବଂ କହିଛନ୍ତି ଓଡିଶାର ବିଶିଷ୍ଟ ସାମ୍ବାଦିକ ଦେବ ପ୍ରସାଦ ମିଶ୍ରଙ୍କ ବିୟୋଗ ଖବର ଶୁଣି ମୁଁ ଦୁଃଖିତ ଓ ମର୍ମାହତ। ସାମ୍ବାଦିକତା ଜଗତକୁ ତାଙ୍କର ଅବଦାନ ଚିର ସ୍ମରଣୀୟ ହୋଇରହିବ।
