ଅନ୍ୟପଟେ ବନ୍ୟା ଯୋଗୁଁ ଫସି ରହିଥିବା ପ୍ରାୟ ୨୦୦ ଭାରତୀୟଙ୍କୁ ଉଦ୍ଧାର କରାଯାଇଥିବା ବୈଦେଶିକ ମନ୍ତ୍ରଣାଳୟ କହିଛି। ଏମାନେ କୈଳାସ ମାନସରୋବର ଯାତ୍ରା ଲାଗି ଯାଇଥିଲେ। ବିଭିନ୍ନ କାର୍ଯ୍ୟକ୍ରମରେ ଯୋଗ ଦେବା ଲାଗି ନେପାଳ ଯାଇଥିବା କଂଗ୍ରେସ ସାଂସଦ ଶଶୀ ତରୁର୍ ଏବେ କାଠମାଣ୍ଡୁରେ ଫସି ରହିଛନ୍ତି। କାଠମାଣ୍ଡୁରେ ଫସି ରହିବା ସମ୍ପର୍କରେ ତରୁର୍ ସୋସିଆଲ ମିଡିଆ 'ଏକ୍ସ'ର ପୋଷ୍ଟରେ ସୂଚନା ଦେଇଛନ୍ତି। ନେପାଳ ବନ୍ୟା ସମ୍ପର୍କରେ ସୂଚନା ପ୍ରଦାନ ପାଇଁ କାଠମାଣ୍ଡୁସ୍ଥିତ ଭାରତୀୟ ଦୂତାବାସ ୩ଟି ହେଲପ୍‌ଲାଇନ ନମ୍ବର ଜାରି କରିଛି।
ଏହି ହେଲପ୍‌ଲାଇନଗୁଡିକ ହେଲା ୯୭୭-୯୮୫୧୩୧୬୮୦୭, ୯୭୭-୯୭୦୯୧୦୭୫୦୦ ଓ ୯୭୭-୯୮୧୦୩୨୬୧୧୭। ଏହି ବନ୍ୟାରେ ୫୧୭ ବିଦେଶୀ ପର୍ଯ୍ୟଟକ ନିଖୋଜ ହୋଇଛନ୍ତି। ସେମାନଙ୍କ ମଧ୍ୟରେ ଆମେରିକାର ୬୫, ୟୁକ୍ରେନର ୫୩ ଓ ମାଲେସିଆର ୫୧ଜଣ ନାଗରିକ ଅଛନ୍ତି। ଏହା ସହିତ କାନାଡା, ଦକ୍ଷିଣ କୋରିଆ, ସିଙ୍ଗାପୁର, ଜର୍ମାନୀ, ରୁଷ୍‌, ଦକ୍ଷିଣ ଆଫ୍ରିକା, ଜାପାନ, ନ୍ୟୁଜିଲାଣ୍ଡର ଅନେକ ପର୍ଯ୍ୟଟକ ନିଖୋଜ ଅଛନ୍ତି।
ନେପାଳ ବନ୍ୟା ବିପନ୍ନଙ୍କ ସହାୟତା ନିମନ୍ତେ ଭାରତ ସରକାର ଗୁରୁବାର ଦ୍ବିତୀୟ ପର୍ଯ୍ୟାୟ ରିଲିଫ ପଠାଇଛି। ଦ୍ବିତୀୟ ପର୍ଯ୍ୟାୟରେ ୩୭.୫ ଟନ୍‌ର ଅତ୍ୟାବଶ୍ୟକ ସାମଗ୍ରୀ,
ଔଷଧ ଓ ଖାଦ୍ୟ ପ୍ୟାକେଟ୍ ପଠାଇଛି। ବୁଧବାର ରାତିରେ ଭାରତ ପ୍ରଥମ ପର୍ଯ୍ୟାୟରେ ରିଲିଫ୍ ପଠାଇଥିଲା। ବନ୍ୟା ପ୍ରଭାବିତ ଅଞ୍ଚଳରେ ଉଦ୍ଧାର କାର୍ଯ୍ୟ ଜାରି ରହିଥିବାବେଳେ ମୃତ୍ୟୁସଂଖ୍ୟା ଆହୁରି ବଢିବାର ଆଶଙ୍କା କରାଯାଇଛି। ଉଦ୍ଧାର କାର୍ଯ୍ୟ ଲାଗି ନେପାଳ ସରକାର ଭାରତ ଓ ଚୀନର ସହଯୋଗ ଲୋଡିଛନ୍ତି। ଉଦ୍ଧାର ହେଉଥିବା ଅଚିହ୍ନା ମୃତଦେହଗୁଡିକ ସମ୍ପର୍କରେ ସୂଚନା ପାଇଁ ନେପାଳ ପୁଲିସ ଏକ ୱେବସାଇଟ୍ ଖୋଲିଛି। ଏହି ୱେବସାଇଟ୍‌ରେ ଅଚିହ୍ନା ଓ ଦାବିଦାର ନଥିବା ମୃତଦେହଗୁଡିକର ତଥ୍ୟ ପ୍ରଦାନ କରାଯାଉଛି। ​‌େଭାଟେକୋଶୀ, ତ୍ରିଶୂଳି ଓ ନାରାୟଣୀ ନଦୀରେ ପୁଣି ବନ୍ୟା ଆସିବା ନେଇ ଚୀନ ପକ୍ଷରୁ ନେପାଳକୁ ସତର୍କତା ଜାରି କରାଯାଇଛି। ଏଥିପାଇଁ ନଦୀ କୂଳିଆ ଅଞ୍ଚଳର ଲୋକଙ୍କୁ ସୁରକ୍ଷିତ ସ୍ଥାନକୁ ଚାଲିଯିବାକୁ କୁହାଯାଇଛି। ନେପାଳ ବନ୍ୟା ଯୋଗୁଁ ଭାରତ-ନେପାଳ ମଧ୍ୟରେ ଚାଲିଥିବା ମୈତ୍ରୀ ବସ୍‌ ସେବାକୁ ଅଗଷ୍ଟ ୨୯ ପର୍ଯ୍ୟନ୍ତ ସ୍ଥଗିତ ରଖାଯାଇଛି।
ସୂଚନାଯୋଗ୍ୟ ବୁଧବାର ସକାଳେ ନେପାଳ-ତିବ୍‌ବତ ସୀମାନ୍ତ ରସୁୱା ଜିଲାର ଭୋଟେକୋଶୀ ନଦୀରେ ଆକସ୍ମିକ ବନ୍ୟା ଆସି ସମଗ୍ର ଅଞ୍ଚଳରେ ତାଣ୍ଡବ ରଚିଥିଲା। ତିବ୍‌ବତରେ ଭୂମିକମ୍ପ ପ୍ରଭାବରେ ହିମସ୍ଖଳନ ଓ ପାହାଡ ଧସିବା କାରଣରୁ ଏହି ବନ୍ୟା ଆକସ୍ମିକ ଭାବେ ଆସିଥିଲା। ବରଫାବୃତ ପାହାଡରେ ହିମପ୍ରବାହ ହୋଇଥାଏ। ଅନେକ ସମୟରେ ହିମପ୍ରବାହର ଜଳ ଆବର୍ଜନା ଦ୍ବାରା ଆବଦ୍ଧ ହୋଇ ହ୍ରଦ ଆକାରରେ ଜମି ରହିଥାଏ। ଏହିସବୁ ହ୍ରଦର ମଧ୍ୟକୁ ବଡ ବଡ ବରଫ ଅତଡା ଧସିବାରୁ ଏହା ବନ୍ଧ ଭାଙ୍ଗି ହଠାତ୍ ତଳକୁ ମାଡିଆସିଥାଏ। ଏହାଦ୍ବାରା ପାହାଡିଆ ଅଞ୍ଚଳର ନିମ୍ନଭାଗରେ ଆକସ୍ମିକ ବନ୍ୟା ସୃଷ୍ଟି କରିଥାଏ।
ନେପାଳକୁ ସତର୍କ କଲା ଚୀନ, ପୁଣି ପାହାଡ଼ି ବନ୍ୟା ଆଶଙ୍କା
ନେପାଳ ଓ ଚୀନ ସୀମାରେ ଆଉ ଏକ ପାହାଡି ବନ୍ୟା ଆସିବାର ଆଶଙ୍କା ସୃଷ୍ଟି ହୋଇଛି। ଏହି ଆଶଙ୍କାକୁ ନେଇ ନେପାଳକୁ ଚୀନ ସତର୍କ କରାଇଛି। ଏପରି କି ଆଗାମୀ ୩ ଦିନ ମଧ୍ୟରେ ଏହି ବନ୍ୟା ଆସିବାର ଆଶଙ୍କା ରହିଛି। ସୀମାରେ ହିମବାହ ଓ ଭୂସ୍ଖଳନ ଯୋଗୁଁ ସୃଷ୍ଟି ହୋଇଥିବା ବ୍ୟାରିୟର ହ୍ରଦ ଏବେ ଓଭର ଫ୍ଲୋ ହେଉଛି। ଏହି ଓଭର ଫ୍ଲୋ କାରଣରୁ ପୁଣି ଥରେ ବନ୍ୟା ଆସିବାର ଆଶଙ୍କା ସୃଷ୍ଟି ହୋଇଛି। ଚୋଚେନ୍ ଖୋଲା ଓ ପୁରେପୁ ତ୍ସାଙ୍ଗପୋ ନଦୀର ମିଳନ ସ୍ଥଳରେ ଏହି ପ୍ରାକୃତିକ ବ୍ୟାରିୟର ହ୍ରଦ ସୃଷ୍ଟି ହୋଇଛି। ବର୍ତ୍ତମାନ ଏହି ହ୍ରଦରେ ପ୍ରାୟ ୨୦ ଲକ୍ଷ କ୍ୟୁବିକ୍ ମିଟର ଜଳ ଜମା ହୋଇରହିଛି। ଆଗାମୀ ୭୨ ଘଣ୍ଟା (୩ ଦିନ) ମଧ୍ୟରେ ଆଉ ୩୦ ଲକ୍ଷ କ୍ୟୁବିକ୍ ମିଟର ଜଳ ପ୍ରବେଶ କରିବା ଫଳରେ ଏହା ଭାଙ୍ଗିବାର ଆଶଙ୍କା ରହିଛି। ଏହି ହ୍ରଦଟି ଭାଙ୍ଗିଲେ ନେପାଳର ଭୋଟେକୋଶୀ ଓ ତ୍ରିଶୂଳୀ ନଦୀରେ ଆଉ ଏକ ବଡ଼ ବନ୍ୟା ଆସିବ। ଏହି ବନ୍ୟା ତଳିଆ ଅଞ୍ଚଳକୁ ଜଳମଗ୍ନ କରିବ। ହିମସ୍ଖଳନ ଧସିବା ଯୋଗୁଁ ନେପାଳ ଓ ଚୀନ୍‌ର ସୀମାନ୍ତ ଗିରୋଙ୍ଗ ଅଞ୍ଚଳରେ ଆସିଥିବା ଆକସ୍ମିକ ବନ୍ୟାରେ ୪୦୦ରୁ ଅଧିକ ଲୋକଙ୍କ ମୃତ୍ୟୁ ହେଲାଣି। ଚୀନ୍‌ର ଜଳସମ୍ପଦ ମନ୍ତ୍ରଣାଳୟ ଉକ୍ତ ହ୍ରଦର ଜଳସ୍ତର ଉପରେ କ୍ରମାଗତ ନଜର ରଖି ବନ୍ୟା ପରିସ୍ଥିତିର ଆକଳନ ଚଳାଇଛି। ନେପାଳର ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ ତଳିଆ ଅଞ୍ଚଳରେ ରହୁଥିବା ସମସ୍ତ ନାଗରିକଙ୍କୁ ସୁରକ୍ଷିତ ସ୍ଥାନକୁ ଚାଲିଯିବାକୁ ଓ ନଦୀକୂଳରୁ ଦୂରେଇ ରହିବାକୁ ଜରୁରୀ ସୂଚନା ଦେଇଛି।

ସେପ୍ଟେମ୍ବର ୨ରେ ମାଲବ୍ୟ ରାଜଯୋଗ ; ଏହି ରାଶିଙ୍କୁ ମିଳିବ ଧନ ଓ କ୍ୟାରିୟରେ ବଡ ସଫଳତା..