ଏହି ପ୍ରସ୍ତାବକୁ ଜି ପରମେଶ୍ବର ସମର୍ଥନ କରିଥିଲେ। ପରେ ଏହି ପ୍ରସ୍ତାବ ସର୍ବସମ୍ମତିକ୍ରମେ ଗୃହୀତ ହୋଇଥିଲା।

ବିଧାୟକ ଦଳ ବୈଠକରେ ସିଦ୍ଧରମେୟାଙ୍କୁ ରାଜ୍ୟବାସୀଙ୍କ ପ୍ରତି ତାଙ୍କର ସେବା ଓ କଂଗ୍ରେସ ଦଳ ପ୍ରତି ଅବଦାନ ପାଇଁ ଧନ୍ୟବାଦ ଜଣାଯାଇଥିଲା। କଂଗ୍ରେସର ବରିଷ୍ଠ ନେତା କେସି ବେଣୁଗୋପାଳଙ୍କ ତତ୍ତ୍ବାବଧାନରେ ସିଏଲପି ନେତା ନିର୍ବାଚନ ପ୍ରକ୍ରିୟା ହୋଇଥିଲା। ବିଧାୟକ ଦଳ ନେତା ନିର୍ବାଚିତ ହେବା ପରେ ଶିବକୁମାର ଲୋକଭବନ ଯାଇ ସରକାର ଗଠନ ପାଇଁ ଦାବି ଉପସ୍ଥାପନ କରିଛନ୍ତି। ଦାବି ଅନୁଯାୟୀ ରାଜ୍ୟପାଳ ଥୱର ଚାନ୍ଦ ଗେହଲୋତ ଶିବକୁମାରଙ୍କୁ ସରକାର ଗଠନ ପାଇଁ ଅନୁମତି ପ୍ରଦାନ କରିଛନ୍ତି। ରାଜ୍ୟପାଳଙ୍କ ଅନୁମତି ଆଧାରରେ ଜୁନ୍ ୩ ଅପରାହ୍ଣ ୫ଟା ୧୫ରେ ଶିବକୁମାର ରାଜ୍ୟର ୨୫ତମ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିବେ। ଲୋକଭବନ (ରାଜଭବନ)ର ଗ୍ଲାସ ହାସଉରେ ଏକ ନିରାଡମ୍ବର ଉତ୍ସବରେ ଶିବକୁମାରଙ୍କ ଶପଥ ଗ୍ରହଣ ଅନୁଷ୍ଠିତ ହେବ।

ଏହି ଉତ୍ସବରେ କଂଗ୍ରେସ ଦଳର କର୍ମୀମାନେ ଯୋଗଦେବେ ନାହିଁ। ମେ ୨୮ ତାରିଖରେ ସିଦ୍ଧରମେୟା କର୍ଣ୍ଣାଟକ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ। ୨୯ ତାରିଖରେ ରାଜ୍ୟପାଳ ତାଙ୍କ ଇସ୍ତଫାକୁ ଗ୍ରହଣ କରିବା ସହିତ ରାଜ୍ୟ ମନ୍ତ୍ରୀ ପରିଷଦକୁ ଭଙ୍ଗ କରିଥିଲେ। ସିଦ୍ଧରମେୟାଙ୍କ ଇସ୍ତଫା ପରେ ନୂଆଦିଲ୍ଲୀରେ ପରବର୍ତ୍ତୀ ସରକାର ଗଠନ ପାଇଁ ମାନସମନ୍ଥନ ହୋଇଥିଲା। ଦଳର ରାଷ୍ଟ୍ରୀୟ ସଭାପତି ମଲ୍ଲିକାର୍ଜୁନ ଖଡଗେ ଓ ରାହୁଲ ଗାନ୍ଧୀଙ୍କୁ ଉଭୟ ସିଦ୍ଧରମେୟା ଓ ଶିବକୁମାର ଭେଟିବା ପୂର୍ବକ ସରକାର ଗଠନ ପ୍ରକ୍ରିୟା ଚୂଡାନ୍ତ କରିଥିଲେ।