ଏଥିସହିତ ଏକ ସ୍ୱତନ୍ତ୍ର ଟାସ୍କଫୋର୍ସ ଟିମ ଗଠନ କରି ସମ୍ପୃକ୍ତି ଅଞ୍ଚଳରେ ଶିଶୁ ଶ୍ରମିକ ଚିହ୍ନଟ ଏବଂ ଉଦ୍ଧାର ନିମିତ୍ତ ଅଚାନକ ଚଢ଼ାଉ କରାଯାଇଥିଲା। ଏହି ସଂଯୁକ୍ତ ଟାସ୍କଫୋର୍ସରେ ବାଲୁଗାଁ ସହକାରୀ ଶ୍ରମ ଅଧିକାରୀଙ୍କ ସମେତ ରୁଚିକା ଏନଜିଓ କାର୍ଯ୍ୟକର୍ତ୍ତା ଓ ବାଲୁଗାଁ ଥାନା ପୁଲିସ୍ କର୍ମଚାରୀମାନେ ସାମିଲ ଥିଲେ। ଏହି ଅଭିଯାନରେ ବାଲୁଗାଁ ଓ ବାଣପୁର ଅଞ୍ଚଳର ବିଭିନ୍ନ ଦୋକାନ ଓ ବାଣିଜ୍ୟିକ ପ୍ରତିଷ୍ଠାନ ଯଥା ଗ୍ୟାରେଜ, ଢାବା, ହୋଟେଲ, ସପିଙ୍ଗ ମଲ ଇତ୍ୟାଦିରେ ଚଢ଼ାଉ କରିବାସହ ସଚେତନତା କରାଯାଇଥିଲା। ଏହି ସ୍ୱତନ୍ତ୍ର ଚଢ଼ାଉ ସମୟରେ ବାଲୁଗାଁ ମାଛ ମାର୍କେଟ ଅଞ୍ଚଳରୁ ଜଣେ ଶିଶୁ ଶ୍ରମିକ ନିୟୋଜିତ ହୋଇଥିବା ପରିଲକ୍ଷିତ ହେବା ପରେ ତାଙ୍କୁ ତୁରନ୍ତ ଉଦ୍ଧାର କରାଯାଇ ଖୋର୍ଦ୍ଧା ଶିଶୁ କଲ୍ୟାଣ କମିଟିକୁ ହସ୍ତାନ୍ତର କରାଯାଇ ଥିବାବେଳେ ସମ୍ପୃକ୍ତ ମାଲିକଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ବାଲୁଗାଁ ସହ ଶ୍ରମ ଅଧିକାରୀ ଶ୍ରୀ କର ସୂଚନା ଦେଇଛନ୍ତି। ସମ୍ପୃକ୍ତ ଶିଶୁ ଶ୍ରମିକ ଜଣକ ବାଲୁଗାଁ ସାମନ୍ତରାପୂର ସାହିର ରାକେଶ ବେହେରା (୧୪) ଓ ମାଲିକ ମୁସଲିମ ସାହିର ସାବିର ଉଦ୍ଦିନ ଅହମ୍ମଦ ବୋଲି ଜଣାପଡ଼ିଛି।