ରାଷ୍ଟ୍ରପତି ଟ୍ରମ୍ପ ସୋସିଆଲ ମିଡିଆରେ ପୋଷ୍ଟ କରି ଜଣାଇଥିଲେ ଯେ, ସେ ଇରାନ ସହ ଶାନ୍ତି ଚୁକ୍ତି ସମ୍ପର୍କରେ ଚୂଡ଼ାନ୍ତ ନିଷ୍ପତ୍ତି ନେବାକୁ 'ସିଚ୍ୟୁଏସନ ରୁମ୍'ରେ ବୈଠକ କରୁଛନ୍ତି। ସ୍ବାକ୍ଷର ହେବାକୁ ଯାଉଥିବା ପ୍ରସ୍ତାବିତ ଚୁକ୍ତିର ସର୍ତ୍ତ ଅନୁଯାୟୀ ଇରାନ ନିଜର ସମସ୍ତ ସମୃଦ୍ଧ ୟୁରାନିୟମ୍ ନଷ୍ଟ କରିବାକୁ କିମ୍ବା ଆମେରିକାକୁ ହସ୍ତାନ୍ତର କରିବାକୁ ରାଜି ହୋଇଛି। ଏଥିସହ ଗୁରୁତ୍ୱପୂର୍ଣ୍ଣ ସାମୁଦ୍ରିକ ବାଣିଜ୍ୟ ପଥ ହର୍ମୁଜ ପ୍ରଣାଳୀକୁ ଇରାନ ସମ୍ପୂର୍ଣ୍ଣ ମୁକ୍ତ କରିବ ଏବଂ ସେଠାରେ ବିଛାଯାଇଥିବା ସମସ୍ତ ସାମୁଦ୍ରିକ ମାଇନ୍ସ ହଟାଇବ। ବଦଳରେ ଆମେରିକା ଇରାନ ବନ୍ଦରଗୁଡ଼ିକ ଉପରୁ ନିଜର ନୌସେନା ଅବରୋଧ ହଟାଇବ ଏବଂ କେତେକ ଆର୍ଥିକ କଟକଣା କୋହଳ କରିବ।

ଇରାନ କହିଛି ଯେ, ଚୁକ୍ତିର ଚିଠା ପ୍ରସ୍ତାବ ଅନୁଯାୟୀ ହର୍ମୁଜ ପ୍ରଣାଳୀ ଦେଇ ଯାତାୟାତ କରୁଥିବା ଜାହାଜଗୁଡ଼ିକ ଠାରୁ କୌଣସି ଶୁଳ୍କ ନିଆଯିବ ନାହିଁ ବୋଲି ଟ୍ରମ୍ପ ଯାହା କହିଛନ୍ତି, ତାହା ସମ୍ପୂର୍ଣ୍ଣ ମିଥ୍ୟା। ସେଭଳି କୌଣସି ସର୍ତ୍ତ ଚିଠା ଚୁକ୍ତିରେ ନାହିଁ। ଇରାନର ଜଣେ ବରିଷ୍ଠ ଅଧିକାରୀ ଜଣାଇଛନ୍ତି ଯେ, ପ୍ରାଥମିକ ସହମତିପତ୍ରରେ ପରମାଣୁ ପ୍ରସଙ୍ଗ ସାମିଲ ନାହିଁ। ଇରାନ ନିଜର ସମୃଦ୍ଧ ୟୁରାନିୟମ୍ ଭଣ୍ଡାର ଆମେରିକାକୁ ଦେବା କଥାକୁ ସମ୍ପୂର୍ଣ୍ଣ ସେ ଅସ୍ୱୀକାର କରିଛନ୍ତି।

ଇରାନ କହିଛି ଯେ ଚୁକ୍ତିଟି ଏବେ ବି ସେମାନଙ୍କର ସର୍ବୋଚ୍ଚ ସୁରକ୍ଷା ପରିଷଦର ଅନୁମୋଦନ ଅପେକ୍ଷାରେ ଅଛି ଏବଂ ଏହା ଚୂଡ଼ାନ୍ତ ହୋଇ ନାହିଁ। ଆମେରିକା ନିଜେ ଏଭଳି ମନଗଢ଼ା ଦାବି କରୁଛି। ଉଭୟ ଆମେରିକା ଓ ଇରାନ ମଧ୍ୟରେ ଗତ କିଛି ମାସ ଧରି ଚାଲିଥିବା ଯୁଦ୍ଧ ଭିତରେ ୬୦ ଦିନିଆ ଅସ୍ଥାୟୀ ଯୁଦ୍ଧବିରତି ଏବଂ ଆଲୋଚନା ପାଇଁ ଏକ ପ୍ରାଥମିକ ରାଜିନାମା ହୋଇଛି। କିନ୍ତୁ ପରମାଣୁ କାର୍ଯ୍ୟକ୍ରମ ଏବଂ ସାମୁଦ୍ରିକ ସୀମା ଶୁଳ୍କକୁ ନେଇ ଦୁଇ ଦେଶର ଭିନ୍ନ ଭିନ୍ନ ବୟାନ ଯୋଗୁଁ ଏହି ଚୁକ୍ତି ସଫଳ ହେବ କି ନାହିଁ, ତାହାକୁ ନେଇ ସନ୍ଦେହ ପ୍ରକାଶ ପାଇଛି।