ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଘୋଷଣା କରିଛନ୍ତି ଯେ, ସରକାରୀ ମେଡିକାଲ ଓ ଇଞ୍ଜିନିୟରିଂ କଲେଜଗୁଡ଼ିକରେ ନାମଲେଖା ସମୟରେ ଏବଂ ତା'ର ପରବର୍ତ୍ତୀ ୬ ମାସ ପର୍ଯ୍ୟନ୍ତ ଏସ୍‌ସି ଓ ଏସ୍‌ଟି ବର୍ଗର ଛାତ୍ରଛାତ୍ରୀମାନଙ୍କୁ କୌଣସି ପ୍ରକାର ନାମଲେଖା ଫି', ଟ୍ୟୁସନ ଫି' କିମ୍ବା ଅନ୍ୟାନ୍ୟ ଦେୟ ଜମା କରିବାକୁ ପଡ଼ିବ ନାହିଁ। ସରକାରଙ୍କ ଏହି ସଂସ୍କାରମୂଳକ ପଦକ୍ଷେପ ଶିକ୍ଷା କ୍ଷେତ୍ରରେ ଏକ ନୂତନ ଅଧ୍ୟାୟ ଯୋଡ଼ିଛି।

ସାଧାରଣତଃ ଏସ୍‌ସି ଓ ଏସ୍‌ଟି ବର୍ଗର ମେଧାବୀ ଛାତ୍ରଛାତ୍ରୀମାନେ ଅନେକ ଆହ୍ୱାନ, ସଂଘର୍ଷ ଓ ସାମାଜିକ-ଆର୍ଥିକ ପ୍ରତିକୂଳତା ସତ୍ତ୍ୱେ ନିଜ ନିଷ୍ଠା ବଳରେ ଜାତୀୟ ଓ ରାଜ୍ୟସ୍ତରୀୟ ପ୍ରତିଯୋଗିତାମୂଳକ ପରୀକ୍ଷାରେ ଉତ୍ତୀର୍ଣ୍ଣ ହୋଇ ସରକାରୀ ମେଡିକାଲ ଓ ଇଞ୍ଜିନିୟରିଂ କଲେଜଗୁଡ଼ିକରେ ପଢ଼ିବା ପାଇଁ ଯୋଗ୍ୟତା ହାସଲ କରିଥାନ୍ତି। ହେଲେ ନାମଲେଖା ସମୟରେ ଏକାଥରକେ ମୋଟା ଅଙ୍କର ଅର୍ଥ ଜମା କରିବା ସେମାନଙ୍କ ଓ ସେମାନଙ୍କ ପରିବାର ପାଇଁ ଏକ ବଡ଼ ସମସ୍ୟା ହୋଇପଡ଼ିଥାଏ। ଅନେକ ସମୟରେ ଅର୍ଥାଭାବ ଯୋଗୁଁ ଯୋଗ୍ୟତା ଥାଇ ମଧ୍ୟ ଅନେକ ଗରିବ ଛାତ୍ରଛାତ୍ରୀ ନାମଲେଖାଇବାରୁ ବଞ୍ଚିତ ହେବାର ଆଶଙ୍କା ସୃଷ୍ଟି ହୋଇଥାଏ। ଏହି ଗମ୍ଭୀର ସମସ୍ୟାର ସ୍ଥାୟୀ ସମାଧାନ ପାଇଁ ମୁଖ୍ୟମନ୍ତ୍ରୀ ଏହି ଜନକଲ୍ୟାଣକାରୀ ନିଷ୍ପତ୍ତି ନେଇଛନ୍ତି। ନିୟମାନୁସାରେ, ଏହି ବର୍ଗର ଛାତ୍ରଛାତ୍ରୀମାନେ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ ପ୍ରକାର ଶିକ୍ଷା ବୃତ୍ତି ପାଇବା ପାଇଁ ହକ୍‌ଦାର ହୋଇଥାନ୍ତି।

ତେବେ ବୃତ୍ତି ପାଇଁ ଆବେଦନ ପ୍ରକ୍ରିୟା ଶେଷ ହୋଇ ସେମାନଙ୍କ ବ୍ୟାଙ୍କ ଆକାଉଣ୍ଟକୁ ଟଙ୍କା ଆସିବା ପାଇଁ ପ୍ରାୟ ୩ରୁ ୪ ମାସ ସମୟ ଲାଗିଥାଏ। ନୂତନ ନିୟମ ଅନୁସାରେ, ଛାତ୍ରଛାତ୍ରୀମାନେ ବୃତ୍ତି ଟଙ୍କା ହାତକୁ ପାଇବା ପରେ ଅତି ସହଜରେ ଓ ସୁବିଧାରେ ନିଜର ନାମଲେଖା ଓ ଟ୍ୟୁସନ ଫି' ଜମା କରିପାରିବେ। ଏହାଦ୍ୱାରା ନାମଲେଖା ସମୟରେ ପରିବାର ଉପରେ ପଡ଼ୁଥିବା ହଠାତ୍ ଆର୍ଥିକ ଚାପ ସମ୍ପୂର୍ଣ୍ଣ ଦୂର ହୋଇପାରିବ। ପୂର୍ବରୁ ମଧ୍ୟ ମୋହନ ମାଝୀଙ୍କ ସରକାର ଏସ୍‌ସି ଓ ଏସ୍‌ଟି ବର୍ଗର ଛାତ୍ରଛାତ୍ରୀମାନଙ୍କ ପାଇଁ ମେଡିକାଲ, ଇଞ୍ଜିନିୟରିଂ ସମେତ ବିଭିନ୍ନ ବୈଷୟିକ ଶିକ୍ଷାନୁଷ୍ଠାନରେ ପ୍ରଚଳିତ ସଂରକ୍ଷଣ ହାରକୁ ପ୍ରାୟ ଦ୍ୱିଗୁଣିତ କରି ଏକ ଯୁଗାନ୍ତକାରୀ ନିଷ୍ପତ୍ତି ନେଇଥିଲେ। ବର୍ତ୍ତମାନ ଆଡମିଶନ ଫି' କୋମଳ କରିବା ନିଷ୍ପତ୍ତି ଏହି ବର୍ଗର ଛାତ୍ରଛାତ୍ରୀ ଓ ସେମାନଙ୍କ ଅଭିଭାବକଙ୍କ ମଧ୍ୟରେ ଅଭୂତପୂର୍ବ ଆଶ୍ୱାସନା ଓ ଉତ୍ସାହ ଭରିଦେଇଛି। ଏହି ନୂତନ ବ୍ୟବସ୍ଥାକୁ ରାଜ୍ୟସାରା ସୁଚାରୁରୂପେ କାର୍ଯ୍ୟକାରୀ କରିବା ପାଇଁ ରାଜ୍ୟ ସରକାରଙ୍କ ପକ୍ଷରୁ ଅତି ଶୀଘ୍ର ଏକ ବିଶେଷ ମାର୍ଗଦର୍ଶିକା ଜାରି କରାଯିବ।