ୱାଶିଂଟନ୍: ଆମେରିକାର ପ୍ରତିରକ୍ଷା ପ୍ରଶାସନ ମଧ୍ୟରେ ଅଭାବନୀୟ ବିବାଦ ଓ ମତଭେଦ ସାମ୍ନାକୁ ଆସିବା ପରେ ଆମେରିକୀୟ ସେନା ସଚିବ ଡାନ ଡ୍ରିସକୋଲ ନିଜ ପଦବୀରୁ ଇସ୍ତଫା ଦେଇଛନ୍ତି। ପ୍ରତିରକ୍ଷା ସଚିବ ପିଟ୍ ହେଗସେଥଙ୍କ ସହ ତାଙ୍କର ତୀବ୍ର ମତଭେଦ ଓ ଆଭ୍ୟନ୍ତରୀଣ ତିକ୍ତତା ସୃଷ୍ଟି ହୋଇଥିବା ନେଇ ଗଣମାଧ୍ୟମରେ ଖବର ପ୍ରକାଶ ପାଇବା ପରେ ହ୍ୱାଇଟ୍ ହାଉସ୍ ସୋମବାର ଏହି ଇସ୍ତଫା ସମ୍ପର୍କରେ ଆଧିକାରିକ ସ୍ପଷ୍ଟୀକରଣ ଦେଇଛି।
ସେନା ସଚିବଙ୍କ ନିଷ୍ପତ୍ତିକୁ ନେଇ ଆମେରିକା ପ୍ରଶାସନିକ ଏବଂ ସାମରିକ ବଳୟରେ ବ୍ୟାପକ ଚର୍ଚ୍ଚା ଜୋର ଧରିଛି।
ଏକ ସମ୍ବାଦପତ୍ରରେ ପ୍ରକାଶିତ ରିପୋର୍ଟ ସମ୍ପର୍କରେ ପଚରାଯିବାରୁ ହ୍ୱାଇଟ୍ ହାଉସର ମୁଖ୍ୟ ଉପ ପ୍ରେସ୍ ସଚିବ ଆନା କେଲି ଏହାକୁ ଅସ୍ୱୀକାର କରିନଥିଲେ। ଡ୍ରିସକୋଲଙ୍କ ଅବଦାନକୁ ପ୍ରଶଂସା କରି ସେ ପ୍ରକାଶ କରିଛନ୍ତି ଯେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନୀତି ଓ ଆଭିମୁଖ୍ୟକୁ ଆଗକୁ ନେବାରେ ସେନା ସଚିବଙ୍କ ପ୍ରମୁଖ ଏବଂ ପ୍ରଭାବଶାଳୀ ଭୂମିକା ରହିଥିଲା। ସୈନ୍ୟବାହିନୀର ପ୍ରସ୍ତୁତି, ଯୁଦ୍ଧ କ୍ଷମତା ବୃଦ୍ଧି ଏବଂ ଐତିହାସିକ ସାମରିକ ଅଭିଯାନଗୁଡ଼ିକର ସଫଳ ପରିଚାଳନାରେ ସେ ଗୁରୁତ୍ୱପୂର୍ଣ୍ଣ ସହଯୋଗ କରିଥିଲେ। ଏଥିସହିତ ରୁଷିଆ ଏବଂ ୟୁକ୍ରେନ ମଧ୍ୟରେ ଚାଲିଥିବା ଶାନ୍ତି ଆଲୋଚନାରେ ମଧ୍ୟ ସେ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଥିଲେ।