କୁଖ୍ୟାତ ଅପରାଧୀ ରାଜା ସାହାଣୀଙ୍କୁ ୨୦ କୋଟି ଟଙ୍କାର ସୁନା ଗହଣା ଲୁଟ୍ ମାମଲାରେ ପଚରାଉଚରା ପାଇଁ ୭ ଦିନିଆ ରିମାଣ୍ଡରେ ନେବାକୁ ଜେଏମଏଫସି କୋର୍ଟ ଅନୁମତି ଦେଇଛନ୍ତି।
ଏହି ଅନୁସାରେ, କର୍ଣ୍ଣାଟକ ପୋଲିସ ଆସନ୍ତା ୯ ତାରିଖରୁ ୧୫ ତାରିଖ ପର୍ଯ୍ୟନ୍ତ ତାଙ୍କୁ ରିମାଣ୍ଡରେ ନେଇ ଗଭୀର ପଚରାଉଚରା କରିବ।
ସୂଚନାଯୋଗ୍ୟ, ପ୍ରାୟ ୬ ମାସ ପରେ ରାଜା ସାହାଣୀଙ୍କୁ ପୁଣିଥରେ ଚୌଦ୍ବାର ଜେଲକୁ ଆଣାଯାଇଛି। ପୂର୍ବରୁ ସେ ଜେଲର ୩ ନମ୍ବର ୱାର୍ଡର ୨ ନମ୍ବର ସେଲରେ ରହୁଥିବାବେଳେ, ଏବେ ତାଙ୍କୁ ହାଇ ସିକ୍ୟୁରିଟି ସେଲରେ ରଖାଯାଇଛି।
ତାଙ୍କ ଗତିବିଧି ଉପରେ କଡା ନଜର ରଖିବା ପାଇଁ ଜେଲ ପ୍ରଶାସନ ପକ୍ଷରୁ ବିଶେଷ ବ୍ୟବସ୍ଥା ଗ୍ରହଣ କରାଯାଇଛି। ତିନିଜଣ ସ୍ୱତନ୍ତ୍ର ଜେଲ ଅଧିକାରୀଙ୍କୁ ୨୪ ଘଣ୍ଟିଆ ନଜରଦାରୀ ପାଇଁ ନିଯୁକ୍ତ କରାଯାଇଥିବାବେଳେ, ଡବଲ ସିସିଟିଭି ସର୍ଭେଲାନ୍ସ ମାଧ୍ୟମରେ ମଧ୍ୟ ତାଙ୍କ ଉପରେ ନିରନ୍ତର ନଜର ରଖାଯାଉଛି। ସେହିପରି, ସିସିଟିଭି ମନିଟରିଂ ପାଇଁ ଅଲଗା ଟିମ୍ ମଧ୍ୟ ନିଯୁକ୍ତ ରହିଛି।
ଜେଲ ଭିତରେ ତାଙ୍କ ସୁରକ୍ଷା ଓ ନିୟନ୍ତ୍ରଣକୁ ଆହୁରି କଡା କରିବା ପାଇଁ ତାଙ୍କୁ ସ୍ୱତନ୍ତ୍ର ଚିହ୍ନ ଭାବେ ରେଡ୍ କ୍ୟାପ୍ ମଧ୍ୟ ଦିଆଯାଇଛି। ଏହି ସବୁ ବ୍ୟବସ୍ଥା ମଧ୍ୟରେ କର୍ଣ୍ଣାଟକ ପୋଲିସ ରିମାଣ୍ଡ ସମୟରେ ମାମଲା ସମ୍ବନ୍ଧୀୟ ଅଧିକ ସୂଚନା ସଂଗ୍ରହ କରିବାକୁ ପ୍ରୟାସ କରିବ।
Tags20 crore7-day remandlootRaja Sahani