ତେବେ ଭାରତ ଗସ୍ତର ନିର୍ଦ୍ଦିଷ୍ଟ ତାରିଖ ଏପର୍ଯ୍ୟନ୍ତ ସ୍ଥିର ହୋଇନାହିଁ।

ବାଲେନ୍ଦ୍ର "ବାଲେନ୍" ଶାହ ମାର୍ଚ୍ଚ ୨୦୨୬ରେ ନେପାଳର ପ୍ରଧାନମନ୍ତ୍ରୀ ଭାବେ ଦାୟିତ୍ୱ ନେଇଥିଲେ। ଦାୟିତ୍ୱ ନେବା ପରଠାରୁ ସେ ଏପର୍ଯ୍ୟନ୍ତ କୌଣସି ସରକାରୀ ବିଦେଶ ଗସ୍ତ କରିନାହାନ୍ତି।

ସମ୍ଭାବ୍ୟ ଭାରତ ଗସ୍ତ ପୂର୍ବରୁ ଏପ୍ରିଲ୍‌ରେ ନେପାଳ ପ୍ରଧାନମନ୍ତ୍ରୀ ଓ ଭାରତୀୟ ରାଷ୍ଟ୍ରଦୂତ ନବୀନ ଶ୍ରୀବାସ୍ତବଙ୍କ ମଧ୍ୟରେ ପ୍ରଥମ ଥର ପାଇଁ ଏକାନ୍ତ ବୈଠକ ହୋଇଥିଲା। ଏହି ବୈଠକରେ ଦୁଇ ଦେଶର ସମ୍ପର୍କ, ବିକାଶମୂଳକ ସହଯୋଗ ଏବଂ ପାରସ୍ପରିକ ସ୍ୱାର୍ଥ ସହ ଜଡିତ ବିଭିନ୍ନ ପ୍ରସଙ୍ଗ ଉପରେ ଆଲୋଚନା ହୋଇଥିଲା।

ନେପାଳରେ ଭୟଙ୍କର ବନ୍ୟା ପରେ ଭାରତ ପକ୍ଷରୁ ମାନବିକ ସହାୟତା ବଢ଼ାଯାଇଥିବା ସମୟରେ ପ୍ରଧାନମନ୍ତ୍ରୀଙ୍କ ସମ୍ଭାବ୍ୟ ଭାରତ ଗସ୍ତର ଖବର ଆସିଛି। ବନ୍ୟା ପ୍ରଭାବିତ ନେପାଳକୁ ଭାରତ ପକ୍ଷରୁ ପ୍ରାୟ ୪୭.୫ ଟନ୍‌ ରିଲିଫ୍‌ ସାମଗ୍ରୀ ପଠାଯାଇଛି। ଏଥିରେ ଜରୁରୀ ଖାଦ୍ୟ ସାମଗ୍ରୀ, ଅସ୍ଥାୟୀ ଆଶ୍ରୟ ପାଇଁ ଟେଣ୍ଟ, ଔଷଧ, କମ୍ବଳ, ସ୍ୱଚ୍ଛତା ସାମଗ୍ରୀ, ସୌର ଶକ୍ତିରେ ଚାଲୁଥିବା ଲ୍ୟାମ୍ପ ଆଦି ରହିଛି।

ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ନେପାଳ ପ୍ରଧାନମନ୍ତ୍ରୀ ବାଲେନ୍ ଶାହଙ୍କ ସହ ଫୋନ୍‌ରେ କଥା ହୋଇଥିଲେ। ଆବଶ୍ୟକ ସମସ୍ତ ସହାୟତା ଭାରତ ଜାରି ରଖିବ ବୋଲି ସେ ଶାହଙ୍କୁ ଆଶ୍ୱାସନ ଦେଇଥିଲେ। ଏହାସହ ଉଦ୍ଧାର ଓ ରିଲିଫ୍‌ କାର୍ଯ୍ୟରେ ଭାରତୀୟ ଟିମ୍‌ ନେପାଳ ସହ ସମନ୍ୱୟ ରକ୍ଷା କରିବ ବୋଲି କହିଥିଲେ।

ଏହି ପରିପ୍ରେକ୍ଷୀରେ ଅର୍ଥମନ୍ତ୍ରୀ ସ୍ୱର୍ଣ୍ଣିମ ୱାଗ୍ଲେଙ୍କ ବୟାନ ଭାରତ-ନେପାଳ ସମ୍ପର୍କ ପାଇଁ ଗୁରୁତ୍ୱପୂର୍ଣ୍ଣ। ଦୁଇ ଦେଶ ମଧ୍ୟରେ ଦୀର୍ଘଦିନର ସମ୍ପର୍କ ରହିଛି ଏବଂ ବିପର୍ଯ୍ୟୟ ସମୟରେ ଭାରତର ସହାୟତା ଏହି ସମ୍ପର୍କକୁ ଆହୁରି ମଜବୁତ କରୁଛି।

ୱାଗ୍ଲେ କହିଛନ୍ତି ଯେ, ଭାରତ ଗସ୍ତର ସମସ୍ତ ବିବରଣୀ ଚୂଡ଼ାନ୍ତ କରିବାକୁ ଆଶା କରାଯାଉଛି। ଏହି ଗସ୍ତ ସମୟରେ ନେପାଳର ଅର୍ଥନୀତିକୁ ଆହୁରି ବିକଶିତ କରିବା ନେଇ ଭାରତର ଯୋଜନା ଓ ଦୃଷ୍ଟିକୋଣ ଉପରେ ମଧ୍ୟ ଆଲୋଚନା ହୋଇପାରେ।

About the Author

Author

Post navigation
Previous: ଲଦାଖବାସୀଙ୍କ ପାଇଁ ବଡ଼ ଖବର: ଲଦାଖରେ ହାଇକୋର୍ଟ ବେଞ୍ଚ ପାଇଁ ରାଷ୍ଟ୍ରପତିଙ୍କ ମୋହରNext: ପୁଅର ଜିଦ୍ ପାଇଁ ଗଲା ଜୀବନ : ମଟନ ପାଇଁ ନିଜ ପୁଅକୁ ପିଟି ପିଟି ମାରିଦେଲେ ବାପା