ਤੇਜ਼ ਤਰਾਰ ਤੂਫ਼ਾਨਾਂ ਤਾਈਂ ਹਿੱਕ 'ਤੇ ਜਰਦੇ ਰਹਿਣਾ
ਤੇ ਆਪਣੇ ਬਲਬੂਤੇ ਦੀ ਪਰਿਕਰਮਾ ਕਰਦੇ ਰਹਿਣਾ
ਮੱਤ ਨਸੀਹਤ ਜਾਂ ਮਸ਼ਵਰਾ ਜੋ ਜੀਅ ਚਾਹੇ ਸਮਝੀਂ
ਜਿੱਤਣ ਦੇ ਲਈ ਕਦੇ ਕਦਾਈਂ ਬਾਜ਼ੀ ਹਰਦੇ ਰਹਿਣਾ
ਰੁਖ਼ ਹਵਾ ਦਾ ਕੁਝ ਵੀ ਹੋਵੇ ਛੱਲਾਂ ਕਰਨ ਲੜਾਈਆਂ
ਭੁੱਲ ਥਕਾਨਾਂ ਜੀਵਨ ਵਾਲਾ ਸਾਗਰ ਤਰਦੇ ਰਹਿਣਾ
ਡਰਨਾ ਡੁਰਨਾ ਕਿਹੜੀ ਗੱਲੋਂ ਜੋ ਲਿਖਿਆ ਸੋ ਹੋਣਾ
ਜਿਸ ਨੂੰ ਜਾ ਕੇ ਸ਼ਕਲ ਵਿਖਾਉਣੀ ਉਸਤੋਂ ਡਰਦੇ ਰਹਿਣਾ
ਰਾਹਾਂ ਵਿੱਚ ਰੋੜੇ ਅਟਕਾਏ ਲੱਖ ਜ਼ਮਾਨਾ ਭਾਵੇਂ
ਮੁਕਤੀ ਖ਼ਾਤਿਰ ਬਸ ਗੁਰੂ ਦਾ ਪਾਣੀ ਭਰਦੇ ਰਹਿਣਾ
ਧਾਪ ਦੋਸਤਾ ਕਰੇ ਕਲੋਲਾਂ ਮੌਸਮ ਛੇੜੇ ਕੰਬਣੀ
ਜਦ ਸੂਰਜ ਹੈ ਦਿਲ ਦੇ ਅੰਦਰ ਫਿਰ ਕੀ ਠਰਦੇ ਰਹਿਣਾ