Saturday, 18 Jan, 11.26 pm ਨਵਾਂ ਜ਼ਮਾਨਾ

ਰਾਸ਼ਟਰੀ
ਕੋਲਕਾਤਾ ਦਾ ਪਾਰਕ ਵੀ ਬਣਿਆ ਸ਼ਾਹੀਨ ਬਾਗ

ਕੋਲਕਾਤਾ : ਨਾਗਰਿਕਤਾ ਸੋਧ ਕਾਨੂੰਨ (ਸੀ ਏ ਏ) ਅਤੇ ਐੱਨ ਆਰ ਸੀ ਖਿਲਾਫ਼ ਦੇਸ਼ ਭਰ 'ਚ ਵਿਦਿਆਰਥੀ, ਨਾਗਰਿਕ, ਸਮਾਜ ਦੇ ਲੋਕ ਅਤੇ ਔਰਤਾਂ ਦਾ ਪ੍ਰਦਰਸ਼ਨ ਜਾਰੀ ਹੈ। ਦਿੱਲੀ ਦੇ ਸ਼ਾਹੀਨ ਬਾਗ 'ਚ ਔਰਤਾਂ ਦੇ ਧਰਨੇ ਨੂੰ ਹਟਾਉਣ ਅਤੇ ਬਚਾਉਣ ਦੀਆਂ ਕੋਸ਼ਿਸ਼ਾਂ ਲਗਾਤਾਰ ਜਾਰੀ ਹਨ, ਇਸ ਦੌਰਾਨ ਦੇਸ਼ ਦੇ ਕਈ ਇਲਾਕਿਆਂ 'ਚ ਸ਼ਾਹੀਨ ਬਾਗ ਵਰਗੇ ਮੋਰਚੇ ਖੁੱਲ੍ਹ ਗਏ ਹਨ। ਕੋਲਕਾਤਾ 'ਚ ਔਰਤਾਂ 7 ਜਨਵਰੀ ਤੋਂ ਪਾਰਕ ਸਰਕਾਰ ਮੈਦਾਨ 'ਚ ਧਰਨਾ ਦੇ ਰਹੀਆਂ ਹਨ। ਇਨ੍ਹਾਂ ਔਰਤਾਂ ਦਾ ਕਹਿਣਾ ਹੈ ਕਿ ਜਦ ਤੱਕ ਉਨ੍ਹਾਂ ਦੇ ਹੱਕ 'ਚ ਫੈਸਲਾ ਨਹੀਂ ਆ ਜਾਂਦਾ, ਉਦੋਂ ਤੱਕ ਉਹ ਇੱਥੋਂ ਨਹੀਂ ਉਠਣਗੀਆਂ। ਇਹ ਵਿਰੋਧ ਪ੍ਰਦਰਸ਼ਨ ਦਿੱਲੀ ਦੇ ਸ਼ਾਹੀਨ ਬਾਗ 'ਚ ਹੋ ਰਹੇ ਧਰਨਾ ਪ੍ਰਦਰਸ਼ਨ ਦੀ ਤਰ੍ਹਾਂ ਹੀ ਹੈ। ਇਸ ਪ੍ਰਦਰਸ਼ਨ 'ਚ ਕੰਮਕਾਜੀ ਔਰਤਾਂ ਤੋਂ ਲੈ ਕੇ ਆਮ ਘਰੇਲੂ ਔਰਤਾਂ ਵੀ ਹਿੱਸਾ ਲੈ ਰਹੀਆਂ ਹਨ। ਧਰਨਾ ਦੇ ਰਹੀਆਂ ਔਰਤਾਂ 'ਚੋਂ ਇੱਕ ਨੌਜਵਾਨ ਲੜਕੀ ਨੌਸ਼ੀਨ ਬਾਬਾ ਖਾਨ ਨੇ ਕਿਹਾ, ''ਇਹ 'ਕਰੋ ਜਾਂ ਮਰੋ' ਦੀ ਲੜਾਈ ਹੈ। ਅਸੀਂ ਇੱਥੇ ਸ਼ਾਂਤੀ ਨਾਲ ਉਦੋਂ ਤੱਕ ਬੈਠਾਂਗੀਆਂ, ਜਦੋਂ ਤੱਕ ਫੈਸਲਾ ਸਾਡੇ ਹੱਕ 'ਚ ਨਹੀਂ ਆ ਜਾਂਦਾ।''
ਸੀ ਏ ਏ ਨੂੰ ਲੈ ਕੇ ਪਾਈਆਂ ਗਈਆਂ 59 ਪਟੀਸ਼ਨਾਂ 'ਤੇ ਸੁਣਵਾਈ 22 ਜਨਵਰੀ ਨੂੰ ਸੁਪਰੀਮ ਕੋਰਟ 'ਚ ਹੋਣੀ ਹੈ। ਇਸ ਨੂੰ ਲੈ ਕੇ ਉਨ੍ਹਾਂ ਕਿਹਾ, 'ਦੇਖੋ ਕੀ ਹੁੰਦਾ ਹੈ! ਅਦਾਲਤੀ ਮਾਮਲਿਆਂ 'ਤੇ ਟਿੱਪਣੀ ਨਹੀਂ ਕਰਨਾ ਚਾਹੁੰਦੀਆਂ, ਪਰ ਜੇਕਰ ਫੈਸਲਾ ਸਾਡੇ ਹੱਕ 'ਚ ਨਾ ਆਇਆ ਤਾਂ ਧਰਨਾ ਜਾਰੀ ਰਹੇਗਾ।'

ਫਰਹਤ ਇਸਲਾਮ ਨੇ ਕਿਹਾ, 'ਅਸੀਂ ਇੱਥੇ ਠੰਢ ਨੂੰ ਝੱਲ ਰਹੇ ਹਾਂ। ਅਸੀਂ ਬੀਤੇ 10 ਦਿਨਾਂ ਤੋਂ ਕਰੀਬ 100 ਮੀਟਰ ਦੂਰ ਸਥਿਤ ਮਸਜਿਦ 'ਚ ਔਰਤਾਂ ਦੇ ਬਾਥਰੂਮ ਦਾ ਇਸਤੇਮਾਲ ਕਰ ਰਹੀਆਂ ਹਾਂ, ਪਰ ਕਦੀ ਇੱਥੋਂ ਹਟਣ ਬਾਰੇ ਨਹੀਂ ਸੋਚਿਆ।' ਜ਼ਿਕਰਯੋਗ ਹੈ ਕਿ ਯੂ ਪੀ 'ਚ ਲਖਨਊ, ਇਲਾਹਾਬਾਦ, ਕਾਨਪੁਰ ਤੋਂ ਇਲਾਵਾ ਬਿਹਾਰ ਦੇ ਗਯਾ 'ਚ ਵੀ ਸ਼ਾਹੀਨ ਬਾਗ ਦੀ ਝਲਕ ਦੇਖਣ ਨੂੰ ਮਿਲ ਰਹੀ ਹੈ। ਇੱਥੇ ਜਾਰੀ ਪ੍ਰਦਰਸ਼ਨਾਂ 'ਚ ਵੱਡੀ ਗਿਣਤੀ 'ਚ ਔਰਤਾਂ ਅਤੇ ਵਿਦਿਆਰਥੀ ਸ਼ਾਮਲ ਹਨ। ਇੱਥੇ ਇਨਕਲਾਬ ਜ਼ਿੰਦਾਬਾਦ, ਲੜਾਂਗੇ ਜਿੱਤਾਂਗੇ, ਹਿੰਦੁਸਤਾਨ ਜ਼ਿੰਦਾਬਾਦ ਦੇ ਨਾਅਰੇ ਲਾਏ ਜਾਂਦੇ ਹਨ। ਪ੍ਰਦਰਸ਼ਨਕਾਰੀ ਰੰਗੀਨ ਤਖ਼ਤੀਆਂ, ਪੋਸਟਰ ਅਤੇ ਬੈਨਰ ਲੈ ਕੇ ਰਾਤ ਭਰ ਪ੍ਰਦਰਸ਼ਨ ਕਰ ਰਹੇ ਹਨ।
Dailyhunt
Disclaimer: This story is auto-aggregated by a computer program and has not been created or edited by Dailyhunt. Publisher: Daily Nawan Zamana
Top