ਨਾਭਾ ਨਗਰ ਕੌਂਸਲ ਚੋਣਾਂ ਦੌਰਾਨ ਵਾਰਡ ਨੰਬਰ 22 ਦਾ ਨਤੀਜਾ ਸਭ ਤੋਂ ਹੈਰਾਨੀਜਨਕ ਰਿਹਾ। ਇੱਥੇ ਕਿਸਾਨਾਂ ਦੀ ਟਰਾਲੀ ਚੋਰੀ ਦੇ ਦੋਸ਼ਾਂ ਹੇਠਾਂ ਘਿਰਨ ਵਾਲੇ ਪੰਕਜ ਪੱਪੂ ਦੀ ਪਤਨੀ ਅਤੇ ਸਾਬਕਾ ਨਗਰ ਕੌਂਸਲ ਪ੍ਰਧਾਨ ਸੁਜਾਤਾ ਚਾਵਲਾ ਨੇ ਆਜ਼ਾਦ ਉਮੀਦਵਾਰ ਵਜੋਂ ਚੋਣ ਲੜ ਕੇ 890 ਵੋਟਾਂ ਦੇ ਵੱਡੇ ਫ਼ਰਕ ਨਾਲ ਜਿੱਤ ਪ੍ਰਾਪਤ ਕੀਤੀ ਹੈ। ਟਰਾਲੀ ਚੋਰੀ ਦੇ ਦੋਸ਼ਾ ਵਿੱਚ ਘਿਰਨ ਮਗਰੋਂ ਆਮ ਆਦਮੀ ਪਾਰਟੀ (ਆਪ) ਵੱਲੋਂ ਸੁਜਾਤਾ ਚਵਾਲਾ ਅਤੇ ਪੰਕਜ ਪੱਪੂ ਨੂੰ ਪਾਰਟੀ 'ਚੋਂ ਮੁਅੱਤਲ ਕਰ ਦਿੱਤਾ ਗਿਆ ਸੀ।

ਉੱਥੇ ਹੀ ‘ਆਪ’ ਉਮੀਦਵਾਰ ਨੂੰ ਸਿਰਫ਼ 15 ਵੋਟਾਂ ਹੀ ਮਿਲ ਸਕੀਆਂ ਹਨ।

ਇੱਥੇ ਇਹ ਗੱਲ ਵੀ ਕਾਫ਼ੀ ਦਿਲਚਸਪ ਰਹੀ ਕਿ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਭੁਪਿੰਦਰ ਸਿੰਘ ਦੇ ਨਾਮਜ਼ਦਗੀ ਪੱਤਰ ਤੱਕ ਸੁਜਾਤਾ ਚਾਵਲਾ ਦੇ ਪਤੀ ਮੁਨੀਸ਼ ਕੁਮਾਰ ਉਰਫ਼ ਪੰਕਜ ਪੱਪੂ ਵੱਲੋਂ ਹੀ ਪ੍ਰਪੋਜ਼ (ਤਸਦੀਕ) ਕੀਤੇ ਗਏ ਸਨ। ਇਸ ਦੇ ਨਾਲ ਹੀ ਪੰਕਜ ਪੱਪੂ ਵੱਲੋਂ ਕੀਤੀ ਗਈ ਚੋਣ ਪ੍ਰਚਾਰ ਦੀ ਵਿਊਂਤਬੰਦੀ ਵੀ ਸ਼ਹਿਰ ਅੰਦਰ ਆਪਣੇ ਆਪ ਵਿੱਚ ਚਰਚਾ ਦਾ ਵਿਸ਼ਾ ਬਣੀ ਹੋਈ ਹੈ।

ਕੌਂਸਲ ਪ੍ਰਧਾਨ ਦਾ ਪਤੀ ਪੰਕਜ ਪੱਪੂ ਉਸ ਸਮੇਂ ਵੱਡੇ ਪੱਧਰ ‘ਤੇ ਚਰਚਾ ਵਿੱਚ ਆਇਆ, ਜਦੋਂ ਉਸ ਖ਼ਿਲਾਫ਼ ਸ਼ੰਭੂ ਮੋਰਚੇ ਤੋਂ ਕਿਸਾਨਾਂ ਦੀ ਟਰਾਲੀ ਚੋਰੀ ਕਰਨ ਦੇ ਦੋਸ਼ ਲੱਗੇ ਸਨ। ਉਨ੍ਹਾਂ ਦੀ ਆਪਣੀ ਦੁਕਾਨ ਅਤੇ ਨਗਰ ਕੌਂਸਲ ਦੇ ਈ ਓ (EO) ਦੀ ਕੋਠੀ ਦੀ ਜ਼ਮੀਨ ਹੇਠੋਂ ਟਰਾਲੀਆਂ ਦਾ ਕੁਝ ਸਾਮਾਨ ਮਿਲਣ ਮਗਰੋਂ ਉਨ੍ਹਾਂ ਖ਼ਿਲਾਫ਼ ਟਰਾਲੀ ਚੋਰੀ ਦੇ ਦੋ ਕੇਸ ਵੀ ਦਰਜ ਹਨ।

ਵਾਰਡ ਵਾਸੀਆਂ ਦਾ ਕਹਿਣਾ ਹੈ ਕਿ ਜਦੋਂ ਚੋਣਾਂ ਤੋਂ ਪਹਿਲਾਂ ਸਫ਼ਾਈ ਸੇਵਕਾਂ ਦੀ ਹੜਤਾਲ ਕਾਰਨ ਸਾਰਾ ਸ਼ਹਿਰ ਕੂੜੇ ਨਾਲ ਭਰਿਆ ਹੋਇਆ ਸੀ, ਉਸ ਸਮੇਂ ਪੰਕਜ ਪੱਪੂ ਖ਼ੁਦ ਰੋਜ਼ ਸਵੇਰੇ ਪੰਜ ਵਜੇ ਵਾਰਡ ਵਿੱਚੋਂ ਕੂੜਾ ਚੁੱਕ ਕੇ ਵਾਰਡ ਦੀ ਸਫ਼ਾਈ ਕਰ ਦਿੰਦਾ ਸੀ। ਪੰਕਜ ਪੱਪੂ ਨੇ ਦੱਸਿਆ ਕਿ ਉਸ ਨੇ ਕੂੜਾ ਚੁੱਕਣ ਲਈ ਆਪਣੇ ਕੋਲੋਂ 1.80 ਲੱਖ ਰੁਪਏ ਖ਼ਰਚ ਕੇ ਈ-ਰਿਕਸ਼ਾ ਲਿਆਂਦੀ ਅਤੇ ਹੜਤਾਲ ਦੌਰਾਨ ਵੀ ਰੋਜ਼ ਸਵੇਰੇ ਹੀ ਕੰਮ ‘ਤੇ ਲੱਗ ਕੇ ਆਪਣੇ ਵਾਰਡ ਨੂੰ ਸਾਫ਼-ਸੁਥਰਾ ਰੱਖਿਆ।

ਵਾਰਡ ਨੰਬਰ 22 ਵਿੱਚ ਕੁੱਲ 1564 ਵੋਟਾਂ ਪੋਲ ਹੋਈਆਂ, ਜਿਨ੍ਹਾਂ ਵਿੱਚੋਂ ਸੁਜਾਤਾ ਚਾਵਲਾ ਨੂੰ 1169 ਵੋਟਾਂ ਪ੍ਰਾਪਤ ਹੋਈਆਂ, ਜਦਕਿ ਕਾਂਗਰਸ ਉਮੀਦਵਾਰ ਡਿੰਪਲ ਨੂੰ 279 ਵੋਟਾਂ ਮਿਲੀਆਂ। ਇਸੇ ਤਰ੍ਹਾਂ ਭਾਜਪਾ ਉਮੀਦਵਾਰ ਅਮਨ ਕੌਸ਼ਲ ਨੂੰ 88 ਵੋਟਾਂ, ‘ਆਪ’ ਉਮੀਦਵਾਰ ਨੂੰ 15 ਵੋਟਾਂ ਅਤੇ ਨੋਟਾ (NOTA) ਨੂੰ 13 ਵੋਟਾਂ ਪਈਆਂ। ਸ਼੍ਰੋਮਣੀ ਅਕਾਲੀ ਦਲ ਨੇ ਇੱਥੇ ਆਪਣਾ ਕੋਈ ਉਮੀਦਵਾਰ ਹੀ ਨਹੀਂ ਉਤਾਰਿਆ ਸੀ।