எலான் மஸ்க் ஹியூமனாய்டு ரோபோக்களின் (Humanoid robots) எதிர்காலம் குறித்து மற்றொரு அதிரடி கணிப்பை வெளியிட்டுள்ளார். அடுத்த 10 ஆண்டுகளில் உலகிலுள்ள ஒட்டுமொத்த மனிதர்களின் உற்பத்தியை விட, இந்த ரோபோக்களின் உற்பத்தித் திறன் பல மடங்கு அதிகமாக இருக்கும் என்று அவர் தெரிவித்துள்ளார்.
செயற்கை நுண்ணறிவு மற்றும் ரோபோக்கள் குறித்து அவர் தொடர்ந்து பேசி வருவது, இந்தத் துறையின் மீது அவர் கொண்டுள்ள தீவிர ஆர்வத்தையும், எதிர்காலத்தில் நடக்கப்போகும் மாற்றங்களையும் உணர்த்துகிறது.
சமீபத்தில் 'DogeDesigner' என்ற X கணக்கில் வெளியான ஒரு பதிவை எலான் மஸ்க் தனது பக்கத்தில் மறுபதிவு செய்துள்ளார். அதனுடன் மஸ்க் பேசும் வீடியோ ஒன்றும் இணைக்கப்பட்டுள்ளது. அதில், அடுத்த 10 ஆண்டுகளில் உலகில் குறைந்தது 100 கோடி (1 பில்லியன்) ஹியூமனாய்டு ரோபோக்கள் பயன்பாட்டில் இருக்கும். ஒவ்வொரு ரோபோவும் ஒரு மனிதனை விடக் குறைந்தது 5 மடங்கு அதிக உற்பத்தியை வழங்கும் என்று பேசியுள்ளார்.
வேலை செய்யும் முறையை ரோபோக்கள் எப்படி மாற்றும்? ஹியூமனாய்டு ரோபோக்கள் மனிதர்கள் வேலை செய்யும் சூழலுக்கும், உடல் அமைப்புக்கும் ஏற்ப வடிவமைக்கப்படுபவை. இதன் காரணமாகக் கீழ்க்காணும் மாற்றங்கள் நிகழலாம். தொழிற்சாலைகள், சேமிப்புக் கிடங்குகள் மற்றும் கட்டுமானத் தளங்களில் எவ்விதச் சிறப்பு மாற்றமும் இன்றி இந்த ரோபோக்களை நேரடியாகப் பயன்படுத்த முடியும்.
கடினமான மற்றும் சலிப்பூட்டும் வேலைகளை மனிதர்களைப் போல் எவ்வித ஓய்வும் இன்றித் தொடர்ந்து செய்யும் திறன் இவற்றுக்கு உண்டு. எனினும், 100 கோடி ரோபோக்கள் என்ற மாபெரும் இலக்கை அடைய உற்பத்தி, மென்பொருள், ஆற்றல் அமைப்புகள் மற்றும் உள்கட்டமைப்பில் பல மடங்கு முன்னேற்றம் ஏற்பட வேண்டும்.
எதிர்காலத் தொழில்நுட்பத்தில் ஹியூமனாய்டு ரோபோக்களே முக்கியப் பங்கு வகிக்கும் என மஸ்க் கருதுகிறார். மனிதர்கள் தற்போது செய்து வரும் அன்றாட வேலைகளைச் செய்வதற்காக மஸ்க்கின் டெஸ்லா நிறுவனம் 'ஆப்டிமஸ்' என்ற ஹியூமனாய்டு ரோபோவை உருவாக்கி வருகிறது. மஸ்க்கின் இந்தக் கணிப்பு மட்டும் நிஜமானால், அதன் தாக்கம் தொழிற்சாலைகளைத் தாண்டி உலகெங்கும் எதிரொலிக்கும். வணிகச் செலவுகள், வேலைவாய்ப்புகள் மற்றும் சேவைகள் என ஒட்டுமொத்தப் பொருளாதார அமைப்பையே இந்த ரோபோக்கள் புரட்டிப் போடும் என எதிர்பார்க்கப்படுகிறது.