கடந்த சில ஆண்டுகளாக கேஸ் சிலிண்டர் விலை தொடர்ந்து உயர்ந்து வருவதால், பலர் இன்டக்‌ஷன் ஸ்டவ்வை மாற்று சமையல் சாதனமாக பயன்படுத்தத் தொடங்கியுள்ளனர். பயன்படுத்துவதற்கு எளிமையாக இருப்பதால் நகர்ப்புறங்கள் மட்டுமின்றி கிராமப்புறங்களிலும் இதன் பயன்பாடு அதிகரித்து வருகிறது. ஆனால், மழைக்காலங்களில் இன்டக்‌ஷன் ஸ்டவ் பயன்படுத்தும் போது பாதுகாப்பு விஷயங்களில் அலட்சியம் காட்டினால் மின்சார விபத்துகள் ஏற்படும் அபாயம் இருப்பதை மறந்துவிடக் கூடாது.

இன்டக்‌ஷன் ஸ்டவ் முழுவதும் மின்சாரத்தைச் சார்ந்து இயங்குவதால், ஈரப்பதம் அதிகமாக இருக்கும் மழைக்காலத்தில் கூடுதல் கவனம் அவசியம். குறிப்பாக மின் கம்பி, பிளக் அல்லது மின் இணைப்பில் சிறிய கோளாறு இருந்தால்கூட மின் கசிவு ஏற்பட வாய்ப்புள்ளது. எனவே, சமையலைத் தொடங்கும் முன் சாதனம் மற்றும் அதன் மின் இணைப்புகள் பாதுகாப்பான நிலையில் உள்ளனவா என்பதைச் சரிபார்ப்பது நல்ல பழக்கமாகும்.

வயர் கிழிந்திருந்தாலோ, வெளிப்புற உறை சேதமடைந்திருந்தாலோ அல்லது பிளக் தளர்வாக இருந்தாலோ அவற்றை உடனடியாக மாற்ற வேண்டும். பழுதடைந்த மின் உபகரணங்களை தொடர்ந்து பயன்படுத்துவது தேவையற்ற ஆபத்துகளை உருவாக்கக்கூடும். அதேபோல், ஈரமான கைகளுடன் ஸ்விட்சை இயக்குவதையோ அல்லது மின்சார சாதனங்களைத் தொடுவதையோ தவிர்க்க வேண்டும். பயன்படுத்தும் பாத்திரங்களும் அடிப்பகுதி உலர்ந்ததாக இருப்பது பாதுகாப்பை மேம்படுத்தும்.

இன்டக்‌ஷன் ஸ்டவ்விற்கு ஏற்ற அடிப்பகுதி கொண்ட பாத்திரங்களையே பயன்படுத்துவது முக்கியம். பொருந்தாத பாத்திரங்கள் சமையல் திறனை பாதிப்பதோடு, சில நேரங்களில் பாதுகாப்பு சிக்கல்களையும் உருவாக்கலாம். மேலும், இன்டக்‌ஷன் செயல்பாட்டில் இருக்கும் போது தேவையில்லாமல் அதன் மேற்பரப்பைத் தொடாமல் இருப்பது நல்லது.

ஒருவருக்கு மின்சார ஷாக் ஏற்பட்டால், முதலில் மெயின் மின் இணைப்பை நிறுத்த வேண்டும். அதன் பிறகே மரக்கட்டை, பிளாஸ்டிக் போன்ற மின்சாரம் கடத்தாத பொருளின் உதவியுடன் அவரை மின் இணைப்பிலிருந்து பாதுகாப்பாகப் பிரிக்க வேண்டும். மின் இணைப்பு துண்டிக்கப்படாமல் இருக்கும் வரை பாதிக்கப்பட்டவரை நேரடியாகத் தொடக் கூடாது. பின்னர் உடனடியாக அவசர மருத்துவ உதவியைப் பெறுவது மிகவும் அவசியம்.

Also Read:மழை நேரத்தில், மாலை டீக்கு இதை செஞ்சு பாருங்க… தட்டுல ஒரு துண்டு கூட மிஞ்சாது!