நான் தேர்தலுக்கு மட்டும் வருபவன் கிடையாது. உங்களுக்கு விசுவாசத்தோடு இருப்பேன் என விராலிமலை சட்டமன்ற உறுப்பினர் சி.விஜயகர் தொகுதி மக்களுக்கு நன்றி தெரிவித்துள்ளார்.

2026 தமிழ்நாடு சட்டமன்ற தேர்தலில் அதிமுக சார்பில் விராலிமலை தொகுதியில் முன்னாள் சுகாதாரத்துறை அமைச்சர் சி.விஜயகர் போட்டியிட்டு சுமார் 62 ஆயிரம் வாக்குகள் வித்தியாசத்தில் வெற்றி பெற்றார். இதற்கிடையில் அதிமுகவில் பிளவு ஏற்பட்டுள்ள நிலையில் விஜயகர் தொகுதி மக்களுக்கு நன்றி சொல்லும் நிகழ்வு தள்ளிக்கொண்டே சென்றது. இந்த நிலையில் தேர்தல் முடிவுகள் வந்து ஒரு மாதம் ஆகவுள்ள நிலையில் அன்னவாசல் பகுதியில் இருந்து தனது நன்றி தெரிவிக்கும் நிகழ்ச்சியை அவர் தொடங்கியுள்ளார்.

பொதுமக்களிடையே பேசிய விஜயகர், ”உங்க எல்லாருடைய முகத்தைப் பார்த்தால் தான் எனக்கு ரொம்ப சந்தோசமாக இருக்கிறது. அன்னவாசலில் முதல் நன்றி சொல்லும் நிகழ்வை தொடங்குகிறேன். மிக அதிகமான வாக்குகளை வாங்கி கொடுத்த உங்கள் அனைவருக்கும் நன்றியைத் தெரிவித்துக் கொள்கிறேன். விஜயகர் உங்க வீட்டு பிள்ளை. நான் தேர்தலுக்கு மட்டும் வருபவன் கிடையாது. நான் எப்போதும் வருவேன் என்பது மக்களாகிய உங்களுக்கு நன்றாக தெரியும். என்னை தூக்கி பிடித்து விட்டீர்கள்.

சாமி முன்னாடி சொல்கிறேன் ஆயுள் உள்ளவரை தொகுதி மக்களுக்கு நன்றியோடு இருப்பேன். என்னை இந்த தொகுதியில் சுமார் 62,073 வாக்குகள் வித்தியாசத்தில் வெற்றி பெற வைத்திருக்கிறீர்கள். உங்களுக்கு விசுவாசத்தோடு இருப்பேன். விராலிமலை தொகுதி முழுக்க என்னுடைய குரல் ஓங்கி ஒலிக்கும்” என தெரிவித்தார். மேலும், “நன்றி சொல்லும் நிகழ்வில் மக்கள் அமோக வரவேற்பு அளிக்கிறார்கள். விராலிமலை சட்டமன்ற தொகுதியின் ஒவ்வொரு பகுதியில் வாழும் மக்களுக்கு என்ன செய்ய வேண்டும் என்பது எனக்கு நன்றாக தெரியும்” என கூறியுள்ளார்.