ஆடுகளத்திலேயே அழுத ஜோகோவிச்

அமெரிக்க ஓபன் டென்னிஸ் தொடரின் முதல் சுற்றிலேயே நட்சத்திர வீரரான நோவோக் ஜோகோவிச் தோல்வி கண்டு வெளியேறினார். இதனை ஏற்க முடியாமல் ஆடுகளத்திலேயே அவர் மனமுடைந்து அழுத வீடியோ இணையத்தில் வைரலாகியுள்ளது. நியூயார்க்கில் நடைபெற்று வரும் இந்த தொடரில் வென்று வரலாற்று சாதனையாக 25வது க்ராண்ட் ஸ்லாம் பட்டத்தை ஜோகோவிச் வெல்வார் என ரசிகர்கள் எதிர்பார்த்த நிலையில், முதல் சுற்றிலேயே தோல்வி கண்டு பேரதிர்ச்சி தந்துள்ளார். இரவு முழுவதும் உடல்நலப் பிரச்சினைகளுடன் போராடிய வந்த நிலையில், கடுமையாக முயன்ற பிறகும் 6-7, 7-5, 6-4, 2-6, 1-6 என்ற செட் கணக்கில் அர்ஜெண்டினாவின் மரியானோ நவோனேவிடம் தோல்வியடைந்தார். இந்த தோல்வியால் சர்வதேச டென்னிஸ் தரவரிசையில் நான்காவது இடத்தில் இருந்த, செரியாவின் ஜோகோவிச் தற்போது ஐந்தாவது இடத்திற்கு தள்ளப்பட்டுள்ளார்.

போட்டியின் போதே வாந்தி, அழற்சி

ஆர்தர் ஆஷ் மைதானத்தில் நடைபெற்ற போட்டியின் தொடக்கத்தின் போதே ஜோகோவிச் உடலளவில் பலவீனமாக இருப்பதை தெளிவாக காண முடிந்தது. மோசமான வானிலை காரணமாக கூரை மூடப்படுவதற்கு முன்பு, 39 வயதான அவர் தனது தலையில் மீண்டும் மீண்டும் பனிக்கட்டிப் பையைப் பயன்படுத்தினார். ஈரப்பதமான சூழல் அசௌகரியமாக தோன்றியுள்ளது. கூரை மூடப்பட்டவுடன் ஏசியை இயக்க முடியுமா என்று மேற்பார்வையாளரிடம் கேட்டார். மூன்றாவது செட்டின் ஆறாவது ஆட்டத்தின்போது ஜோகோவிச் பலமுறை வாந்தி எடுத்ததால், உடல் நல குறைபாடு தீவிரமடைந்தது. ஆட்டத்தைத் தொடர்வதற்கு முன்பு அவர் ஆடுகளத்தின் பின்புறம் சோர்வாக காணப்பட்டார். ஆட்டம் நான்காவது மணி நேரத்தை நெருங்கியபோது, ​​போட்டித் தொடரின் பிசியோதெரபிஸ்ட் அவருக்கு மாத்திரைகளை வழங்கினர்.