பல ஆண்டுகளுக்கு பிறகு நடைபெற்ற மீன்பிடித் திருவிழா - சிவகங்கை அருகே மக்களின் உற்சாகம்.
17 ஆண்டுகளுக்கு பிறகு பாரம்பரிய மீன்பிடித் திருவிழா
சிவகங்கை மாவட்டம் மறவமங்கலம் அருகே உள்ள பெரிய கண்மாய் பகுதியில், 17 ஆண்டுகளுக்கு பிறகு பாரம்பரிய மீன்பிடித் திருவிழா இன்று கோலாகலமாக நடைபெற்றது. நீண்ட இடைவெளிக்குப் பிறகு நடைபெற்றதால், இந்த விழா மக்கள் மத்தியில் பெரும் எதிர்பார்ப்பையும் உற்சாகத்தையும் ஏற்படுத்தியது.
இந்த நிகழ்வில் புதுக்கோட்டை, தேனி, கம்பம், நத்தம், சிவகங்கை உள்ளிட்ட பல்வேறு பகுதிகளில் இருந்து ஆயிரக்கணக்கான பொதுமக்கள் கலந்து கொண்டனர். காலை முதலே கண்மாயில் இறங்கிய மக்கள், கைகளாலும் வலைகளாலும் மீன்களை பிடித்து மகிழ்ந்தனர்.
பல்வேறு வகை நாட்டு மீன்கள்
ஜிலேப்பி, கட்லா, ரோகு போன்ற பல்வேறு வகை நாட்டு மீன்கள் அதிக அளவில் கிடைத்ததால், கலந்து கொண்டவர்கள் உற்சாகமாக மீன்பிடியில் ஈடுபட்டனர். குடும்பத்துடன் கலந்து கொண்டவர்கள் இந்த அரிய அனுபவத்தை கொண்டாடினர். இந்த திருவிழா, மழைக்காலத்தில் நிரம்பிய கண்மாயில் மீன்கள் வளர்ந்த பின், ஒரு குறிப்பிட்ட நாளில் பொதுமக்களுக்கு திறந்து வைத்து நடத்தப்படும் பாரம்பரிய நிகழ்வாகும். கிராம மக்களின் ஒற்றுமையையும், பாரம்பரியத்தையும் வெளிப்படுத்தும் இந்த விழா, நீண்ட இடைவெளிக்குப் பிறகு மீண்டும் நடத்தப்பட்டதால் அனைவரும் மகிழ்ச்சி அடைந்தனர்.
Author : அருண் சின்னதுரை