தமிழ்நாடு கோயில்களில் யாருக்கெல்லாம் செல்போன் தடை விதிமுறை பொருந்தாது என்பது தொடர்பாக அமைச்சர் ரமேஷ் விளக்கம் கொடுத்துள்ளார்.

பக்தர்கள் மன நிம்மதிக்காக சாமி தரிசனம் செய்ய வரும் இடத்தில் செல்போனைக் கொண்டு போட்டோ, செல்ஃபி, ரீல்ஸ் வீடியோ, கருவறை புகைப்படம், அர்ச்சகர் மற்றும் கோயில் ஊழியர்கள் பற்றிய புகார்களில் உண்மை நிலவரம் தெரிய வரும்முன் தவறான தகவல்கள் பரவுவது என பல பிரச்னைகள் எழுந்து வருகிறது. இதனை தடுக்கும் பொருட்டு நீதிமன்ற உத்தரவின்படி இந்த திட்டமானது அமலுக்கு வந்துள்ளது.

யாருக்கெல்லாம் விதிவிலக்கு?

இந்த நிலையில் கோயில்களின் செல்போன் தடை தொடர்பாக அமைச்சர் ரமேஷ் விளக்கம் ஒன்றை அளித்துள்ளார். அதாவது நீதிமன்ற உத்தரவுப்படியே இந்த திட்டம் நடைமுறைக்கு வந்துள்ளது.

ஆந்திரா, கேரளம், தெலங்கானா மற்றும் வடமாநிலங்களில் உள்ள கோயில்களில் கூட செல்போன்களை பாதுகாத்து கட்டணம் வசூலிக்கும் நடைமுறை உள்ளது. அதனால் அப்படியான நடைமுறை ஒன்றும் புதியது அல்ல. செல்போனுக்கு தடை விதிக்கும் திட்டத்தை பாஜகவினர் கண்மூடித்தனமாக எதிர்க்கக்கூடாது. விசேஷ நாட்களின்போது செல்போன்களுக்கு தடை விதிக்கப்படாது என ஏற்கனவே கூறியுள்ளோம். கர்ப்பிணிகள், முதியோர், மாற்றுத்திறனாளிகள் போன்றோர் செல்போன் கொண்டு செல்ல தடை இல்லை என விளக்கமளித்துள்ளார். அதேசமயம் கேமரா வசதி இல்லாத சாதாரண செல்போன்களை பக்தர்கள் கையோடு கொண்டு செல்லலாம் என கூறப்பட்டுள்ளது.

இந்த நடைமுறைக்கு ரூ.5 வசூலிப்பது கோயிலுக்கு வருமானம், தனிநபர் அந்த பணத்தைக் கொண்டு செல்வதற்கு இல்லை. அப்படியெல்லாம் இல்லை. அந்த பணியில் மகளிர் சுய உதவிக்குழுவைச் சேர்ந்தவர்களைத் தான் ஈடுபட வைத்துள்ளோம். அவர்களுக்கு சம்பளம் கொடுக்கவும், ரசீது அச்சடிக்க பேப்பர் ரோல் வாங்கவும் இந்த மாதிரி செலவினங்கள் தான் செய்யப்போகிறோம். அதிலும் மீதம் இருந்தால் கோயிலுக்கு வரும் பக்தர்களுக்கான அன்னதானம் திட்டத்தில் செலவிடுவோம் எனவும் அமைச்சர் ரமேஷ் தெரிவித்துள்ளார்.

Author : பேச்சி ஆவுடையப்பன்