இதேபோல் புதிய தமிழகம் கட்சித் தலைவர் டாக்டர் கிருஷ்ணசாமி வெளியிட்டுள்ள சமூக வலைத்தளப் பதிவில், “மக்களின் தீர்ப்பை ஏற்று, தனிப் பெரும் கட்சியாக உருவெடுத்துள்ள தமிழக வெற்றிக் கழகத்தை ஆட்சி அமைக்க ஆளுநர் காலம் தாழ்த்தாமல் அழைக்க வேண்டும் என புதிய தமிழகம் கட்சியின் சார்பாக வலியுறுத்துகிறேன். தேவையற்ற காலதாமதம் என்பது மறைமுகமாகக் குதிரைப் பேரத்திற்கு வழிவகுக்கும் செயலாக முடிந்துவிடும். எனவே, ஆளுநர் சட்டத்தின் அடிப்படையிலும், தார்மீக அடிப்படையிலும் விஜய் அவர்களை முதல்வராகப் பொறுப்பேற்கவும், அமைச்சரவையை அமைக்கவும் உடனடியாக அழைப்பு விடுக்க வேண்டும் என மீண்டும் வலியுறுத்துகிறேன்” என தெரிவித்துள்ளார்.

காங்கிரஸ் எம்.பி., மாணிக்கம் தாகூர் அளித்துள்ள ஊடக பேட்டி ஒன்றில், “மக்கள் தீர்ப்பைத் தாமதப்படுத்தவும், கையாளவும் பாஜக மேற்கொண்ட முயற்சியை தமிழகம் நிராகரித்துள்ளது. பெரும்பான்மையை நிரூபிக்க தமிழக வெற்றிக் கழகத்துக்கு ஆளுநர் 4-5 நாட்கள் அவகாசம் வழங்கலாம் என்றும், இதற்கு மேலும் என்ன தெளிவு தேவை என்றும் அவர் கேள்வி எழுப்பியுள்ளார்.

பிரபல இயக்குநர் ஓபெலி என்.கிருஷ்ணா வெளியிட்டுள்ள பதிவில், “தவெக தலைவர் விஜயை சட்டமன்றத்தில் பலப்பரீட்சை நடத்தி நிரூபிக்கச் செய்வதுதான் இந்திய ஜனநாயகத்தின் உண்மையான அழகாக இருக்கும். பெரும்பான்மை மக்களாலும், குறிப்பாக இளைஞர்களின் நம்பிக்கையாலும் தேர்வு செய்யப்பட்ட ஒருவருக்கு உரிய ஜனநாயக மரியாதை வழங்கப்பட வேண்டும். மக்களின் தீர்ப்பை மதிப்பதே ஜனநாயகத்தின் உயர்ந்த பண்பாகும்” என கூறியுள்ளார்.