இதனால் வெளிச்சந்தையில் பெரிய வெங்காயத்தின் விலை கிலோ ரூ.60 முதல் ரூ.80 வரை உயர்ந்துள்ள நிலையில், பொதுமக்களுக்கு நிவாரணம் அளிக்கும் வகையில் நியாய விலைக் கடைகள் மூலம் ஒரு கிலோ ரூ.35-க்கு விற்பனை செய்யும் திட்டத்தை அரசு தொடங்கி வைத்துள்ளது.

கட்டுப்படுத்தப்பட்ட விலையில் வெங்காய விநியோகம் சந்தையில் நிலவும் விலை ஏற்றத்தைக் கட்டுப்படுத்த, தமிழ்நாடு நுகர்வோர் கூட்டுறவு இணையம் (TNCCF) மூலமாக, தேசிய கூட்டுறவு நுகர்வோர் கூட்டமைப்பு (NCCF) மற்றும் ‘நாஃபெட்’ (NAFED) நிறுவனங்களிடமிருந்து ஒரு கிலோ பெரிய வெங்காயம் ரூ.29-க்கு கொள்முதல் செய்யப்பட்டுள்ளது.

இந்த வெங்காயத்தைப் பொதுமக்களுக்கு கிலோ ரூ.35 என்ற மானிய விலையில் வழங்கத் தமிழக அரசு ஏற்பாடு செய்துள்ளது. இதற்கான தொடக்க விழா சென்னை ஆழ்வார்பேட்டையில் உள்ள TUCS நியாய விலைக் கடையில் நடைபெற்றது.

அமைச்சர்கள் வெங்கடரமணன் மற்றும் காந்திராஜ் ஆகியோர் கலந்துகொண்டு இத்திட்டத்தைத் தொடங்கி வைத்தனர்.

செய்தியாளர் சந்திப்பில் அமைச்சர் அளித்த விளக்கங்கள்: துவக்க விழாவிற்குப் பிறகு செய்தியாளர்களைச் சந்தித்த உணவாமைச்சர் வெங்கடரமணன் தெரிவித்த முக்கியத் தகவல்கள்:

1,000 மெட்ரிக் டன் கொள்முதல்: வரத்து குறைவால் வெளிச்சந்தையில் விலை உயர்ந்துள்ள சூழலில், முதற்கட்டமாக வெளிமாநிலங்கள் மற்றும் உற்பத்தியாகும் பகுதிகளிலிருந்து 1,000 மெட்ரிக் டன் வெங்காயம் உடனடியாகக் கொள்முதல் செய்யப்பட்டுள்ளது.

80 லட்சம் குடும்பங்கள் பயன்பெறும்: முதற்கட்டமாகச் சென்னை மாநகராட்சி மற்றும் நகராட்சிப் பகுதிகளில் உள்ள 8,419 ரேஷன் கடைகள் மூலம் குடும்ப அட்டைக்கு 1 கிலோ வீதம் வெங்காயம் விநியோகிக்கப்படும். இதன் மூலம் சுமார் 80 லட்சம் குடும்பங்கள் பலனடைவர்.

திட்டம் விரிவாக்கம்: இன்னும் ஓரிரு நாட்களில் மாநிலத்தின் அனைத்துப் பகுதிகளில் உள்ள கூட்டுறவு மற்றும் பண்ணைப் பசுமை நுகர்வோர் கடைகளுக்கும் இத்திட்டம் விரிவுபடுத்தப்படும். வரத்தைப் பொறுத்து வழங்கப்படும் அளவை உயர்த்தவும் நடவடிக்கை எடுக்கப்படும்.

விலை ஏற்றக் கட்டுப்பாடு: அரிசி மற்றும் சர்க்கரை விலை உயர்வு குறித்த எதிர்க்கட்சிகளின் புகார்களுக்கு பதிலளித்த அவர், இடைத்தரகர்கள் மற்றும் கருப்புச் சந்தையைக் கட்டுப்படுத்தத் தொடர்ந்து தீவிரமாகக் கண்காணிக்கப்பட்டு வருவதாக உறுதியளித்தார்.

அம்மா உணவக கோரிக்கைகள்: அம்மா உணவக ஊழியர்களின் கோரிக்கைகள் மற்றும் உணவின் தரம், சுகாதாரம் தொடர்பான புகார்கள் ஆய்வு செய்யப்பட்டு விரைவில் தீர்வு காணப்படும்.

முதலமைச்சர் விஜய் பிரதமர் வேட்பாளரா? “முதலமைச்சர் விஜய் தேசிய அளவில் பிரதமர் வேட்பாளராக முன்னிறுத்தப்படுவாரா?” என்ற செய்தியாளர்களின் கேள்விக்குப் பதிலளித்த அமைச்சர் வெங்கடரமணன், “தமிழக வெற்றிக் கழக சட்டமன்ற உறுப்பினர்களின் அன்பு மற்றும் ஆசியின் காரணமாகவே இதுபோன்ற கருத்துக்கள் வெளியாகின்றன.

இதற்கான காலம் இன்னும் நிறைய இருக்கிறது. தேசிய அளவிலான தேர்தல் வரும்போது, கட்சித் தலைவர்கள் மற்றும் தோழமையுடன் கலந்து ஆலோசித்து உரிய காலத்தில் நல்ல முடிவு எடுக்கப்படும்” எனக் குறிப்பிட்டார்.

பொதுமக்கள் கோரிக்கைஅதேவேளையில், ஒரு குடும்ப அட்டைக்கு 1 கிலோ வெங்காயம் மட்டுமே வழங்கப்படுவது குடும்பத் தேவைகளுக்குப் போதுமானதாக இல்லை என்றும், அளவை 2 முதல் 3 கிலோவாக உயர்த்த வேண்டும் என்றும் ஆழ்வார்பேட்டை பகுதியில் பொருட்களைப் பெற வந்த பொதுமக்கள் கோரிக்கை விடுத்துள்ளனர்.