தமிழ்நாட்டில் தேர்தல் நடத்தை விதிகள் காரணமாக நிறுத்தப்பட்டிருந்த புதிய ரேஷன் கார்டு வழங்கும் பணிகள் மற்றும் விண்ணப்ப பரிசீலனைகள் மீண்டும் தொடங்குகின்றன.
தகுதியுள்ள பொதுமக்கள் தேவையான ஆவணங்களுடன் ஆன்லைன் அல்லது இ-சேவை மையங்கள் மூலம் விண்ணப்பித்து பயன்பெறலாம்.
தற்காலிகமாக நிறுத்தி வைக்கப்பட்டிருந்த புதிய ரேஷன் கார்டுகள் வழங்கும் பணிகளும், புதிய விண்ணப்பங்களை பரிசீலிக்கும் செயல்முறைகளும் வரும் மே 15-ஆம் தேதி முதல் மீண்டும் தொடங்கப்பட உள்ளன.
புதிய ரேஷன் கார்டுக்கு விண்ணப்பிக்க சில முக்கிய ஆவணங்கள் கட்டாயமாக தேவைப்படும். குடும்ப உறுப்பினர்கள் அனைவரின் ஆதார் அட்டை நகல்கள், சமையல் எரிவாயு இணைப்பு குறித்த விவரங்கள், குடும்பத் தலைவரின் பாஸ்போர்ட் அளவு புகைப்படம், வசிப்பிடத்தை உறுதிப்படுத்தும் முகவரி சான்றுகள் ஆகியவை அவசியம் சமர்ப்பிக்கப்பட வேண்டும். முகவரி சான்றாக வாடகை ஒப்பந்தம், மின்சார கட்டண ரசீது போன்ற ஆவணங்கள் ஏற்றுக்கொள்ளப்படும்
முன்னதாக புதிய கார்டுக்காக விண்ணப்பித்தும், ஆவணங்களில் பிழைகள் இருந்தது போன்ற காரணங்களால் விண்ணப்பம் நிராகரிக்கப்பட்டவர்களுக்கும் மீண்டும் ஒரு வாய்ப்பு வழங்கப்பட்டுள்ளது. அவர்கள் தேவையான திருத்தங்களை செய்து, மே 15-ஆம் தேதிக்கு பிறகு மீண்டும் விண்ணப்பிக்கலாம் என்று அறிவிக்கப்பட்டுள்ளது. பொதுமக்கள் தமிழ்நாடு பொது விநியோக திட்டத்தின் அதிகாரப்பூர்வ இணையதளம் மூலம் ஆன்லைனில் விண்ணப்பிக்கலாம்.
இதன் மூலம் பல மாதங்களாக காத்திருந்த பொதுமக்களுக்கு நிம்மதி கிடைத்துள்ளது. குறிப்பாக புதியதாக திருமணமானவர்கள், கூட்டு குடும்பத்தில் இருந்து பிரிந்து தனியாக வசிக்க தொடங்கியவர்கள், இதுவரை ரேஷன் கார்டு இல்லாத தகுதியுடைய நபர்கள் ஆகியோர் புதிய குடும்ப அட்டைக்காக விண்ணப்பிக்கலாம் என அதிகாரப்பூர்வமாக தெரிவிக்கப்பட்டுள்ளது.
அதேபோல் அருகிலுள்ள இ-சேவை மையங்கள் மூலமாகவும் விண்ணப்பிக்கும் வசதி உள்ளது. விண்ணப்பித்தவுடன் வழங்கப்படும் குறிப்பு எண்ணை பயன்படுத்தி, விண்ணப்பத்தின் நிலையை ஆன்லைனில் அவ்வப்போது கண்காணிக்கவும் முடியும். சரியான ஆவணங்களுடன் விண்ணப்பித்தவர்களுக்கு சம்பந்தப்பட்ட அதிகாரிகள் நேரில் ஆய்வு மேற்கொண்ட பின் மிக குறுகிய காலத்திலேயே புதிய ஸ்மார்ட் ரேஷன் கார்டுகள் வழங்கப்படும் என தெரிவிக்கப்பட்டுள்ளது.